Եթե ես չլինեի, ապա Արմեն Ջիգարխանյանը հիմա ողջ չէր լինի. Վիտալինա Ցիմբալյուկ-Ռոմանովսկայա

ԽՍՀՄ ժողովրդական արտիստ Արմեն Ջիգարխանյանի նախկին կինը՝ Վիտալինա Ցիմբալյուկ-Ռոմանովսկայան, «Թող խոսեն» թոք շոուի ժամանակ կրկին խոսել է նախորդ տարվա հոկտեմբերից մինչև օրս շարունակվող ընտանեկան սկանդալի մասին: Ցիմբալյուկն ու Ջիգարխանյանն ամուսնալուծվել են անցած տարվա նոյեմբերին:

Վերջին երեք ամսում «Թող խոսեն»-ին տված առաջին հարցազրույցում 39-ամյա Վիտալինա Ցիմբալյուկը տվել է մի շարք հարցերի պատասխաններ:

Իր և Արմեն Ջիգարխանյանի սիրո մասին

Ես նրան հաստատ սիրել եմ, բայց սիրե՞լ է արդյոք Արմեն Բորիսովիչն ինձ, այս հարցին դժվարանում եմ պատասխանել: Կարծում եմ, որ նա պարզապես իմ կարիքն ուներ: Նա միայնակ էր ապրում և երկրորդ կաթվածից հետո ֆիզիկապես չէր կարողանում նորմալ շարժվել: Ինձ թվում է՝ նա այդ ժամանակ սովորեց իմ ներկայությանը, իմ հոգատարությանը: Ես հիմա կարծում եմ, որ նա օգտագործում էր ինձ:

Ես 21 տարեկան էի, երբ սկսվեց մեր սիրավեպը, իսկ հիմա ես 39 եմ: Ես ուզում եմ հասկանալ՝ իմ մեղավորությունը ո՞րն է: Պատրաստ էի նրա հետ ապրել, ես երկարացնում էի նրա կյանքը: Եթե նրա կողքին չլինեի, ապա, կներեք, Արմեն Ջիգարխանյանը նույնպես չէր լինի, և մենք այստեղ այսպես չէինք նստի ու չէինք քննարկի այս ամենը: Ես նրա համար ամեն ինչ էի՝ բուժքույր, վարորդ, գործավարուհի, վերջիվերջո, օգնում էի  ղեկավարել թատրոնը: Կարծում եմ, որ նման բաներն այդքան ժամանակ կարելի է միայն սիրելով անել:

Խանդի և դավաճանության մասին

Չնայած տարիքային տարբերությանը, այնուամենայնիվ, ես նրան խանդելու առիթ չեմ տվել:  Վստահ եմ՝ եթե ինչ-որ առիթ տված լինեի, ապա մենք այժմ այլ կերպ կանդրադառնայինք այդ թեմային:

Թատրոն այցելելու արգելքները

Չգիտեմ՝ նա ինչ վիճակում է այդպիսի բաներ ասել, բայց վստահեցնում եմ, որ ես երբևէ այդպիսի հրաման չեմ տվել: Բացառված է, որ ես Արմեն Ջիխարխանյանի անվան թատրոն չթողնեմ, որ մուտք գործի հենց ինքը՝ Արմեն Ջիգարխանյանը, առավել ևս, նա իմ ամուսինն է ու մենք կռված չենք եղել: Չգիտեմ՝ ինչու է այդպիսի բաներ ասում, բայց ես վստահեցնում եմ, որ չի եղել դեպք, երբ Արմեն Բորիսովիչը ուզենա մտնել իր թատրոն, և անվտանգության ներկայացուցիչները նրան չթողնեն:

Թատրոնի կոլեկտիվի մասին

Ես էլ երբեք չեմ գնա թատրոն, քանի որ վիրավորված եմ թատրոնի անձնակազմից: Թատրոնի դերասաններին աշխատանքից հեռացնելու բոլոր հարցերը լուծվել են Արմեն Բորիսովիչի կողմից, նա է որոշել: Ես դերերի բաշխման քաղաքականությամբ երբեք չեմ զբաղվել և այդ գործին չեմ էլ խառնվել: Պարզապես կարծում եմ, որ դերասաններին հարմար չէ ասել, որ իրենց աշխատանքից հեռացրել է Արմեն Ջիգարխանյանը, դա ամոթալի փաստ է յուրաքանչյուր դերասանի համար: Այդ պարագայում ավելի հարմար է ասել, որ Ջիգարխանյանի երիտասարդ և քմահաճ կինն է մեզ հեռացրել:

Որտե՞ղ են միլիոնները

Ի՞նչ գումարի մասին է խոսքը: Լավ, հիմա ևս մեկ անգամ բացատրեմ: Ուրեմն Արմեն Ջիգարխանյանի թատրոնը պետական է, գումարները բյուջետային են, և այդ գումարները հնարավոր չէ տեղափոխել օֆշորային հաշիվներ, դրանք առհասարակ ուրիշ ոչ մի տեղ հնարավոր չէ փոխանցել: Այդ թատրոնում գողանալու ոչինչ չկա, և եթե ինչ-որ մեկը ցանկանում է Ջիգարխանյանի թատրոնի փողերը լվանալ, ապա ասեմ, որ դա հնարավոր չէ, մի՛ գնացեք այնտեղ այդ նպատակով աշխատելու: