Հայտնի են «ՀՀ վարչապետի գավաթ» կրոսավազքի մրցաշարի մրցանակակիրները

Ամփոփվել է Երևան-Էջմիածին ճանապարհին կայացած «Հայաստանի Հանրապետության վարչապետի գավաթ» կրոսավազքի սիրողական մրցաշարը․ 3 տարիքային խմբի մոտ 1500 մասնակից կանգնել է մեկնարկին, հաղթահարել 3 և 10 կմ մրցատարածությունն ու հասել եզրագծին։

Ինչպես տեղեկացրին ՀՀ ԿԳՄՍՆ-ից, 18-35 տարեկան տղաների պայքարում 10 կմ տարածությունը բոլորից շուտ հաղթահարել է Հայաստանի աթլետիկայի հավաքականի անդամ, վազորդ Երվանդ Մկրտչյանը՝ 10 կմ-ն վազելով մոտ 30 րոպեում։ Երկրորդ տեղը զբաղեցրել է Մհեր Մաշումյանը, իսկ պատվո հարթակի երրորդ աստիճանին կանգնել է Բալաբեկ Հարությունյանը։
18-35 տարեկան կանանց պայքարում հաղթողի կոչումը նվաճել է Էլլադա Ալավերդյանը, երկրորդը վանաձորցի Լիլիթ Հարությունյանն էր, իսկ երրորդ տեղը գրավեց Ալեքսանդրա Գալինսկին Ստեփանակերտից։

Պարգևատրման հանդիսավոր արարողությանը ներկա էին ՀՀ վարչապետ Նիկոլ Փաշինյանը, ԿԳՄՍ նախարար Վահրամ Դումանյանը, ԿԳՄՍ նախարարի տեղակալ Կարեն Գիլոյանը, Էջմիածնի քաղաքապետ Դիանա Գասպարյանը և պաշտոնատար այլ անձինք։

«Շնորհավորում եմ բոլոր մրցանակակիրներին, ինչպես նաև մեզ բոլորիս։ Այս ընթացքում ես անընդհատ հետաքրքրվում էի, թե մասնակցության քանի դիմում ենք ստացել ոչ թե վիճակագրության համար, այլ որպեսզի հասկանայի՝ արդյոք այս նախաձեռնությունն անհրաժե՞շտ է մարդկանց, ՀՀ քաղաքացիներին։ Այն փաստը, որ այսօր ավելի քան 1500 մասնակից ենք ունեցել, տալիս է այդ հարցի պատասխանը՝ այո, անհրաժեշտ է։
Ուզում ենք, որ մեր հայրենակիցներն իրենց առջև խնդիրներ դնեն ու լուծեն դրանք, կյանքում էլ առաջնորդվեն այդ գաղափարով՝ ունենալ նպատակասլացություն և վճռականություն կանգնել մեկնարկին, անցնել տարածությունն ու հատել վերջնարկը։
Շնորհակալություն եմ հայտնում բոլոր այն մարդկանց, որոնք արձագանքեցին այս նախաձեռնությանը, ինչպես նաև աջակցեցին կազմակերպչական հարցերում»,- ասել է ՀՀ վարչապետ Նիկոլ Փաշինյանը։

Կարեն Գիլոյանը ևս շնորհավորել է բոլոր մրցանակակիրներին և հույս հայտնել, որ աստիճանաբար նշաձողն ավելի ու ավելի կբարձրացվի․ «Մրցաշարը կամփոփեմ ընդամենը մեկ բառով՝ կայացավ բոլոր առումներով՝ և՛ մասնակիցների քանակով, և՛ մասնակցության գեղեցկությամբ, մասսայականությամբ, և՛ կազմակերպչական բոլոր խնդիրների լուծմամբ, և՛ մրցանակային հիմնադրամով»։

Կարեն Գիլոյանը խոստովանել է, որ մտավախություն ուներ՝ 10 հազար մետր մրցատարածքը բարդ կլինի ու շատ մասնակից չենք ունենա և հիմա հաճելիորեն զարմացած է մասնակիցների մեծ թվից։

«Մրցանակակիրները լավ արդյունք տվեցին, շնորհավորում եմ բոլորին։ Այո, կային մարզված տղաներ՝ աթլետները, բայց այն, որ 10 հազար մետրում պրոֆեսիոնալ չէին, դա փաստ է, քանի որ Հայաստանում 10 հազար մետր մրցատարածքի պրոֆեսիոնալ մարզիկ չկա։ Եվ մենք դրանով բացառել ենք պրոֆեսիոնալների մասնակցությունը։ Ինչքան նշաձողը բարձրացնենք, այնքան ավելի լավ կլինի, մասսայական կդառնա, արդյունքներն էլ կբարելավվեն»,- եզրափակել է ԿԳՄՍ նախարարի տեղակալը։

Առաջին տարիքային խմբի`15-17 տարեկան դպրոցականների մրցանակակիր տղաները և աղջիկները ստացել են համակարգիչներ: Երկրորդ և երրորդ տարիքային խմբերում առաջին տեղի համար սահմանված էր 1 մլն դրամ մրցանակ, երկրորդ տեղի համար` 600 հազար դրամ, երրորդ տեղի համար` 400 հազար դրամ, չորրորդ տեղի համար` 150 հազար դրամ, հինգերորդ տեղի համար՝ 100 հազար դրամ: Դրամական խրախուսումներ են նախատեսված նաև 6-10-րդ տեղեր գրավածների համար` 75-հազարական դրամ, և 11-20-րդ տեղերի համար` 50-հազարական դրամ:

Մրցաշարին մասնակցել է նաև Ուկրաինայի դեսպանատան առաջին քարտուղար Վիկտոր Օլեյնիկը, որին հանձնվել է խրախուսական մրցանակ։