Եվրոպայի բռնցքամարտի առաջնության կազմկոմիտեն ամփոփել է կատարված աշխատանքները

Եվրոպայի բռնցքամարտի առաջնության մեկնարկին հաշված օրեր են մնացել: Նախապատրաստական աշխատանքները շարունակվում են ու գրեթե 95 տոկոսով ավարտվել են: Այս մասին լրագրողների հետ հանդիպման ժամանակ հայտնել են առաջնության կազմակերպիչները:

Ինչպես տեղեկացնում են ԿԳՄՍ նախարարությունից, հրավիրված մամուլի ասուլիսին մասնակցել են Եվրոպայի առաջնության կազմկոմիտեի նախագահ, ՀՀ վարչապետի աշխատակազմի ղեկավար Արայիկ Հարությունյանը, Կրթության, գիտության, մշակույթի և սպորտի նախարարի տեղակալ Կարեն Գիլոյանը և Հայաստանի բռնցքամարտի ֆեդերացիայի նախագահ Հովհաննես Հովսեփյանը:

Արայիկ Հարությունյանը, շնորհավորելով բոլորիս սպասվելիք մարզական իրադարձության առթիվ, ընդգծել է՝ Հայաստանի Հանրապետությունում նմանօրինակ մեծ միջոցառում վաղուց չենք հյուրընկալել: Նրա խոսքով՝ պետությունը, բռնցքամարտի ֆեդերացիան և մյուս գործընկերներն անում են լավագույնը՝ մրցաշարը բարձր մակարդակով կազմակերպելու և անցկացնելու համար. «Համենայն դեպս, այն գնահատականները, որ ստանում ենք մեր միջազգային գործընկերներից, շատ դրական են: Ուզում ենք նոր նշաձող սահմանել՝ առնվազն Եվրոպայի բռնցքամարտի առաջնությունների համար»:

Արայիկ Հարությունյանը տեղեկացրել է՝ հաստատված է 39 երկրների պատվիրակությունների ժամանում մեր երկիր: Մարզիկների թիվը գերազանցում է 200-ը, իսկ պատվիրակությունների անդամների հետ այն կգերազանցի 400-ը: Առաջնության հյուրերի թվում են լինելու մարզաձևի միջազգային կառույցների բարձրաստիճան պաշտոնյաներ, այդ թվում` բռնցքամարտի միջազգային ասոցիացիայի ու Եվրոպայի ֆեդերացիայի ղեկավարները:

«Սա նշանակում է՝ առաջնությանն ամենաբարձր մակարդակով ուշադրության է արժանանում: Նշանակում է նաև, որ գնահատվում են այն ջանքերը, որ այստեղ ներդրվում են: Պետք է ասեմ նաև, որ մենք հոգ ենք տարել մասնակիցների ու նրանց ուղեկցող պատվիրակությունների բոլոր հարմարությունների մասին: Պատրաստվում ենք մայիսի 22-ին տալ պաշտոնական մեկնարկը՝ բացման շատ գեղեցիկ արարողությամբ: Մարտականորեն ենք տրամադրված՝ այս մրցաշարում սահմանելու լավագույն արդյունքներից մեկը»,- ասել է Արայիկ Հարությունյանը՝ չցանկանալով մանրամասներ ներկայացնել սպասվելիք բացման արարողությունից:

Եվրոպայի առաջնության բացման հանդիսավոր արարողությունը կկայանա կիրակի օրը՝ մայիսի 22-ին, և կմեկնարկի ժամը 21:00-ին: Կազմակերպիչները հանդիսականներին հորդորում են Կարեն Դեմիրճյանի անվան մարզահամերգային համալիրում լինել արդեն 20:20-ից, քանի որ դրանից հետո երկրպագուների տեղաշարժը սահմանափակվելու է:

ԿԳՄՍ նախարարի տեղակալ Կարեն Գիլոյանը ևս շեշտել է՝ բացման տպավորիչ արարողություն է սպասվում.

«Մեր աշխատանքների 95 տոկոսն արդեն կատարված է թե՛ մարզական առումով, թե՛ բացման արարողության հետ կապված: Շատ գեղեցիկ բացման արարողություն է լինելու, որից հետո՝ գիշերը, կտեղադրվեն երկու ռինգերն ու մայիսի 23-ից արդեն կմեկնարկեն նախնական մենամարտերը: Դրանք կտևեն մինչև մայիսի 27-ը: Մայիսի 28-ը կլինի ազատ օր, մայիսի 29-ին կկայանան կիսաեզրափակիչները, իսկ 30-ին՝ եզրափակիչները»:

Հայաստանի բռնցքամարտի ֆեդերացիայի նախագահ Հովհաննես Հովսեփյանը տեղեկացրել է՝ Եվրոպայի առաջնության շրջանակում նաև ևս մեկ կարևոր իրադարձություն է սպասվում Երևանում: Մայիսի 30-ին մեր երկրում կկայանա EUBC նորընտիր գործկոմի առաջին նիստը: Ֆեդերացիայի նախագահը նաև խոսել է Եվրոպայի առաջնությունում մեր հավաքականի անդամներից ունեցած սպասելիքներից. «Շատ ուրախ եմ տեսնել, որ մեր սպորտաձևն այսպիսի հետաքրքրություն է առաջացրել մեր երկրում: Շատ շուտով մեր հավաքականի տղաները կսկսեն իրենց մենամարտերը: Պետք է ասեմ՝ շատ ուժեղ ու մրցունակ թիմով ենք մասնակցելու Եվրոպայի առաջնությանը և շատ մեծ սպասելիքներ ունենք այս թիմից: Չեմ ցանկանա մեդալների մասին կանխատեսումներ անել: Կարող եմ միայն վստահեցնել, որ ոչ մի քաշային կարգում մեր ոչ մի մասնակցի համար վատ չենք զգալու»:

ՀՀ վարչապետի աշխատակազմի ղեկավար Արայիկ Հարությունյանը ևս խոսել է մեդալային սպասելիքների մասին. «Առնվազն ակնկալում ենք, որ մեր մարզիկները կապահովեն մեր լավագույն արդյունքի կրկնությունը, ինչը երկու ոսկե մեդալն է: Հուսով եմ՝ կհաջողվի նաև գերազանցել այդ արդյունքը»:

ԿԳՄՍ նախարարի տեղակալ Կարեն Գիլոյանի կանխատեսմամբ՝ երեք ոսկե մեդալը գերազանց արդյունք կհամարվի. «Եվրոպայի մեկ առաջնությունում երկու չեմպիոնից ավելի չենք ունեցել: Այնպես որ, եթե կարողանանք այս անգամ գերազանցել մեր լավագույն արդյունքը, հիանալի կլինի»:

Կազմակերպիչների խոսքով՝ Եվրոպայի առաջնության անցկացման և բարձր արդյունքների ապահովման գործում մեծ է լինելու նաև երկրպագուների դերակատարությունը:

«Բոլորին կոչ եմ անում երկրպագել Հայաստանի հավաքականին, և որպեսզի մեր մարզիկները հասկանան, որ տանն են մենամարտում և դրանից թևավորվեն, պետք է՝ տրիբունաներում շատ հանդիսական լինի ու ամեն կերպ փորձի աջակցել: Եկեք նպաստենք այդ հաղթանակների կայացմանը, որ հետո այդ բերկրանքը միասին ապրենք»,- ասել է Կարեն Գիլոյանը:

Արայիկ Հարությունյանն էլ ավելացրել է՝ Կարապի լճում և Հյուսիսային պողոտայում կլինի ֆան գոտի: Հնարավոր է՝ բռնցքամարտիկները ևս երբեմն լինեն ֆան գոտում, շփվեն երկրպագուների հետ:

Հայաստանը ներկայացուցիչներ կունենա բոլոր 13 քաշային կարգերում: Մեր երկրի մարզական պատիվը կպաշտպանեն Բարեղամ Հարությունյանը (48 կգ), Արթուր Հովհաննիսյանը (51 կգ), Ջանիկ Սահակյանը (54 կգ), Արթուր Բազեյանը (57 կգ), Կարեն Տոնականյանը (60 կգ), Հովհաննես Բաչկովը (63,5 կգ), Գուրգեն Մադոյանը (67 կգ), Նարեկ Զախարյանը (71 կգ), Վախթանգ Հարությունյանը (75 կգ), Համբարձում Հակոբյանը (80 կգ), Ռաֆայել Հովհաննիսյանը (86 կգ), Նարեկ Մանասյանը (92 կգ) և գերծանր քաշային Դավիթ Չալոյանը: