«Սա պրինցիպի հարց է, ես չեմ պահանջել հանրային պաշտպան». Կարո Եղնուկյանը բանավիճում է դատավորի հետ

ՊՊԾ գնդի գրավման գործով դատաքննություն ժամանակ պաշտպանների ներգրավման հարցում այսօր հերթը հասավ Կարո Եղնուկյանին: Դատավոր Արտուշ Գաբրիելյանի  և ամբաստանյալ  Կարո Եղնուկյանի միջև, թվում էր,մինչև անվերջություն ձգվող բանավեճ էր սկսվել:

Ամբաստանյալ Կարո Եղնուկյան – Ես ունեմ ֆինանսական միջոցներ և հրաժարվում եմ հանրային պաշտպաններից:

Դատավոր Արտուշ Գաբրիելյան–  Ձեզ համար հանրային պաշտպան է նշանակվել այն ժամանակ, երբ որ դուք դատարանին անհարգալից վերաբերվելու համար սանկցիայի էիք  ենթարկվել:

Ամբաստանյալ Կարո Եղնուկյան – Սանկցիան եղել է  անօրինական, քանի որ դուք ինձ նախազգուշացում չէիք արել, ուստի հանրային պաշտպանի նշանակումն էլ անօրինական էր:Սա պրիցիպի հարց է, ես չեմ պահանջել հանրային պաշտպան, դուք շատ սխալ եք  արել, որ հանրային պաշտպան եք  նշանակել, ես չեմ ցանկանում, որ ինձ հանրային պաշտպան պաշտպանի:

Դատավոր Արտուշ Գաբրիելյան – Արձանագրե՞նք,որ դուք հրաժարվում եք  պաշտպանից: 

Ամբաստանյալ Կարո Եղնուկյան  – Եթե ես ասեմ,որ հրաժարվում եմ,ուրեմն ընդունել եմ: Սա  բառախաղ չի,  մենք իրավաբաններ ենք: Ես  չեմ  ընդունել,որ հիմա հրաժարվեմ: Ես անցյալ անգամ էլ  ասացի՝ եվրոպական կոնվենցիան գերադասվում է Հայաստանի  օրենքներին և այստեղ կա  հակասություն: Եվրոպական կոնվենցիան ասում է՝ եթե մեղադրյալը  անվճարունակ է, նա կարող է… չեմ հիշում, պահանջել ոնց  որ, հանրային պաշտպան: 

Հայաստանի օրենքները  հակասում  են եվրոպական  կոնվենցիային, դուք շատ լավ գիտեք,  որ երբ որ եվրոպական  կոնվենցիայի  օրենքները հակասում են մեր օրենսդրությանը, ապա գերադասվում են  կոնվենցիայի օրենքները: Երբ որ դուք  նշանակում եք  առանց  իմ համաձայնության պաշտպանի, դուք  խախտւմ եք օրենքը:

Դատավոր Արտուշ Գաբրիելյանը, այդուհանդերձ, հանրային պաշտպաններ Լուսինե Ասլանյանին և Անուշ Մխիթարյանին ներգրավեց քրեական գործի վարույթ:

Ամբաստանյալ Կարո  Եղնուկյանը լքեց նիստերի դահլիճը ի նշան բողոքի: Նրա  հետևից անմիջապես պատաստվում էր հեռանալ պաշտպան Տիգրան Հայրապետյանը.

«Ես հայտարարում եմ, որ սա աննախադեպ բան է, որ պետությունը պարտադրում է ունենալ դատավորի նշանակած  պաշտպանը, էն դեպքում ,երբ ամբաստանյալն ունի գումար և 2 պաշտպան: Ես սա դիտում եմ որպես  ոտնձգություն պաշտպանական իրավունքի դեմ:Նման որոշումը նշանակում  է,որ դատարանը կանխակալ  է, և որոշումները  չեն կայացվում դատարանի կողմից»,-հայտարարեց պաշտպանը: 

Դատարանը չհասցրեց որոշում կայացնել փաստաբանի վարքագծի վերաբերյալ, բայց հասցրեց 10 ժամով Եղնուկյանին զրկել դատական նիստերին մասնակցելու հնարավորությունից: Իրավիճակը փրկեց  հանրային պաշտպան Անուշ Մխիթարյանը:

Նա ժամանակ խնդրեց  դատավորից՝ իր  10 պաշտպանյալների հետ տեսակցելու, անկախ նրանից նրանք ընդունում են իրեն թե ոչ՝ համաձայնեցնելու  պաշտպանական ռազմավարությունը: 

Այս անգամ  նիստը հետաձգելու՝ պաշտպանական կողմի հերթական փորձն ավարտվեց հաջողությամբ:Դատավորը հետաձգեց գործի քննությունը մեկ շաբաթով:

 – Դուք էլ եք չէ՞ զարմանում, որ հետաձգում եմ:Եթե անհրաժեշտութուն կա՝ հետաձգում եմ: Թե չէ առավոտյան նիստը սկսվում  է, ասում եք՝  եկեք  հետաձգենք,-  ասաց  դատավոր Արտուշ Գաբրիելյանը: