Ավարտվել են Արցախի 2020 թվականի պետբյուջեի կատարողականների քննարկումներն ԱԺ մշտական հանձնաժողովների նիստերում

Հունիսի 4-ին հրավիրվել է ԱԺ պետական-իրավական հարցերի և ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստ, որը վարում էին հանձնաժողովների նախագահներ Սևակ Աղաջանյանը և Արթուր Հարությունյանը:

Ներկայացվել են ԱՀ նախագահի աշխատակազմի, ԱՀ ԱԺ աշխատակազմի, ԱՀ նախագահի աշխատակազմի կառավարության գործերի, արդարադատության նախարարության, բարձրագույն դատական խորհրդի, դատախազության, քննչական կոմիտեի, հաշվեքննիչ պալատի, մարդու իրավունքների պաշպանության, քաղաքացիական ծառայության խորհրդի, կենտրոնական ընտրական հանձնաժողովի 2020 թվականի պետական բյուջեի կատարողականները:

Արցախի Հանրապետության նախագահի աշխատակազմի ղեկավարի տեղակալ Մանվել Բաբաջանյանը ներկայացմամբ՝ աշխատակազմի 2020թ. պետական բյուջեով նախատեսված 619 մլն 229 հազար դրամից ծախսվել է 540 մլն 271 հազար դրամ, կամ 87,3%-ը: Տնտեսումը կազմել է 78 մլն 958 հազար դրամ:

Արցախի Հանրապետության Ազգային ժողովի բնականոն գործունեությունն ապահովելու համար, աշխատակազմի ղեկավարի տեղակալ Գարիկ Ժամհարյանի փոխանցմամբ, պետական բյուջեից նախատեսվել է 692 մլն 632,7 հազար դրամ, կատարողականը՝ 658 մլն 390 հազար դրամ, կամ՝ 95,0%-ը:

ԱՀ նախագահի աշխատակազմի կառավարության գործերի կառավարչությանը 2020 թվականին պետական բյուջեից հատկացվել է 365 մլն 664 հազար դրամ: Նախագահի աշխատակազմի կառավարության գործերի կառավարչության պետ Արայիկ Լազարյանի ներկայացմամբ՝ բյուջեի կատարողականը կազմել է 305 մլն 207 հազար դրամ, կամ նախահաշվի 83,5%-ը:

Ներկայացնելով Արդարադատության նախարարության բյուջեի կատարողականի վերաբերյալ հաշվետվությունը՝ նախարար Ժիրայր Միրզոյանը նշել է, որ նախարարությանը ճշտված պլանով հատկացված էր 466 մլն 515,0 հազար դրամ, կատարողականը՝ 396 մլն 779,8 հազար դրամ, կամ՝ 85,1%-ը:

Բարձրագույն դատական խորհրդի նախագահ Գայանե Գրիգորյանի հաշվետվության համաձայն՝ դատական համակարգի ծախսերի համար պետական բյուջեից հատկացվել է 648 մլն 446,1 հազար դրամ, որից փաստացի ծախսվել է 584 մլն 960,0 հազար դրամ, կամ՝ 90,2%-ը:

Գլխավոր դատախազի տեղակալ Նարեկ Հարությունյանի փոխանցմամբ՝ դատախազությունը հաշվետու տարում գրանցել է հատկացված միջոցների զգալի խնայողություն՝ 65 մլն 387,5 հազար դրամի չափով: Ընդհանուր՝ հաշվետու տարում գլխավոր դատախազությանը հատկացված 562 մլն 888,9 հազ դրամից դրամարկղային ծախսերը կազմել են 497 մլն 501,4 հազար դրամ, փաստացի ծախսերը՝ 494 մլն 419,1 հազար դրամ:

Քննչական կոմիտեի նախագահ Իգոր Գրիգորյանի փաստմամբ՝ հաշվետու տարում քննչական կոմիտեի պահպանման համար պետական բյուջեից հատկացվել էր 341 մլն 729,4 հազ դրամ, որից փաստացի ֆինանսավորվել է 287 մլն 462,546 հազար դրամ, կատարողականը կազմել է 84,1 տոկոս:

Պետական բյուջեով Հաշվեքննիչ պալատի պահպանման համար, պալատի անդամ Շուշանիկ Հայրապետյանի ներկայացմամբ, նախատեսվել էր 156 մլն 272 հազար դրամ, փաստացի ծախսվել է 132 մլն 920 հազար դրամ, կատարողականը կազմել է 85,1 տոկոս:

Մարդու իրավունքների պաշտպանի գրասենյակի ծախսերը նախատեսված էր 60 մլն 299 հազ դրամի չափով: Եվս 4 մլն 510 հազար դրամ հատկացվել է երեխաների պաշտպանության հետազոտության ծրագրով: Փաստացի ծախսվել է 55 մլն 453 հազար դրամ, կատարողականը՝ 92 տոկոս:

Քաղաքացիական ծառայության խորհրդի պահպանման ծախսերը նախատեսված էր 103 մլն 716 հազար դրամի չափով, փաստացի ծախսվել է 96 մլն 451 հազար դրամ:

Կենտրոնական ընտրական հանձնաժողովի 2020 թվականի բյուջեն բաշխվել է ըստ 3 ծրագրի:

«Կառավարման մարմինների պահպանում» ծրագրով նախատեսվել էր 47 մլն 126 հազար դրամ, փաստացի ծախսվել է 39 մլն 289 հազար դրամ, կատարողականը՝ 83,4 տոկոս:

«Ընտրություններ» ծրագրով նախատեսվել էր 132 մլն 616 հազար դրամ, կատարողականը՝ 89,7 տոկոս:

«Պետական բյուջեի պահուստային ֆոնդ» ծրագրով նախատեսվել էր 100 մլն 141 հազար դրամ, կատարողականը՝ 95,9 տոկոս:

Բյուջեների կատարողականների վերաբերյալ հաշվետվություններից հետո պատգամավորները հանդես են եկել հարցադրումներով: