Գյումրիում աշխատանք փնտրողների թիվը չի նվազում, բայց թափուր աշխատատեղերը դժվար են համալրվում

Աշխատանքի հրավիրման հայտարարությունները Գյումրիի տարբեր հատվածներում հազվադեպ հանդիպողներից չեն: Ամենաշատ պահանջարկը սպասարկման ոլորտում է. հիմնականում թափուր են վարսահարդարների, մատնահարդարների, վաճառողների, մատուցողների, հավաքարարների հաստիքները: Միևնույն ժամանակ, չեն համալրվում նաև բժիշկների և բուժքույրերի թափուր տեղերը:

Միասնական սոցիալական ծառայության Գյումրիի տարածքային կենտրոնի սոցիալական աշխատանքի և զբաղվածության ծրագրերի բաժնում, ըստ գործատուների հայտերի, այս պահին մոտ 200 թափուր աշխատատեղ կա, նույն չափով թափուր աշխատատեղ է ներկայացված աշխատանքի տեղավորման մասնավոր գործակալությունում:

Հիմա թափուր են մնում թե՛ ապահովագրական գործակալների, թե՛ ծրագրավորողների, թե՛ հավաքարարների հաստիքները։ Այս ամենի պատճառը գործազուրկները մատնանշում են քիչ աշխատավարձը։ Աշխատանքի առաջարկի ու պահանջարկի անհավասար հնարավորությունների պատճառով շատերը թափուր հաստիքներին ծանոթանալ չեն շտապում: Տղամարդիկ գերադասում են արտագնա աշխատանքը, կանայք էլ աշխատանքի տեղավորվելիս հիմնականում բախվում են տարիքային սահմանափակումների խնդրին: Այժմ գործատուները, տարիքային սահմանափակումներից և բարետես արտաքինից բացի, նախընտրում են, որ իրենց աշխատակիցներն ունենան բազմապրոֆիլ հմտություններ:

«Էսօր գործատուների պահանջը բազմակողմանի է, մեկ մասնագետի մեջ ուզում են տեսնել զարգացած շատ հմտություններով, լուրջ ծրագրերի իմացությամբ մասնագետների, թեկուզ տնտեսագետները, թեկուզ մանկավարժները լուրջ հմտություններ պետք է ունենան»,- ShantNews.am-ի հետ զրույցում նշել է «Ադամյան և ընկերներ» աշխատանքի տեղավորման կադրային կենտրոնի ղեկավար Ամալյա Ադամյանը:

Թափուր աշխատատեղեր առաջարկում են մեծամասամբ մասնավոր հատվածի գործատուները: Նոյեմբերին անցկացված աշխատանքային տոնավաճառին ներկայացվել է 200-ից ավելի աշխատատեղ, որտեղ գործատուներին և աշխատանք փնտրողներին տրվել է միմյանց գտնելու հնարավորություն: Ինչ արդյունքի են հասել, հստակ տվյալներ դեռ չունեն։ Զբաղվածության արդեն պետական ծրագրերով, անցած տարում 143 մարդ է աշխատանքի տեղավորվել։ 2021-ին իրականացվել է մասնագիտության ուսուցման կազմակերպման ծրագիր, որին մասնակցել է 54 մարդ, նրանցից 12-ը՝ 44-օրյա պատերազմի մասնակիցներն են։

Պետական ծրագրերից առավել շատ պահանջարկ ունեցել է «դայակների» ծրագիրը։ Երեխայի խնամքի արձակուրդում գտնվող, բայց աշխատանքի վերադարձած մայրերը օգտվում են դայակի ծառայությունից, որի համար պետությունն է նաև աջակցում։ Պետական ծրագրերից ամենաշատն այս ծրագրից են օգտվել 2021-ին 46 աշխատող մայրեր։

«Երեխայի խնամքի արձակուրդում գտնվող աշխատող մայրերին, մինչև երեխայի 2 տարեկանը լրանալը, աշխատանքի վերադառնալու դեպքում պետական ծրագրով աջակցություն է տրամադրվում դայակի ծառայություններից օգտվելու համար։ Այս ծրագրով փոխանցվում է ծառայությունների մատուցման պայմանագրով նախատեսված գումարի 50 տոկոսի չափով, բայց ոչ ավելի 68 հազար դրամը»,- ShantNews.am-ի թղթակցի հետ զրույցում նշել է միասնական սոցիալական ծառայության Գյումրիի տարածքային կենտրոնի սոցիալական աշխատանքի և զբաղվածության ծրագրերի ավագ մասնագետ Արմինե Եղիազարյանը։

Միասնական սոցիալական ծառայության Գյումրիի տարածքային կենտրոն հիմա շատ գործազուրկներ դիմում են բիզնեսի աջակցման ծրագրերից օգտվելու համար, երբ նոր բիզնես սկսելու համար գործազուրկին տրամադրվում է ֆինանսական աջակցություն: Նախորդ տարում այս ծրագիրը չի գործել, դեռ հայտնի չէ՝ 2022-ի զբաղվածության պետական ծրագրերում այս բաղադրիչը կընդգրկվի, թե ոչ։ Պետական ծրագրերի բաշխում այս տարվա համար դեռ չի կատարվել։