Ի՞նչ նպատակներ պետք է իրագործի Արցախը. Արայիկ Հարությունյանը խոսել է առաջիկա քայլերի մասին

Արցախի նախագահ Արայիկ Հարությունյանն ուղերձում անդրադարձել է այն խնդիրներին, որոնց առջև կանգնած է Արցախը, և նպատակներին, որոնք պետք է իրագործվեն։

Նա առանձնացրել է սոցիալ-տնտեսական զարգացմանը և օտարերկրյա ներդրումների ներգրավմանը միտված արտաքին քաղաքականությունը, ինչի շնորհիվ պետք է միջազգային մեկուսացումը վերացվի նաև տնտեսական առումով:

Հարությունյանը նկատել է, որ Արցախը վիրավոր է ոչ միայն մարդկային ու տարածքային կորուստների, այլ նաև ծագած բազմաթիվ և սուր մարդասիրական հիմնախնդիրների պատճառով՝ անհետ կորածներից ու գերիներից մինչև կացարաններ ու ավերված շինություններ, սոցիալական ապահովությունից մինչև հոգեբանական տրավմաներ: Ուստի, ի լրումն նախապատերազմյան ժամանակաշրջանում առկա մարտահրավերների ու կարիքների՝ այժմ ձևավորվել են հսկայական ծավալի նոր կարիքներ, ինչը ենթադրում է պետական իշխանության ավելի արդյունավետ ու պատասխանատու աշխատանքի անհրաժեշտություն:

«Մենք պետք է առաջին հերթին կարճ ժամանակահատվածում լուծենք մեր անօթևան քաղաքացիների կացարանների ու նվազագույն սոցիալական պայմանների ապահովման խնդիրները: Դրան զուգահեռ ու հատկապես դրանից հետո խնդիր ենք ունենալու բարենպաստ պայմաններ երաշխավորելու մեր բոլոր քաղաքացիների կյանքի որակի բարձրացման ու Հանրապետության սոցիալ-տնտեսական զարգացման համար»:

Ինչպես նշեց նախագահն, այդ տեսանկյունից նախատեսվում են մի շարք ծրագրեր, մասնավորապես մտադրություն կա Հայաստանի Հանրապետության հետ համատեղ կատարել առավելագույնը բոլոր գերիներին տուն վերադարձնելու ուղղությամբ, ինչպես նաև ակտիվորեն շարունակել զոհվածների մարմինների ու անհետ կորածների որոնողական աշխատանքները, կարճ ժամկետում կարգավորել անօթևան քաղաքացիների ժամանակավոր կացարանների խնդիրը՝ թե՛ տարբեր շինություններում կենտրոնացված տեղավորման, թե՛ բնակվարձի պատշաճ փոխհատուցման, թե՛ արագ բնակարանաշինության և հնարավոր այլ ծրագրերի միջոցով։

Հարությունյանը նշել է նաև, որ նպատակադրվել են երեք տարում բոլոր անօթևաններին ապահովել բնակարանային պայմաններով, առաջիկա երեք տարում քաղաքացիների փոխարեն վճարել իրենց հիփոթեքային վարկերի գումարներն ու դրանց տոկոսները, զգալի աջակցություն ցուցաբերել ֆիզիկական ու իրավաբանական անձանց վարկերի սպասարկման մասով։

Նախատեսվում է նաև էականորեն մեծացնել շինանյութերի հատկացման ծրագիրը՝ գյուղերի բնակֆոնդի պայմանների բարելավման նպատակով։

Նա խոսել է նաև անօթևան քաղաքացիների բնակվարձի փոխհատուցման ծրագրի, ոչ զինապարտ արցախցիներին ցուցաբերվող միանվագ ֆինանսական աջակցության ծրագիրը շարունակելու մասին, անօթևան քաղաքացիներին դրամական օժանդակություն ցուցաբերելու, գազի, էլեկտրաէներգիայի, կապի ֆիքսված ծավալների սպառումը և այլ կոմունալ ծախսերն առնվազն մեկ տարի սուբսիդավորելու, հարկային համաներում սահմանելու և հարկային լայն արտոնություններ տրամադրելու, պատերազմի հետևանքով առաջացած նյութական վնասները փոխհատուցելու և բոլոր գյուղեր տանող ճանապարհները ասֆալտապատելու մասին։

Արցախի նախագահը կարևորել է Արցախի ինքնորոշման իրավունքի իրացման փաստի ճանաչումը։