Ինչո՞վ կառաջնորդվեն մարզիկներին տարկետում տալիս. նախագիծ

Պաշտպանության նախարարությունը ներկայացրել է նախագիծ, որով սահմանվում է, թե ինչպիսի մարզական հաջողությունների հասնելու դեպքում սպորտսմենները կարող են հավակնել պարտադիր զինծառայությունից տարկետում ստանալուն։ Ե՛վ Արթուր Ալեքսանյանը, և՛ Հենրիխ Մխիթարյանը համապատասխանում են այդ չափանիշներին։

Իսկ առհասարակ, նախագծում հիշատակված չափանիշներին համապատասխանող մարզիկներն են.

• Oլիմպիական մարզաձևերի աշխարհի կամ Եվրոպայի առաջնություններում (մեծահասակների կամ երիտասարդների կամ պատանիների) 1-5-րդ տեղեր  գրաված ու առնվազն մեկ հաղթանակ տարած մարզիկները,
• Oլիմպիական խաղերում  1-5-րդ տեղեր  գրաված ու առնվազն մեկ հաղթանակ տարած մարզիկները,
• Oլիմպիական մարզաձևերի եվրոպական խաղերում  1-5-րդ տեղեր  գրաված ու առնվազն մեկ հաղթանակ տարած մարզիկները,
• Պատանեկան օլիմպիական խաղերում  1-5-րդ տեղեր  գրաված ու առնվազն մեկ հաղթանակ տարած մարզիկները,
• Համաշխարհային ունիվերսիադայում 1-5-րդ տեղեր  գրաված ու առնվազն մեկ հաղթանակ տարած մարզիկները,
• Առաջիկա օլիմպիական կամ պատանեկան օլիմպիական խաղերի մասնակցության վարկանիշ ձեռք բերած մարզիկները,
• Շախմատի համաշխարհային օլիմպիադայում 1-5-րդ տեղերը գրաված ու առնվազն մեկ հաղթանակ տարած մարզիկները,
• Շախմատի համաշխարհային պատանեկան օլիմպիադայում 1-3-րդ տեղերը գրաված  և առնվազն մեկ հաղթանակ տարած մարզիկները,
• Թենիս մարզաձևում Դևիսի գավաթի խաղարկությանը 1-5-րդ տեղեր  գրաված ու առնվազն մեկ հաղթանակ տարած մարզիկները,
• Թենիս մարզաձևում Եվրոպայի գավաթի խաղարկությանը 1-5-րդ տեղեր  գրաված ու առնվազն մեկ հաղթանակ տարած մարզիկները,
• Ոչ օլիմպիական մարզաձևերից ուշու (բացառությամբ կատա-ների), սամբո մարզաձևերի աշխարհի կամ Եվրոպայի մեծահասակների կամ երիտասարդների առաջնությունում կամ եվրոպական խաղերում կամ համաշխարհային ունիվերսիադայում 1-3-րդ տեղերը գրաված ու առնվազն մեկ հաղթանակ տարած մարզիկները,
• Ոչ օլիմպիական մարզաձևերից ուշու (բացառությամբ կատա-ների), սամբո մարզաձևերում աշխարհի կամ Եվրոպայի պատանիների առաջնությունում 1-2-րդ տեղերը գրաված  և առնվազն մեկ հաղթանակ տարած մարզիկները,
• Հայաստանի Հանրապետության ֆուտբոլի ազգային հավաքականների (պատանեկան, երիտասարդական և մեծահասակների) անդամ հանդիսացող մարզիկները, սակայն ոչ ավելի, քանի յուրաքանչյուր հավաքականից՝ 22 մարզիկ,
• Օրենքով սահմանված կարգով Հայաստանի քաղաքացիություն ստացած և Հայաստանի դրոշի ներքո միջազգային առաջնություններին մասնակցող մարզիկները:

Մարզիկներին տարկետում տալու համար դիմումներ պետք է ներկայացնեն կա՛մ նրանց մարզաձևի ֆեդերացիան, կա՛մ հենց մարզիկները։ Դիմումին կից պետք է ներկայացնել նաև սպորտի բնագավառում նշանակալի նվաճումները հաստատող և այլ փաստաթղթեր։

Դիմումների հիման վրա սպորտի և երիտասարդության հարցերի նախարարությունը պետք է քննի այս գործերը։ Նախարարության դրական եզրակացության դեպքում մարզիկին տարկետում տալու որոշման նախագիծն ուղարկվում է կառավարություն, որի հիման վրա էլ վերջինս կարող է պարտադիր զինծառայությունից տարկետում տալ։

Այս չափանիշներին բավարարելու դեպքում մարզիկներին տարկետումը տրվում է 4 տարի ժամկետով։ Ինչպես և երիտասարդ գիտնականների դեպքում, մարզիկներին երկրորդ անգամ տարկետում տալու դիմումը քննելու ժամանակ հաշվի չեն առնվելու այն նվաճումները, որոնք ներկայացվել են առաջին անգամ տարկետում ստանալիս։