Կառնուտի ջրամբարում ոռոգման սեզոնի համար ջրի բավարար պաշար չկա․ ցանքատարածքները մնացել են անջուր 

Գյուղացիական տնտեսությունները Կառնուտի ջրամբարում ոռոգման ջրի դեֆիցիտի պատճառով բերքը կորցնելու վտանգի առջև են հայտնվել։ Շիրակի մարզի մի քանի գյուղերի ցանքատարածքների մեծ մասը ոռոգման սեզոնի մեկնարկից՝ մայիսից մինչև հիմա չեն ոռոգվել, այնինչ ցորենի և գարու, ինչպես նաև վաղահաս կարտոֆիլի ցանքերը գոնե մեկ անգամ պետք է ջրած լինեին։ Գյուղացիական տնտեսություններին ոռոգման ջուր չի հասնում։ Հունիսի կեսն է, բայց Կառնուտի ջրամբարում ոռոգման սեզոնի համար ջրի բավարար պաշար չկա։

Հիմնական սնուցումը Արփիի ջրամբարից է ու Ախուրյան գետի ջրերից։ 22 միլիոն խորանարդ մետր ծավալ ունեցող Կառնուտի ջրամբարը ոռոգման աղբյուր է հանդիսանում Ախուրյանի, Անիի ու Արթիկի տարածաշրջանների մոտ 7000 հա հողերի համար։ Ախուրյանի տարածաշրջանի գյուղերում հացահատիկային ու այլ մշակաբույսերի ցանքատարածքների մեծ մասը մինչ հիմա առաջին ջուր չի ստացել․

«Գյուղացու գործը սեզոնի հետ կապված գործ է, որ ուշացավ, ուրեմն վերջ։ Դաշտերը մայիսի սկզբներին պտի ջրած էղնեինք, որ կտորըմ բերք հանեինք»։

«Մենակ մեր գյուղը չէ, որ խնդիր ունի․ Ազատանն է, Այգաբացը, Ղարիբջանյանը, բոլոր հարակից գյուղերն ունեն նույն խնդիրը․ մոտավորապես 10․000 հա տարածքի մասին է խոսքը»,- իրար լրացնելով՝ դժգոհում են Արևիկ գյուղի հողատերերը։

 Գյուղացիական տնտեսությունները վերջին տասն օրերին ամեն օր ջուր են ուզել ջրբաժանից, ջրբաժանն էլ ամեն անգամ նույն պատասխանն է տվել, թե Կառնուտի ջրամբար ջուր չի լցվում։ Հացահատիկային մշակաբույսերի ոռոգման ճիշտ ժամանակը գյուղացիական տնտեսությունները բաց են թողել: Ցորենն ու գարին արդեն մեկ անգամ  պետք է ջրած լինեին։ 

 Արևիկի ու հարակից գյուղերի հողատերերը ջրի խնդիրը մի քանի օր առաջ ներկայացրել են Շիրակի մարզպետարանում։ Թե ինչու մինչև հիմա ջուր չի կուտակվել Կառնուտում, պատճառներ ու պարզաբանումներ չեն տրվել, միայն վստահեցրել են, որ հարցն արդեն կարգավորվել է։ 

«Մարզպետարանից մեզ ասել են, որ մինչ երեկո հարցը կարգավորվելու է, և ամենաուշը առավոտյան մենք էդ խնդիրը էլ չենք ունենալու»,- նշում են գյուղատնտեսները։

Հարևան գյուղի հողերն էլ նույն անջուր վիճակում են։ Կառնուտի ջրամբարին ամենամոտ գտվող համանուն Կառնուտ գյուղի հացահատիկային մշակաբույսերի, կարտոֆիլի ու  ճակնդեղի դաշտերը մնացել են անձրևի հույսին, բայց դա էլ օրերով չեն տեսնում։ 

«Ես հազիվ հլը 2 հա եմ ջրել, չգիտեմ, թե էն 6 հա ցորենս էլ ինչղ պտի ջրեմ։ Ջուր էլ որ էղնի, արդեն օգուտ չի տա։ Գիշեր-ցերեկ անընդհատ ահազանգում ենք»,- ասում են  կառնուտցի գյուղատնտեսները։

Ահազանգերն հասել են նաև Շիրակ ջրօգտագործողների ընկերություն, որտեղ ևս հստակ պարզաբանումներ ֆերմերներին ու գյուղացիական տնտեսություններին չեն տվել։ Ջուր չկուտակելու պատճառը, ըստ հողատերերի ունեցած տեղեկությունների, հէկերից մեկն է, որին ջուր տալու հետևանքով, Կառնուտում անցած տարվա նույն ժամանակահատվածի համեմատ՝ շուրջ 9 մլն խորանարդ մետրով պակաս ծավալի ջուր կա հիմա։

Ջրօգտագործողների ընկերության նորանշանակ ղեկավար Խաչատուր Խաչատրյանը Shantnews-ին հայտնեց, որ այս պահին ջրամբարում ջուր է բաց թողնվում ՝ վայրկյանում 5000 մ խորանարդ չափով։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։