Օրենսդրական նախաձեռնությամբ պրոբացիայի ծառայության ներքին կանոնակարգը կհաստատի ՀՀ կառավարությունը

ՀՀ քրեական դատավարության եւ քրեակատարողական նախկին օրենսգրքերում նախատեսված են եղել դրույթներ, որոնց համաձայն` ծանր հիվանդության հետեւանքով պատժից ազատելու, ինչպես նաեւ բժշկական բնույթի հարկադրանքի միջոցներ կիրառելու հետ կապված հարցերի առնչությամբ բժշկական հանձնաժողովները ներկայացրել են եզրակացություն: Այս համատեքստում ՀՀ արդարադատության նախարարի տեղակալ Երանուհի Թումանյանցը նշել է, որ վերոնշյալ օրենսգրքերում հստակ ամրագրված չի եղել այն լիազորող նորմը, ըստ որի կամրագրվեր, որ բժշկական հանձնաժողով ստեղծելու կարգը սահմանում է Կառավարությունը, տեղեկացնում է ԱԺ կայքը։

Ներկայում անհրաժեշտություն է առաջացել օրենքով սահմանել առանձին դրույթ, որի համաձայն` պրոբացիայի ծառայության ներքին կանոնակարգը կհաստատի ՀՀ կառավարությունը` ՀՀ արդարադատության նախարարի ներկայացմամբ:

ԱԺ պետական-իրավական հարցերի մշտական հանձնաժողովը հուլիսի 4-ի արտահերթ նիստում առաջին ընթերցմամբ քննարկել է Կառավարության հեղինակած «ՀՀ քրեակատարողական օրենսգրքում լրացումներ կատարելու մասին», «ՀՀ քրեական դատավարության օրենսգրքում լրացում կատարելու մասին» եւ ««Պրոբացիայի մասին» ՀՀ օրենքում լրացում կատարելու մասին» օրինագծերի փաթեթը:

Արդարադատության փոխնախարարի տեղեկացմամբ` խորհրդարանն արդեն երկրորդ ընթերցմամբ ընդունել է ՀՀ քրեակատարողական նոր օրենսգիրքն ու ««Ձերբակալված եւ կալանավորված անձանց պահելու մասին» օրենքում փոփոխություններ եւ լրացումներ կատարելու մասին» օրինագիծը, որով արդեն լուծվել են բժշկական հանձնաժողովների գործունեության կարգին առնչվող լիազորող նորմերի հարցերը: Բացի այդ, հուլիսի 1-ից ուժի մեջ է մտել ՀՀ քրեական դատավարության նոր օրենսգիրքը, որի արդյունքում, ըստ զեկուցողի, ուժը կորցրած ճանաչված օրենսգրքում վերոնշյալ փոփոխությունների եւ լրացումների կատարման անհրաժեշտությունը բացակայում է: Ուստի, գործադիրն առաջարկում է ներկայացված փաթեթից հանել «ՀՀ քրեակատարողական օրենսգրքում լրացումներ կատարելու մասին» եւ «ՀՀ քրեական դատավարության օրենսգրքում լրացում կատարելու մասին» օրինագծերը:

Հարակից զեկուցող, պատգամավոր Արփինե Դավոյանը նշել է, որ փոփոխությունը տեխնիկական բնույթի է եւ առաջարկել է հանձնաժողովին տալ դրական եզրակացություն:

Հանձնաժողովը հավանության է արժանացրել ««Պրոբացիայի մասին» ՀՀ օրենքում լրացում կատարելու մասին» օրենքի նախագիծը. այն կընդգրկվի առաջիկայում գումարվելիք ԱԺ արտահերթ նստաշրջանի օրակարգում:

Երկրորդ ընթերցմամբ քննարկվել է Կառավարության հեղինակած ««Հայաստանի Հանրապետության դատական օրենսգիրք» սահմանադրական օրենքում փոփոխություններ եւ լրացում կատարելու մասին» օրենքի նախագիծը: Այն ներկայացրել է ՀՀ արդարադատության նախարարի տեղակալ Գրիգոր Մինասյանը: Նախատեսվում է մինչեւ 15 տարվա վաղեմություն ունեցող ՄԻԵԴ վճիռներով բացահայտված խախտումներով դատավորի նկատմամբ հարուցել կարգապահական վարույթներ: Զեկուցողի խոսքով` առաջինից երկրորդ ընթերցում գործադիրը նախագծում կատարել է հստակեցումներ, տեխնիկական խմբագրումներ:

Նիստը վարող հանձնաժողովի նախագահի տեղակալ Վահագն Հովակիմյանն ընդգծել է, որ հանձնաժողովում նախագծի առաջին ընթերցմամբ քննարկման ընթացքում պատգամավորների բարձրացրած խնդիրները լուծվել են: Պատգամավորը կոչ է արել կողմ քվեարկել նախաձեռնությանը:

Կառավարության կողմից լրամշակված նախագիծը ստացել է դրական եզրակացություն: