Մենդելեևի անվան միջազգային մրցանակը շնորհվել է Յուրի Հովհաննիսյանին

Ֆունդամենտալ գիտությունների բնագավառում նվաճումների համար ՅՈՒՆԵՍԿՕ-ի կողմից Ռուսաստանի Դ. Ի. Մենդելեևի անվան միջազգային մրցանակը շնորհվել է ռուսաստանցի գիտնական, ակադեմիկոս Յուրի Հովհաննիսյանին, հաղորդել է ՄԱԿ-ի կրթության, գիտության և մշակույթի հարցերով կազմակերպությունը: Մրցանակի հանձնման հանդիսավոր արարողությունը կկայանա նոյեմբերի 15-ին Փարիզում՝ ՅՈՒՆԵՍԿՕ-ի կենտրոնակայանում, տեղեկացնում է «Արմենպրես»-ը:

Բարձր պարգևն ակադեմիկոս Հովհաննիսյանին է շնորհվել՝ «ի նշան այն բեկումնային հայտնագործությունների ճանաչման, որոնք ընդլայնում են պարբերական աղյուսակի սահմանները, ինչպես նաև գլոբալ մասշտաբով ֆունդամենտալ գիտությունների զարգացման աջակցության գործում նշանակալից ավանդի համար»:

Յուրի Հովհաննիսյանն ատոմի միջուկի փորձարարական ֆիզիկայի, միջուկային ռեակցիաների, սինթեզի հետազոտությունների և Մենդելեևի աղյուսակի նոր տարրերի հատկությունների հետազոտման, լիցքավորված մասնիկների արագացուցիչների ֆիզիկայի և տեխնիկայի, նանոտեխնոլոգիաներում արագացված ծանր իոնների օգտագործման բնագավառի մասնագետ է: Նա նոր գիտական ուղղության՝ ծանր իոնների ֆիզիկայի հիմնադիրներից մեկն է (Ֆլորովի հետ համատեղ):

Միջուկային ռեակցիաների նոր դասի՝ զանգվածային միջուկների սառը միաձուլման հայտնագործման (1974) հեղինակն է, որը ներկայումս աշխարհի տարբեր լաբորատորիաներում օգտագործվում է նոր տարրերի սինթեզի համար, հայտնագործել է գերծանր տարրերի սինթեզի ռեակցիաները (1975 – 1978), մասնակցել է Մենդելեևի աղյուսակի 104-րդ, 105-րդ և 106-րդ տարրերի սինթեզի աշխատանքներին:

Հովհաննիսյանի ղեկավարությամբ 2000-ական թվականներին Միջուկային հետազոտությունների միացյալ ինստիտուտում հայտնաբերվել են նոր քիմիական տարրեր՝ 113-րդից մինչև 118-րդը ներառյալ:

Այդ գյուտերի շնորհիվ հայտնաբերվել է գերծանր միջուկների կայունության բնագավառը: 2016 թվականի նոյեմբերի 28-ին Տեսական և կիրառական քիմիայի միջազգային միությունը (The International Union of Pure and Applied Chemistry, IUPAC) Մենդելեևի աղյուսակի 118-րդ տարրին տվել է օգանեսոն (սիմվոլը՝ Og ) անունը՝ ի պատիվ Յուրի Հովհաննիսյանի:

Նա դարձել է երկրորդ գիտնականը, ամերիկացի քիմիկոս Գլեն Սիբորգից հետո, որի անվամբ քիմիական տարր է անվանվել կյանքի օրոք: Մրցանակի երկրորդ դափնեկիր է դարձել պրոֆեսոր Վինչենցո Բալցանին (Բոլոնիայի համալսարան, Իտալիա), իտալացի քիմիկոս, իր գիտական գործունեության համար նա պարգևների է արժանացել տարբեր երկրներում, այդ թվում՝ Եվրոպայի գիտությունների ակադեմիայի՝ Լեոնարդո դա Վինչիի մրցանակին, հաղորդել է ՏԱՍՍ-ը: