Էրդողանը խոսել է ՌԴ-ի կողմից Զանգեզուրի միջանցքին չխոչընդոտելու և Ադրբեջանում ռազմաբազա կառուցելու մասին

Թուրքիայի նախագահ Ռեջեփ Թայիփ Էրդողանը հայտարարել է, որ դրական է համարում Ռուսաստանի վերաբերմունքը Ղարաբաղում Զանգեզուրի միջանցք ստեղծելու նախագծի վերաբերյալ և Մոսկվայի կողմից դրան խոչընդոտելու մտադրություն չի տեսնում: ТАСС գործակալության փոխանցմամբ՝ այս մասին Էրդողանը լրագրողներին ասել է Ադրբեջանից վերադառնալուն պես:

«Մենք շատ կարևոր ենք համարում Զանգեզուրի միջանցքի նախագիծը և աջակցում ենք դրան: Ես չեմ գտնում, որ Ռուսաստանը կարող է որևէ տարաձայնություն ունենալ այս առնչությամբ կամ մտադրություն ունենալ հետաձգել դրա իրականացումը: Ընդհակառակը, Ռուսաստանը շատ բարյացակամ է տրամադրված միջանցքի հարցում»,- ասել է Թուրքիայի նախագահը:

Էրդողանը նշել է, որ շուտով Ադրբեջանի նախագահ Իլհամ Ալիևը բանակցություններ է ծրագրում Ռուսաստանի ղեկավար Վլադիմիր Պուտինի հետ:

«Շուտով ես նույնպես կհանդիպեմ Պուտինի հետ»,- հայտնել է Թուրքիայի նախագահը:

Ռուսաստանի նախագահի մամուլի ծառայությունը դեռ չի հայտարարել նման հանդիպման պլանների մասին:

«Կա մեկ ասպեկտ. այժմ մենք սահմանափակվում ենք (Ղարաբաղում զինադադարի մասին) համաձայնագրի հնգամյա ժամկետով: Եվ մենք կցանկանայինք իրականացնել տվյալ նախագիծը այս հնգամյա համաձայնագրի շրջանակներում»,- ասել է Էրդողանը։

Նա կրկին հիշեցրել է Անկարայի և Բաքվի նախաձեռնության մասին՝ ստեղծել Ղարաբաղի հարցով վեցակողմ հարթակ՝ Ռուսաստանի, Թուրքիայի, Ադրբեջանի, Իրանի, Հայաստանի և Վրաստանի մասնակցությամբ։

«Այս համատեքստում առաջատար երկրներն են Ռուսաստանը, Թուրքիան, Ադրբեջանը և Իրանը: Սակայն մենք ուզում ենք, որ Վրաստանը և Հայաստանը նույնպես միանան»,- ասել է Թուրքիայի ղեկավարը:

Նա նշել է, որ Վրաստանի կողմից դրական վերաբերմունք կա ծրագրին մասնակցելու վերաբերյալ:

Գործակալությունը հաղորդում է, որ լրագրողների հետ զրույցի ժամանակ Էրդողանը նաև չի բացառել, որ Շուշիում Ադրբեջանի հետ ստորագրված հայտարարության շրջանակներում կարող է խոսք գնալ ադրբեջանական տարածքում Թուրքիայի ռազմաբազայի ստեղծման մասին։

«Դա (բազայի ստեղծման տարբերակը) դուրս չի գալիս (հռչակագրի) դրույթներից: Այս հարցի զարգացումը հնարավոր է: Այս թեման կարող է իր զարգացումը ստանալ Ադրբեջանի նախագահ Իլհամ Ալիևի և ՌԴ նախագահ Վլադիմիր Պուտինի միջև խորհրդակցությունների ընթացքում: Եվ մեր բանակցությունների ընթացքում նույնպես դա կարող է իրականացվել իր ձևով»,- ասել է նա՝ պատասխանելով Ադրբեջանում թուրքական ռազմաբազայի ստեղծման հավանականության վերաբերյալ հարցին:

Էրդողանը հունիսի 15-16-ին պաշտոնական այցով գտնվում էր Ադրբեջանում, որտեղ բանակցություններ է վարել Իլհամ Ալիևի հետ, իսկ Շուշիում երկու նախագահները ստորագրել են հայտարարություն դաշնակցային հարաբերությունների վերաբերյալ, որով պայմանավորվել են պարբերաբար անցկացնել երկու երկրների անվտանգության խորհուրդների համատեղ նիստեր, համակարգել իրենց զինված ուժերի գործողությունները և օգնել միմյանց անվտանգության կամ ինքնիշխանության սպառնալիքի առաջացման դեպքում։