Կառավարության օրենսդրական նախաձեռնություններով մի շարք օրենքներ համապատասխանեցվում են ԵԱՏՄ օրենսդրությանը

«Բնակչության բժշկական օգնության և սպասարկման մասին» օրենքում փոփոխություններ կատարելու մասին» և կից նախագծերի փաթեթն ուղղված է բժշկական արտադրատեսակների շրջանառության կարգավորման հստակեցմանը, ինչպես նաև դրա վերաբերյալ Եվրասիական տնտեսական միության շրջանակներում ընդունված կանոններին ՀՀ օրենսդրության ներդաշնակեցմանը:

Առաջարկվում է ուժը կորցրած ճանաչել 1996 թ. ընդունված «Բժշկական օգնության և սպասարկման մասին» օրենքի 2-րդ հոդվածի 1-ին մասի 50-ից 60-րդ կետերը, իսկ 10-րդ գլուխը շարադրել նոր խմբագրությամբ:

Դրույթներից մեկով բժշկական արտադրատեսակների շրջանառության պետական կարգավորման ոլորտում փորձաքննություններն ու մասնագիտական դիտարկումներն իրականացնում է կառավարության որոշմամբ սահմանված ազգային մարմինը: Ոլորտում փորձաքննությունները վճարովի են: Փորձաքննությունների վճարները չեն վերադարձվում՝ անկախ դրանց արդյունքներից:

Հայաստանում բժշկական արտադրատեսակների արտադրությունն իրականացվում է Ստանդարտացման միջազգային կազմակերպության ստանդարտների համաձայն:

Արտադրողը ներդնում և պահպանում է բժշկական արտադրատեսակների որակի կառավարման համակարգ, ինչպես նաև ապահովում է դրա գնահատումը՝ Եվրասիական տնտեսական հանձնաժողովի խորհրդի 2017 թ. նոյեմբերի որոշմամբ հաստատված պահանջների համաձայն:

ՀՀ առողջապահության նախարար Անահիտ Ավանեսյանը նշել է, որ առաջարկվող փոփոխությունների նպատակն է նաև ԵԱՏՄ համապատասխան իրավական ակտերի ընդունումն ու այդ ակտերը ՀՀ իրավունքի մաս դարձնելը: «Սա կարևոր քայլ է որակյալ համակարգ ունենալու համար»,-ասել է Առողջապահության նախարարը: Նա նաև տեղեկացրել է, որ նախնական քննարկումների ընթացքում պատգամավորների ներկայացրած բոլոր առաջարկները ներառվել են օրենսդրական փաթեթի մեջ:

Հանձնաժողովականներն առաջին ընթերցմամբ քննարկել են «Մաքսային կարգավորման մասին» և կից նախագծերի փաթեթը, որի ընդունման անհրաժեշտությունը պայմանավորված է ՀՀ մաքսային կարգավորման մասին օրենսդրությունը «Եվրասիական տնտեսական միության մաքսային օրենսգրքի մասին» 2017 թ. ապրիլի 11-ի պայմանագրով հաստատված՝ ԵԱՏՄ մաքսային օրենսգրքով, ինչպես նաև ԵԱՏՄ շրջանակում ընդունված այլ իրավական ակտերով սահմանված կարգավորումներին համապատասխանեցման հանգամանքով:

Խնդիրն այն է, որ գործող օրենքը չի արտացոլում ԵԱՏՄ նոր մաքսային օրենսգրքով ազգային օրենսդրությունների կարգավորմանը վերապահված դրույթների ամբողջ բովանդակությունը, քանի որ մշակված է եղել ԵԱՏՄ հին մաքսային օրենսգրքի կարգավորումների հիման վրա, իսկ նոր օրենսդրական նախաձեռնության ներկայացումը պայմանավորված է կատարվող փոփոխությունների մեծ ծավալով և օրենքի կառուցվածքի փոփոխությամբ:

Առաջարկվում է սահմանել ԵԱՏՄ մաքսային օրենսգրքով և ԵԱՏՄ շրջանակում մաքսային ոլորտում կիրառվող այլ իրավական ակտերով նախատեսված՝ ազգային օրենսդրություններին վերապահված կարգավորումները:

Կհստակեցվեն արդեն իսկ սահմանված մի շարք կարգավորումներ և «Մաքսային կարգավորման մասին» օրենքի կառուցվածքը կհամապատասխանեցվի գործող ԵԱՏՄ մաքսային օրենսգրքին:

Նախատեսվում է, որ բոլոր դեպքերում դիմումները մաքսային մարմիններին կարող են ներկայացվել նաև էլեկտրոնային եղանակով:

Հայտարարատուի կողմից մաքսատուրքի, հարկերի, մաքսային գործառնությունների իրականացման համար գանձվող պետական տուրքի, հատուկ, հակագնագցման և փոխհատուցման տուրքերի գծով վճարումների իրականացման համար կներդրվի կանխավճարների համակարգ: «Դա հարմարավետ կդարձնի գործարարների գործունեությունը»,- ասել է ՀՀ ֆինանսների նախարարի տեղակալ Արման Պողոսյանը:

Առաջարկվում է նաև հստակեցնել չհավաքված, կազմատված, այդ թվում՝ չկոմպլեկտավորված տեսքով ապրանքների տեղափոխման դեպքում մաքսային հայտարարագրման համակարգը և ստեղծել հնարավորություն կոմպլեկտավորված, ավարտուն ապրանքի վերջին բաղադրիչի համար մաքսային հայտարարագրի ներկայացման ժամկետը (Միության մաքսային օրենսգրքի 117-րդ հոդվածի 8-րդ կետի համաձայն՝ 2 տարի) մեկ տարով երկարաձգելու համար, իսկ լրացուցիչ երկարաձգման անհրաժեշտության դեպքում՝ մինչև 6 տարով:

Ըստ Արման Պողոսյանի՝ նախագծերի փաթեթի ընդունմամբ, ըստ էության, կկարգավորվեն «Եվրասիական տնտեսական միության մաքսային օրենսգրքի մասին» ԵԱՏՄ անդամ պետությունների ազգային օրենսդրությանը վերապահված հարաբերությունները, կսահմանվեն մաքսային ոլորտում իրավախախտումների մասով պատասխանատվության միջոցները:

Մի շարք մասնագիտական հարցեր է բարձրաձայնել ԱԺ պատգամավոր, հանձնաժողովի անդամ Խաչատուր Սուքիասյանը, որոնք առնչվել են բնագավառում առկա խնդիրներին:

Արման Պողոսյանն առաջարկել է այդ հարցերի վերաբերյալ կազմակերպել աշխատանքային քննարկումներ:

Օրենսդրական փաթեթները քննարկվել և դրական եզրակացություն են ստացել ԱԺ տարածաշրջանային և եվրասիական ինտեգրման հարցերի մշտական հանձնաժողովի մայիսի 30-ի նիստում: