Գյումրիում գողությամբ զուգորդված ավազակային հարձակման վերջին դեպքերի մի մասը բացահայտվել է

Գյումրիում արձանագրված գողությամբ զուգորդված ավազակային հարձակման վերջին դեպքերի մի մասը բացահայտվել է։ Դեռևս նախաքննության փուլում է գազալցակայանի վրա կատարված զինված ավազակային հարձակումը։ Ընդհանուր առմամբ, Շիրակի մարզում բնակարանային գողությունների դեպքերը 2021-ին նվազել են նախորդ տարվա համեմատ։ Շիրակի մարզի դատախազության ամփոփ տվյալներով 2021 թվին արձանագրվել է գողության 212 դեպք, 2020-ի համեմատ դեպքերը նվազել են 40-ով, աճել են բացահայտման ցուցանիշները՝ կազմելով 47 տոկոս։

«Նվազում ունենք ոչ միայն ընդհանուր գողությունների թվաքանակի առումով, այլ նաև հենց կոնկրետ բնակարանային գողությունների թվաքանակի առումով»,- ShantNews.am-ի հետ զրույցում նշել է Շիրակի մարզի դատախազության ավագ դատախազ Սերոբ Կիրակոսյանը։

Գողության 212 դեպքից 23-ը ավտոմեքենաներից կատարվածներն են, որոնց գերակշիռ մասը չի բացահայտվել՝ ի տարբերություն բնակարանային գողության։ Քաղաքի տարբեր թաղամասերում կատարվող մեծ ու փոքր գողությունների օպերատիվ արձագանքման ու արագ բացահայտման արդյունավետ միջոց են տարածքներում տեղադրված տեսախցիկները։ Մարզի դատախազությունը պարբերաբար գրություններ է ուղարկում մարզպետարան և համայնքների ղեկավարներին հորդորով՝ բնակելի հատվածներն ապահովել տեսախցիկներով, իսկ շենքերի մուտքերը նաև կոդավորվող փականներով։ Դատախազ Կիրակոսյանը նշել է՝ ոստիկանության բաժիններում հստակեցված են այն տեղանքները, որտեղ շատ են գողության դեպքերը և անհրաժեշտ են տեսախցիկներ տեղադրել․

«Ոստիկանության մարմիններն ունեն էդ համապատասխան քարտեզագրությունը, կարող են նշել, թե կոնկրետ որ բնակավայրերում են գողությունները շատ, բնակավայրի որ հատվածում են հիմնականում և  ուղարկել են համայնքների ղեկավարներին»,- ասել է  դատախազության ավագ դատախազը ։

Գողությունների մեծ մասը տեղի են ունեցել Գյումրիում, քաղաքում տեսախցիկներ տեղադրելու համար դատախազի միջնորդագրեր պարբերաբար են ուղարկվում քաղաքապետարան։ Գյումրիի ավագանին 2019 թվականին էր որոշում կայացրել այդ նպատակին 8 մլն 350 հազար դրամ հատկացնել։ Գումարի բաշխումն էլ 13 համատիրությունների միջև էր կատարվելու։ Գնելու էին 220 տեսախցիկ, իսկ բաշխումը 13-ի մեջ լինելու էր ըստ տարածքների ռիսկայնության։ Տեսախցիկների ձեռք բերումը համատիրություններին հանձնարարվել էր կատարել մրցութային կարգով։

«Գումարը պետք է տրամադրեինք համատիրությանը, որպեսզի մրցույթով գնում իրականացնեին, սակայն չեն իրականացրել, կատարողական կամ ընդունման-հանձնման ակտ չեն ներկայացրել, մենք էլ գումարը չենք տրամադրել»,-  ShantNews.am-ի հետ զրույցում նշել է Գյումրիի քաղաքապետարանի ֆինանսատնտեսագիտական բաժնի պետ Մենուա Մկրտչյանը ։

Թե ինչու համատիրությունները տեսախցիկներ չեն  գնել, «Կարին» համատիրության նախագահ Սենիկ Եսայանը նշել է․

«Ոչ մի բնակիչ չի համաձայնվում իրեն տնից միացնի տեսախցիկները, պատճառաբանում են, եթե ինչ-որ դեպք եղավ, պետք է գան ասեն բացեք, մի հատ կամերաները հետ տվեք, նայենք ինչ է էղել»։

Բնակիչների և համատիրությունների միջև եղած անհամաձայնությունն էլ առիթ դարձավ, որպեսզի պատվիրատուն՝ քաղաքապետարանը, քննարկի և եզրակացություն կայացնի, թե ինչքանով է նպատակային տեսախցիկների համար ծախսումներ կատարելը։

«Ուսումնասիրությունների արդյունքում պարզվել է, որ հետագա շահագործման, սպասարկման ծախսերի, կապի, էլեկտրաէներգիայի ծախսերը բավականաչափ շատ են և նպատակահարմար չի եղել, գումարը մնացել է համայնքապետարանի հաշվին, չի ծախսվել»։

Քաղաքապետարանն ու համատիրությունները չեն գնել, բայց միայն անցած տարի Գյումրիում բազմաբնակարան շենքերի մոտակայքում, խաչմերուկներում, հրապարակներում, սպասարկման օբյեկտների և առանձնատների տարածքում տեղադրվել է 203 տեսախցիկ՝ բոլորը անհատների և մասնավորի միջոցներով։

Համատիրությունում հաշվարկել են, եթե մեկ բակում տեղադրվի չորս տեսախցիկ, ապա դրանով հնարավոր կլինի վերահսկել տվյալ տարածքի բոլոր շենքերը։ Բացի տեսախցիկներից, բազմաբնակարան շենքերի մուտքերին տեղադրվում են նաև հատուկ կոդավորվող փականներ։ Դրա համար քաղաքապետարանն առանձին միջոցներ չի տրամադրում։ Եթե համատիրությունը տվյալ տարվա համար անհրաժեշտ դոտացիայի մեջ նախատեսում է փականների տեղադրում, ապա ընդհանուր հատկացված գումարից է ծախսում։

Համատիրությունն ինքն է որոշում, որ մուտքին տեղադրել կոդավորվող փականներ՝ կախված բնակիչների սպասարկման վճարումներից։ Փականներ տեղադրելու համար բնակչից ավելի գումար չի գանձվում։ Տեսախցիկների և կոդավորված փականների տեղադրմանարդյունքում բնակարանային գողությունները նվազում են, դրանք նաև կարևոր են բնակիչների անվտանգության առումով։