Քիչ թե շատ զարգացած յուրաքանչուր մարդ այսօր ուզում է փախչել Թուրքիայից. Սևան Նշանյան

Մեկ տարի առաջ՝ այս օրերին, թուրքական բանտից փախուստի էր դիմել հայազգի մտավորական, գրող, բառարանագետ, փիլիսոփա, գիտնական և գործարար Սևան Նշանյանը: Նշանյանը թուրքական դատարանի կողմից դատապարտվել էր 17 տարվա ազատազրկման՝ ապօրինի շինարարության և հարկերից խուսափելու համար առաջադրված մեղադրանքով, սակայն թե՛ նա, թե՛ նրան սատարողները վստահ են, որ որոշումը քաղաքական էր, և նրա դեմ հալածանքը սկիզբ է առել Մուհամմեդ մարգարեի ու իսլամի մասին գրած հոդվածի պատճառով:

Բանտից փախչելուց հետո Սևան Նշանյանը որոշ ժամանակ գաղտնի էր պահում իր գտնվելու վայրը, սակայն ավելի ուշ հայտնեց, որ հատել է Թուրքիայի սահմանը և հաստատվել Հունաստանի քաղաքներից մեկում:

Shantnews.am-ը կապ հաստատեց Սեւան Նշանյանի հետ՝ տեղեկանալու նրա այսօրվա վիճակի և ծրագրերի մասին: Սևան Նշանյանն ասաց, որ լավ է զգում, միշտ զբաղված է ընթերցանությամբ, գրելով, հանդիպումներով և դժգոհ չէ Հունաստանում իր կեցությունից:

«Որ անկեղծ ասեմ, շատ գոհ եմ, որ այս երկիրն ընտրեցի փախուստից հետո, շատ գեղեցիկ, մտերմիկ, մարդկային քաղաք է վայրը, ուր գտնվում եմ: Արդեն սիրելի է դարձել ինձ, կամաց-կամաց արմատ եմ նետում այստեղ»,- ասաց Սևան Նշանյանը, որի ընտանիքի մի մասը դեռևս Թուրքիայում է, շարունակում է ընտանեկան բիզնեսը, իսկ երեխաներից մի քանիսն ուսանելու նպատակով մեկնել են արտերկիր:

Սևան Նշանյանի հետ զրույցից տեղեկացանք, որ նա Հունաստանում մի քանի տուն է գնել, որոնք վերածել է գիտական միջավայրի, այնտեղ կազմակերպում է հավաքներ, միջոցառումներ, ունենում է բազում հյուրեր և այցելուներ:

«Ուզում եմ ավելի ընդլայնել ծրագիրս և այստեղ համաժողովներ, սիմպոզիումներ և դասընթացներ կազմակերպել: Ամառվա սկզբից եմ սկսել, արդեն հարյուրավոր մարդիկ հետաքրքվել են, այցելում են խմբերով, մասնակցում գիտական հավաքներին: Թուրքիայից էլ եմ շատ հյուրեր ունենում, այս պահին այնտեղից երկու խումբ հյուրեր ունեմ: Մեր հավաքները հիմնականում լեզվաբանությանը, փիլիսոփայությանն ու այլ գիտական հարցերի վերաբերյալ են: Ծրագրում ենք սեպտեմբերին ֆեմինիզմին նվիրված սիմպոզիում կազմակերպել այստեղ»,- ասաց հայ գիտնականը, որը թե՛ բանտում, թե՛ բանտից դուրս ոչ մի պահ չի դադարել գիտական աշխատանքով զբաղվել:

Քննարկվող նյութերի շարքում, ըստ նրա, շոշափվում է նաեւ քաղաքականությունը, սակայն Սևան Նշանյանը նշեց, որ քաղաքական հարցերն «անցողիկ երևույթներ են» և շատ չեն կենտրոնանում դրանց վրա, ավելի շատ հավերժական հարցեր են քննարկում, ինչն էլ հետաքրքրում է շատերին և ցանկություն են հայտնում մասնակցել իր ու համախոհների կազմակերպած հավաքներին:

«Այստեղի կյանքի մաս եմ կազմում, ինչն այս պահին բավարարում է ինձ, գոհ եմ նաև, որ այստեղ ինձ ճանաչում են, լսել են իմ մասին և դրական են վերաբերվում»,- SHANTNEWS.AM-ին հայտնեց Նշանյանը:

Ինչ վերաբերվում է իր ծննդավայրին՝ Թուրքիային, որտեղ երկար տարիներ ապրել է, մեզ հետ զրույցում ասաց, որ իր կարծիքով Թուրքիան այսօր «անտանելի տեղ» է դարձել:

«Այսօր քիչ թե շատ զարգացած յուրաքանչուր մարդ ուզում է փախչել Թուրքիայից: Նրանք կտրել են իրենց հույսը և ուզում են հեռանալ: Այդպիսի լայն, միջազգային մտածողությամբ մարդիկ կան թե՛ հայերի, թե՛ հույների, թե՛ հրեաների, թե՛ թուրքերի և թե՛ Թուրիքայում ապրող մյուս ազգերի մեջ»,- ասաց մեր զրուցակիցը:

Նրան հիշեցրինք, որ վաղուց ցանկություն էր հայտնել լինել նաև Հայաստանում, սակայն մեր զրուցակիցն ասաց, որ ցավոք անձնագիր չունի և կեցության թղթով է մնում Հունաստանում:

«Երբ դիմեցի անձնագրի համար,ասացին հինգ-վեց ամիս հետո կունենաս, սակայն մի տարի է անցել, բայց ոչ մի արձագանք»,- ասաց Սևան Նշանյանը: