Ավետիք Իշխանյանն իշխանություններից պահանջել է մինչ ԱԺ ընտրությունները բարեփոխումների հայեցակարգ ներկայացնել

Վերահսկելի և պատասխանատու իշխանություն ձևավորելու համար, Հայաստանի Հելսինկյան կոմիտեի նախագահ Ավետիք Իշխանյանի համոզմամբ, պետք է առաջին հերթին գնալ օրենսդրական ու սահմանադրական լուրջ բարեփոխումների: Ըստ նրա՝ թեև երկրում իշխանափոխություն է կատարվել, ու նոր իշխանությունները աշխատում են չգործել նախորդ իշխանությունների սխալները, սակայն կառավարման համակարգը, ըստ էության, մնացել է նույնը ու նոր իշխանությունները փաստորեն կառավարում են հին իշխանություններից ժառանգություն ստացած այսպես կոչված «սուպերվարչապետական» համակարգով:

«Այն ժամանակ նախագահի անձնական գվարդիան էին ոստիկանությունն ու ազգային անվտանգությունը, հետո դառան վարչապետի գվարդիան: Նույնը վերաբերում է քննչական ծառայություններին, քննչական կոմիտեին և քննչական հատուկ ծառայությանը»,- ընդգծել է Իշխանյանը՝ ավելացնելով, որ այդ բոլոր կառույցների ղեկավարներին այսօր նշանակում է վարչապետը, և դրանք, ըստ էության, դառնում են վարչապետին կից կառույցներ:

Իշխանյանի բնութագրմամբ՝ մինչ այս պահը կառավարման համակարգում էական փոփոխություններ, որպես այդպիսին, չեն արվել ու ընդամենը նախագահի պատմուճանը փոխվել է վարչապետի պատմուճանով: Այս ամենը, ըստ իրավապաշտպանի, դեռևս 1995 թվականին ընդունված միապետական սահմանադրության արդյունք է, ինչը մոտ 30 տարի հասարակությանը հնարավորություն չի տվել իշխանափոխություն իրականացնել ընտրությունների միջոցով:

1998 թվականի ներքին «պալատական» հեղաշրջումը կամ 2018 թվականի «փաշինյանական հեղափոխությունը» Իշխանյանը հենց Սահմանադրական բացի արդյունք է համարում:

Իշխանյանը հիշեցրել է, որ երբ քննարկվում էր կառավարման ներկա համակարգին անցնելու հարցը, այն ժամանակ ԱԺ «Ելք» դաշինքը ղեկավարող, այսօր գործող վարչապետ Նիկոլ Փաշինյանը խիստ քննադատում էր այդ «սուպերվարչապետական» կոչված համակարգը, այդ թվում փոխվարչապետների ինստիտուտի ներդրումը, վարչապետին լայն լիազորություններ տրամադրելու խնդիրը:

«Հիմա դա նրանց ժառանգություն մնաց: Փաշինյանը համենայնդեպս իշխանությունը վերցնելուց հետո մի երկու անգամ ասել է, որ պետք է ոստիկանությունը դառնա նախարարություն: Քանի որ մենք ինքներս աջակցել ենք, հեղափոխությանը հավատացել ենք, մենք առայժմ սպասողական վիճակի մեջ ենք, մասնավորապես ես: Ես հույս ունեմ, որ սա կլինի նոր իշխանության նախընտրական ծրագիրը և հուսանք, որ նախկին ընդդիմությունը՝ այսօր իշխանությունը, խոստումը չի դրժի և այս փոփոխությունները կլինեն և կլինի իսկապես պառլամենտական համակարգ, իշխանության իրական տարանջատումով»,- նշել է իրավապաշտպանը:

Ավելին, Ավետիք Իշխանյանը կարծում է, որ նման պահանջ հասարակությունը պետք է ներկայացնի ոչ միայն «Քաղաքացիական պայմանագիր» կուսակցությանը, այլ նաև բոլոր այն քաղաքական ուժերին, որոնք կմասնակցեն խորհրդարանական ընտրություններին: Իրավապաշտպանը նույնիսկ հայտարարեց, որ պատրաստ է հակաքարոզ սկսել խորհրդարանական ընտրություններին մասնակցող այն ուժերի դեմ, որոնք կգտնեն, որ նախկին միապետական համակարգը առավել արդյունավետ է:

Ի դեպ, իրավապաշտպանի պնդմամբ, բարեփոխումների վերաբերյալ հայեցակարգը քաղաքական ուժերը պարտադիր պետք է ներկայացնեն ժամանակացույցով, որպեսզի ընտրություններից հետո պարտավորված լինեն իրենց նշած ժամկետներում իրագործել այդ քայլերը: