Կառավարության նիստից հետո ՀՀ ֆինանսների նախարար Վարդան Արամյանը այսօր լրագրողների հետ ճեպազրույցում բացատրեց, թե ինչու կառավարությունը նպատակահարմար չգտավ հավանություն տալ զինծառայողներին գույքահարկից ազատելու արտոնությանը:
«Միայն պարտադիր զինվորական ծառայության մեջ գտնվող անձանց գույքահարկից ազատելու տրամաբանությունն այն է, որ պարտադիր զինվորական ծառայության ընթացքում անձն, իր կամքից անկախ, զրկվում է գույքն օգտագործելու կամ դրանից օգտվելու հնարավորությունից, այնպես էլ առհասարակ եկամուտներ ստանալու հնարավորությունից»,- բացատրեց Ֆինանսների նախարար Վարդան Արամյանը:
Խոսքն այն օրենսդրական առաջարկի մասին է, որը ներկայացրել էին ԱԺ «Ելք» խմբակցության պատգամավորները և որը վերաբերում էր «Գույքահարկի մասին» գործող օրենքով՝ փոփոխություններին: Պատգամավորներն առաջարկում էին ծառայության ողջ ընթացքում գույքահարկից ազատել Հայաստանի զինված ուժերում կամ միջազգային պայմանագրերով դաշնակից երկրների զինված ուժերում պարտադիր ժամկետային ծառայության մեջ գտնվող անձանց:
«Այս տարբերակով մենք ծանրաբեռնում ենք տեղական ինքնակառավարման մարմիններին, որովհետեւ գույքահարկը ՏԻՄ-երի համար եկամուտի էական աղբյուր է: Մենք ունենք ավելի նպատակային գործիք, որով խթանում ենք նորեկներին դեպի Արցախի Հանրապետության զինված ուժեր»,-ասաց նախարարը:
Ֆինանսների նախարարը հիշեցրեց նաև, որ կառավարությունը գույքահարկի արտոնություն տալիս է պարտադիր զինվորական ծառայողներին, ըստ որի՝ պարտադրանքի սկզբունքի ներքո տվյալ անձը զրկվում է իր գույքը տիրապետելուց և օգտագործելուց: Բոլոր այն դեպքերում, եթե զինծառայողը կունենա արտադրական և հասարակական նշանակության գույք և դրանից կստանա եկամուտ, տրամաբանական է, որ եկամուտից նա որպես գույքահարկ կվճարի ՏԻՄ-ին. «Խթանում ենք որակյալ սպայական անձնակազմի մուտքը դեպի ՀՀ զինված ուժեր: Դրա համար գույքահարկի արտոնություն է տրվում բոլոր այն անձանց, որոնք պարտադիր զինվորական ծառայությունից հետո բարձրագույն ռազմական ուսումնական հաստատությունում կուսուցանվեն, կունենան բարձրագույն կրթություն»,- ասաց Վարդան Արամյանը:
