Ֆրանսիացի բժիշկները Գյումրիում վիրահատում են պատերազմում վիրավորում ստացած զինվորներին

Ֆրանսիացի առաջատար բժիշկների խումբը «Գյումրի» բժշկական կենտրոնի մասնագետների հետ վիրահատություններ է կատարելու հրազենային ու բազմաբեկորային  վիրավորումներ ստացած զինվորների համար, կվիրահատվեն հիմնականում վերին ու ստորին վերջույթների ֆունկցիոնալ խանգարումներ ունեցողները։ Այսօր կենտրոնում բժիշկները կատարել են առաջին վիրահատությունները։

Մինչ վիրահատությունը հայ և ֆրանսիացի բժիշկների խումբը ուսումնասիրու են գործիքային հետազոտության արդյունքները, որոնք կատարվել են մեկ օր առաջ, համակարգչային տոմոգրաֆիայի ստացած լուսապատկերներով հստակեցնում են կատարվող վիրահատական միջամտության  մանրամասներն ու մեթոդները։ Պատերազմում վիրավորում ստացած զինծառայողի ձախ ոտքն են վիրահատելու։

«Հիվանդի մոտ ոսկրային  դեֆեկտը հնարավոր է լրացնել կոնքից վերցված ոսկրային տրանսպլանտատով, որով նպաստելու ենք թաթային հոդի անշարժացմանը։ Վիրահատությունն այս դեպքում պարտադիր է ոսկորի սերտաճումը կանխելու համար, բուժման ու վերականգնման ընթացքը կլինի մի քիչ դժվար, մեր նպատակն է տղայի մոտ քայլքը դարձնել անցավ»,- նշել է ֆրանսիացի օրթոպեդ-վիրաբույժ Վերոնիկ Մոլինան։

Պայմանագրային զինծառայող, 28-ամյա Լևոն Երանոսյանը վիրավորվել է Ջաբրայիլում։ Արկի պայթյունից առաջացած ալիքը հրետանավորին մի քանի մետր հեռու է շպրտել, գետնին հարվածի հետևանքով ստացել է ձախ ոտքի բազմաբեկորային կոտրվածքներ։ Մինչ այս վիրահատության չի ենթարկվել, ոտքից բացի, վնասվածքներ ունի նաև ձեռքերի շրջանում, բեկորներից շատերը դեռ մնում են ձեռքի մեջ։

Բժիշկները Լևոնի վիրահատությունը գնահատեցին միջին բարդության և այն կատարեցին տեղային անզգայացմամբ։ Վստահ են, որ հետագայում առանց հենակների օգնության ինքնուրույն քայլել կկարողանա, իսկ աճառների ֆունկցիոնալության վերականգնման համար դեռ ժամանակ է պետք։

Ժամկետային զինծառայող, 20-ամյա Էդվարդը դիպուկահար է եղել, վիրավորվել է Ջաբրայիլում։ Լևոնից հետո բժիշկները վիրահատելու էին Էդվարդի ձեռքը։ Մինչ այս  երկու բարդ վիրահատություններ տարել է  Ստեփանակերտում ու Երևանում։ Վիրահատական միջամտությամբ բացելու են ծալված մատները, բայց տղայի ձեռքի երկու մատների շարժունակությունը վերականգնել բժիշկներին չի հաջողվի։

«Փամփուշտն անցել է ձեռքի միջով, մատները չեն գործում, ունի ոսկրերի խնդիր։ Մինչ այս միջամտություն են արել, շյուղերով, հատուկ ցեմենտով ամրացրել են, բայց այդ երկու մատները չեն գործում։ Հիմա փորձելու ենք վերականգնել մատների դիրքը, որ ծալված վիճակից բացվեն, բայց  ֆունկցիոնալությունը չի վերականգնվի»,- զինվորի վիրահատության մանրամասներն է ներկայացրել ֆրանսահայ վիրաբույժ Վիգեն Եգանյանը։

Ֆրանսիացի օրթոպեդ-վնասվածքաբանները ևս մի քանի օր կմնան Գյումրիում, կվիրահատեն վերին ու ստորին վերջույթների վիրավորումներ և ինքնուրույն տեղաշարժման խնդիրներ ունեցող ևս 10 զինծառայողների։

Անհրաժեշտության դեպքում մասնագետները կկիրառեն նաև վիրաբուժական նոր մեթոդներ։ Վիրահատված բոլոր տղաները «Գյումրի» բժշկական կենտրոնում կանցնեն նաև հետվիրահատական բուժման կուրս և կգտնվեն բժիշկ-վնասվածքաբանների մշտական հսկողության տակ։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև Shant Digital Tv հավելվածով՝ ամբողջ աշխարհում։