Նիկոլ Փաշինյանի ամբողջական հարցազրույցը Al Jazeera հեռուստաընկերությանը

Al Jazeera հեռուստաընկերության Talk to Al Jazeera ծրագրի հաղորդավար Ռոբին Ֆորեսթիեր-Ուոքերը այցելել է Հայաստան՝ վարչապետ Նիկոլ Փաշինյանի հետ հարցազրույց անցկացնելու նպատակով: Հարցազրույցի ընթացքում ՀՀ վարչապետը խոսել է արդեն իսկ արձանագրած հաջողությունների, ինչպես նաև իր առջև ծառացած մարտահրավերների մասին: Մինչ օրս ունեցած ձերքբերումներից Նիկոլ Փաշինյանը առանձնացրել է հետևյալը.

«Ամենակարևոր բանը, որ մենք արդեն փոխել ենք, մարդկանց կողմից իրենց սեփական դերի ընկալումն է: Դա ամենակարևոր փոփոխությունն է, որին մենք հասել ենք: Մինչև հեղափոխությունը ՀՀ քաղաքացիների մեծ մասը կարծում էր, որ իրենց դիրքորոշումից ոչինչ կախված չէ, բայց մենք մեր քաղաքացիներին ստիպեցինք հավատալ, որ նրանց ձայնը ամենակարևոր գործոնն է մեր երկրի քաղաքական և հասարակական կյանքում»:

Al Jazeera-ի հաղորդավար Ռոբին Ֆորեսթիեր-Ուոքերը նշել է, որ պատմությունից դատելով՝ մարդիկ հեղափոխություններից հետո շոշափելի փոփոխություններ են ակնկալում անմիջապես: ՀՀ վարչապետը նշել է, որ առաջիկա քայլերից են լինելու տնտեսական բարեփոխումները, տնտեսության ազատականացումը և այն գրավիչ դարձնելը թե՛ արտասահմանյան, թե՛ հայաաստանյան ներդնողների համար:

«Դուք արտաքին քաղաքականության մեծ փորձ չունեք, զինվորական չեք, ձեր երկիրը իր հարևան Ադրբեջանի հետ հակամարտության մեջ է, Ձեր նախարարների թիմը Ձեզնից երիտասարդ է, Դուք էլ ընդամենը 43 տարեկան եք: Արդյո՞ք Դուք համապատասխանում եք այս պաշտոնին», – հարցրել է Al Jazeera-ի հաղորդավարը:

Այս հարցին ի պատասխան՝ Նիկոլ Փաշինյանը կրկին բերել է Նելսոն Մանդելայի օրինակը, ով նախքան Հարավաֆրիկյան Հանրապետության նախագահ դառնալը 26 տարի բանտում էր անցկացրել:

«Ես քաղաքականությամբ զբաղվել եմ 1991 թվականից: Ես լրագրող եմ եղել, գրել եմ բազմաթիվ հոդվածներ զինվորական պաշտոնյաների, պետական պաշտոնյաների, քաղաքական գործընթացների մասին, և դա հսկայական դպրոց է, հսկայական փորձ է քաղաքական գործիչ, նախարար, վարչապետ, նախագահ դառնալու համար, քանի որ ես հետևում էի այս բոլոր մարդկանց և գրում էի, թե ինչն է ճիշտ նրանց գործողություններում, ինչը՝ սխալ»,- նշել է Փաշինյանը:

Իսկ ընտրությունների վաղ անցկացման անհրաժեշտության մասին հարցին Փաշինյանը պատասխանել է, որ անհրաժեշտ է հավասար պայմաններ ստեղծել բոլոր քաղաքական ուժերի համար:

«Մեր կարևոր նպատակն է ժողովրդավարական, թափանցիկ և ազատ ընտրություններ անցկացնել: Եթե մենք արտահերթ ընտրություններ անցկացնենք հիմա, դա հավասար պայմաններ չի ստեղծի այլ քաղաքական ուժերի համար: Մենք չենք ուզում անհավասար քաղաքական դաշտ ստեղծել: Մենք ցանկանում ենք մեր քաղաքական հակառակորդներին ժամանակ տալ՝ պատրաստվելու այդ ընտրություններին»,- ընդգծել է ՀՀ վարչապետը:

Ինչ վերաբերում է երկրում բարեփոխումներ իրականացնելու համար անհրաժեշտ գումարին, Փաշինյանը նշել է, որ ֆինանսական օժանդակություն ակնկալվում է ոչ միայն ԱՄՆ-ից և Եվրոպական Միությունից, այլև Ռուսաստանից:

Այն հարցին, թե ինչպես է Հայաստանը հավասարակշռելու իր հարաբերությունները Ռուսաստանի և Արևմուտքի միջև, Փաշինյանը նշել է, որ ցանկացած երկրի հետ հարաբերություններ կառուցելու ժամանակ պետք է հաշվի առնվեն առաջին հերթին Հայաստանի շահերը:

