Մարզպետարանները կօպտիմալացվեն․7 վարչությունների փոխարեն նախատեսվում է թողնել 4-ը

Շիրակի մարզպետարանի գլխավոր քարտուղար Արսեն Աբրահամյանը «Շանթ»-ի «Տեսանկյուն » հաղորդաշարի եթերում,ի թիվս այլ հարցերի ,անդրադարձել է նաև մարզպետարաններում սպասվող կառուցվածքային փոփոխություններին ,որով նախատեսվում է նաև վարչությունների միավորում:Գլխավոր քարտուղարը նշել է,որ այս փոփոխությունները նախագծվել էին դեռևս նախորդ իշխանությունների ժամանակ,որոնք նախատեսվում էր  կիրառել տարածքային կառավարման օրենքի ընդունումից հետո:

«Հիմա, երբ որ արդեն օրենքով սահմանվել են մարզպետարանների և մարզպետների լիազորությունների շրջանակը՝ նաև հաշվի առնելով արդի մարտահրավերները, իրավացիորեն որոշում է կայացվել  նաև օպտիմալացնել մարզպետարանների աշխատակազմը, համապատասխանեցնել այն գործառույթներին, որ սահմանված են  մարզպետի կողմից իրականացվելու համար: Անհրաժեշտ են արդյոք մարզպետարանները, էդ հարցադրումները անընդհատ տրվել են և այդպես էլ դեռևս կան այդպիսի հարցադրումներ»,- նշել է Արսեն Աբրահամյանը:

Մարզպետարանի գլխավոր քարտուղարը նշել է, որ տարիներ շարունակ տարբեր պատճառներով  մարզպետարանները նախաձեռնողականություն չեն ցուցաբերել, համապատասխան օրենսդրական և իրավական ակտեր չեն եղել: Բայց այսօրվա մարտահրավերները, երբ տեղի են ունենում համայնքների միավորում,երբ  պետական համակարգը ռեստարտի կարգավիճակում է,տարածքային կառավարման մարմինների գործունեությունը և ներկայությունը խիստ անհրաժեշտություն է,պետք է փոխել  ուղղակի գործունեությունների տրամաբանությունը:

«Մարզպետարանները սովորական փոստատարի դեր կատարելուց բացի ,պետք է  իրապես որոշակի հարցերում,համայնքների հետ քննարկումներում  բանավեճերում ,համագործակցության արդյունքում մշակեն զարգացման սխեմաներ և գործողությունների պլանը կբերի տարածքների զարգացման»,-ասել է գլխավոր քարտուղարը:

Արսեն Աբրահամյանը անդրադարձել է նաև օպտիմալացման արդյունքում մարզպետարանի աշխատակիցների կրճատման խնդրին,նշելով,որ որպես այդպիսին մարզպետարաններում աշխատակազմերը ուռճացված չեն և համապատասխանում են իրականացվող գործառույթներին:

«Իրապես էնպես չի ,որ մարզպետարանների ստեղծման օրվանից հաստիքները շատ էին ,հիմա քննարկումների արդյունքում մենք ձգտում ենք և փորձում ենք անել այնպես,որ էդ օպտիմալացման ձգտման մեջ էնպես չլինի,որ անցնի եզրագիծը,որը իսկապես օպտիմալն է,կարող է ՝ էդ կրճատումների ժամանակ ստացվի,որ գործառույթները շատ են,իսկ աշխատակազմը չի բավարարում,բայց նախնական տարբերակով նախատեսվում է ներկայիս 7 վարչությունների  փոխարեն  մարզպետարաններում օպտիմալացումից հետո թողնել 4-ը»,-նշել է Շիրակի մարզպետարանի պաշտոնյան: