Նոր զարգացումներ Արտաշատի քաղաքային մարզադաշտում աթլետիկական վազքուղու կառուցման աշխատանքներում

Արտաշատի քաղաքային մարզադաշտում այս տարի կիրականացվեն տարածքի բարեկարգման, բետոնային աշխատանքներ, կլուծվեն ջրահեռացման հետ կապված խնդիրները, իսկ հաջորդ տարվա գարնանը կտեղադրվի Աթլետիկայի ֆեդերացիաների միջազգային ասոցիացիայի կողմից հավաստագրված աթլետիկական վազքուղի:

Նման որոշում կայացվել է ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանի, Հայաստանի աթլետիկայի ֆեդերացիայի նախագահ Ռոբերտ Էմմիյանի և աթլետիկական վազքուղիների արտադրությամբ հայտնի շվեյցարական «Conica» ընկերության վաճառքի տարածաշրջանային տնօրեն Պավել Մարեշի Արտաշատ կատարած այցի ժամանակ: Վերջինս Հայաստան է ժամանել վազքուղու կառուցման աշխատանքները լավագույնս կազմակերպելու համար խորհրդատվություն տրամադրելու նպատակով: Արտաշատ համայնքի ղեկավար Կարեն Բենիամինյանի ուղեկցությամբ մարզադաշտ կատարած շրջայցի ընթացքում ծանոթանալով ներկայիս պայմաններին և հաշվի առնելով եղանակային հնարավոր փոփոխությունները՝ Պավել Մարեշն առաջարկել է մինչև տարեվերջ կատարել բետոնային և ջրահեռացման համակարգի հետ կապված բոլոր աշխատանքները, իսկ 2022 թվականի մարտին տեղադրել նոր վազքուղին:

«Աթլետիկական վազքուղու տեղադրման աշխատանքներում չափազանց կարևոր են տեխնոլոգիական ճիշտ դադարները: Բետոնային աշխատանքներից հետո անհրաժեշտ է որոշ ժամանակ սպասել՝ ծածկույթի վիճակը գնահատելու և հնարավոր փոփոխությունները կատարելու համար: Սրանք կարևոր բաղադրիչներ են միջազգային ֆեդերացիայի չափանիշներին համապատասխան ծածկույթ ստանալու համար»,- ասել է Պավել Մարեշը:

ԿԳՄՍ նախարարի տեղակալ Կարեն Գիլոյանն ընդգծել է Պավել Մարեշի՝ աթլետիկայի միջազգային ֆեդերացիայի հետ աշխատելու փորձառությունը և նշել, որ որակյալ արդյունք ստանալու համար պետք է նկատի ունենալ ոլորտի պրոֆեսիոնալների կարծիքը:

«Պավել Մարեշն աշխատում է աթլետիկայի միջազգային ֆեդերացիայի հետ, նա է համակարգելու աշխատանքները: Այս տարվա ընթացքում կիրականացվեն ոչ միայն բետոնային և ջրահեռացման բոլոր աշխատանքները, այլև կկառուցվեն աթլետիկական այլ հատվածներ՝ ցատկափոսեր, բարձրացատկի, ձողացատկի, գնդի, սկավառակի, նիզակի նետման հատվածներ: Նախնական պայմանավորվածության համաձայն՝ մարտին՝ 15 օրվա ընթացքում, կտեղադրվի աթլետիկական նոր վազքուղին: Այդպիսով՝ Հայաստանի հաջորդ առաջնությունը կկազմակերպենք աթլետիկական նոր ստադիոնում: Հայաստանի աթլետիկայի ֆեդերացիան խոստացել է, որ միջազգային չափանիշներին համապատասխան ստադիոն ունենալու դեպքում Եվրոպայի չեմպիոն կունենանք: Դա իսկապես կլինի լավագույն շնորհակալությունը»,- ասել է Կարեն Գիլոյանը:

Արտաշատի համայնքապետ Կարեն Բենիամինյանը տեղեկացրել է, որ շինարարական աշխատանքների համար մրցույթն արդեն հայտարարված է, այն կամփոփվի այս ամիս, ինչից հետո անմիջապես կմեկնարկեն աշխատանքները: Համայնքապետը վստահեցրել է՝ կանեն առավելագույնը նախանշված ժամկետից չշեղվելու համար: