Գյումրիի պոլիկլինիկաներում կորոնավիրուսի դեմ պատվաստվողների թիվն ավելացել է

Կորոնավիրուսի դեմ պատվաստումների ցուցանիշը  Հանրապետությունում աճել է։ Պատվաստվել ցանկացող քաղաքացիների դիմելիությունը պոլիկլինիկաներում վերջին երկու շաբաթներին ակտիվացել է։ Զուգահեռաբար, պոլիկլինիկաներում պատվաստվում են պետական ու մասնավոր կազմակերպությունների աշխատակազմերն ու բուժաշխատողները։

Անցած երեք ամիսների ընթացքում Շիրակի մարզում պատվաստվել ցանկացողների թիվն ավելացել է, մարզի առաջնային սպասարկման բուժհաստատություններում օրական  կատարվում է մի քանի տասնյակ  պատվաստում։ Գյումրիի թիվ 1 պոլիկլինիկայում  հաշվառված 15․288  քաղաքացիներից մոտ 13 հազարը մեծահասակներ են, այսինքն՝ պոտենցիալ պատվաստման ենթակաները։

Հունիս-հուլիս ամիսներին պատվաստման ցուցանիշի էական աճի պատճառներից մեկն էլ տարբեր նպատակներով երկրից դուրս մեկնող քաղաքացիներից անցակետերում պարտադիր պահանջվող  պատվաստման հավաստագրերն են, որոնք երեք պատվաստանյութերի դեպքում էլ  տրամադրում են պոլիկլինիկաները։

«Հատուկ սերտիֆիկատ ենք տալիս դուրս գնացողներին, որ կարողանան  ներկայացնեն անցակետերում։ Պատվաստում անելուց հետո քաղաքացու հեռախոսահամարը վերցնում ենք, հեռախոսի մեջ ծրագիր կա, որով երևում է իրա պատվաստված լինելու փաստը»,- նշում է Գյումրիի թիվ 1 պոլիկլինիկայի իմունային կաբինետի պատասխանատու Սվետլանա Օհանյանը։

Անհատ քաղաքացիներից բացի, թիվ մեկ պոլիկլինիկայի շրջիկ բուժանձնակազմը նախապես հաստատված գրաֆիկով  պատվաստումներ է իրականացրել նաև տարբեր պետական կառույցներում, որտեղ, անկախ գրանցման հասցեից, կորոնավիրուսի դեմ վակցինան ստացել են բոլոր աշխատակիցներն ու փակ հաստատություններում ապրող քաղաքացիները։

Բուժաշխատողները ևս ներառված են առաջնահերթ պատվաստման ենթակա շահառուների ցանկում։ Այս ընթացքում բուժքույրերից ու բժիշկներից շատերն արդեն պատվաստվել են, հիմա ստանում են պատվաստանյութի երկրորդ չափաբաժինը։ Թիվ 1 պոլիկլինիկայի բուժանձնակազմը ևս ամբողջությամբ պատվաստվեց։

Պատվաստված  քաղաքացիներին ու գործընկերներին իմունային կաբինետի  բուժաշխատողները ևս մեկ անգամ հիշեցնում են  վակցինայի հնարավոր կողմնակի ազդեցությունների մասին, տրամադրում են տեղեկատվական  բրոշյուրներն  ու առաջացող  բարդությունների դեմ  պայքարի  խորհուրդներ տալիս։

Անցած երեք ամիսների ընթացքում  թիվ մեկ պոլիկլինիկայում պատվաստված քաղաքացիներից առողջական լուրջ խնդիրների ահազանգեր չեն ունեցել, եղած ազդեցությունները բնորոշ են եղել  պատվաստումների ընթացքին։ Նախորդ երկու ամիսներին  պոլիկլինիկայում նվազել էին կորոնավիրուսի ախտանշաններով դիմած քաղաքացիների թիվը և թեստավորման դրական ցուցանիշը։ Այս մի քանի  օրերին կրկին նկատվում է վարակվածության դեպքերի ակտիվացում։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։