«Չեմ կարծում, որ հարաբերությունները հավասարակշռելու կարիք կա: Մենք պետք է բարձրացնենք մեր հարաբերությունների որակը ոչ միայն Ռուսաստանի, այլև ԵՄ-ի, ԱՄՆ-ի, Իրանի, Չինաստանի, Հնդկաստանի, Վրաստանի հետ և այլն: Եվ մենք այդ հարաբերությունները կառուցելու ենք՝ հիմնվելով Հայաստանի ազգային շահերի վրա»,- նշել է Նիկոլ Փաշինյանը:

Հարցազրույցի ընթացքում հարց է հնչել նաև վերջին օրերին Փանիկ գյուղում ռուսական զորքերի անցկացրած զորավարժությունների հետ կապված միջադեպի մասին: Վարչապետը նշել է, որ միջադեպի կապակցությամբ ռուսական կողմը ներողություն է խնդրել, և դա եղել է սադրանք հայ-ռուսական հարաբերությունների և Հայաստանի ինքնիշխանության դեմ:

Ինչ վերաբերում է այն հարցին, որ Ռուսաստանը կարող է իր ազդեցությունն օգտագործել Հայաստանում, երբ դրա կարիքը լինի, Փաշինյանը պատասխանել է, որ աշխարհում չկա բացարձակ անկախ երկիր:

«Ողջ աշխարհում շատ երկրներ այլ երկրների վրա ազդելու գործիքներ ունեն: Չկա բացարձակ անկախություն որևէ երկրի համար, որովհետև բոլոր երկրները, միջազգային հանրությունը սերտորեն կապված են», – ընդգծել է Փաշինյանը:

Հարցազրույցի ընթացքում ՀՀ վարչապետը պատասխանել է նաև իր անմիջական հարևանների հետ հարաբերություններին վերաբերող հարցին:

«Ինչպես ցանկացած ժողովրդավարական պետություն, մենք Լեռնային Ղարաբաղի հակամարտության խաղաղ կարգավորման կողմնակից ենք: Եվ դա շատ կարևոր է, որովհետև ես վստահ եմ, որ ժողովրդավարությունը ամենակարևոր գործոնն է մեր տարածաշրջանում խաղաղություն ապահովելու համար»,- նշել է ՀՀ վարչապետը:

Իսկ Արդբեջանի ագրեսիան Փաշինյանը բացատրել է Հայաստանի հաջողություններով և այն մտավախությամբ, որ Հայաստանի օրինակը կարող է վարակիչ լինել Ադրբեջանի համար:

«Ինչո՞ւ է Ադրբեջանն ավելի ագրեսիվ դարձել Հայաստանում տեղի ունեցած հեղափոխությունից հետո: Դուք գիտեք, որ մենք մեծ հաջողություններ ունենք Հայաստանը ժողովրդավարական պետություն դարձնելու գործում, կոռուպցիայի դեմ պայքարի գործում: Կարծում եմ, որ Իլհամ Ալիևը մտավախություն ունի, որ ադրբեջանցիներին կարող է ոգեշնչել հայաստանյան հեղափոխությունը, և նրանք կփորձեն նմանատիպ փոփոխություններ անել Ադրբեջանում: Կարծում եմ, որ Ադրբեջանի կառավարության ագրեսիվ հռետորաբանության ուժեղացումը կապված է այս իրավիճակի հետ: Ես վստահ եմ, որ Ադրբեջանի կառավարությունը փորձում է իր երկրում առկա խնդիրներից ժողովրդի ուշադրությունը շեղել դեպի Լեռնային Ղարաբաղի խնդիրը»,- հավելել է Փաշինյանը:

Նիկոլ Փաշինյանը նաև շեշտել է, որ պատրաստ է հանդիպել Ադրբեջանի նախագահ Իլհամ Ալիևի հետ: Փաշինյանը հավաստիացրել է, որ Հայաստանն ունի կամք և ցանկություն հակամարտությունը խաղաղ լուծելու համար և պատրաստ է բանակցությունների:

Ինչ վերաբերում է Թուրքիայի հետ նորմալ հարաբերություններ հաստատելուն, Փաշինյանը նշել է, որ Թուրքիան է Հայաստանի հետ սահմանը փակել և հենց Թուրքիան պետք է որոշում կայացնի սահմանը բացելու վերաբերյալ:

«Հայաստանը պատրաստ է Թուրքիայի հետ դիվանագիտական հարաբերություններ հաստատել առանց որևէ նախապայմանների, և Թուրքիան պետք է որոշում կայացնի այդ հարցում», – ընդգծել է ՀՀ վարչապետը:

Վարչապետը նաև մտահոգություն է հայտնել Իրանի շուրջ վերջին զարգացումների կապակցությամբ, քանի որ Իրանը Հայաստանի հարևանը և գործընկերն է: Նա շեշտել է, որ Հայաստանը պատրաստ է աջակցել բոլոր գործընթացներին, որոնք կնպաստեն մեր տարածաշրջանն ավելի բարգավաճ, խաղաղ և ապահով դարձնելուն: