Օրենսդրական նախաձեռնություններ՝ ուղղված հաշմանդամություն ունեցող անձանց իրավունքների պաշտպանությանը

Ներհամայնքային փոխադրումների ժամանակ հաշմանդամություն ունեցող ուղևորների տեղափոխման իրավունքն ապահովելու նպատակով պատգամավոր Զարուհի Բաթոյանը փոփոխություն և լրացումներ է առաջարկում «Ավտոմոբիլային տրանսպորտի մասին» օրենքում:

Հարցը երկրորդ ընթերցմամբ քննարկվել է Աշխատանքի և սոցիալական հարցերի մշտական հանձնաժողովի հուլիսի 12-ի արտահերթ նիստում:

Հեղինակն առաջարկում է սահմանել հաշմանդամություն ունեցող անձանց համար մատչելիության պարտադիր պահանջ՝ ներհամայնքային փոխադրումներ իրականացնելու մրցույթին ներկայացվող տրանսպորտային բոլոր միջոցների համար:

Հեղինակի մյուս առաջարկները՝ այստեղ:

Առաջին ընթերցումից հետո եզրափակիչ և անցումային դրույթներում առաջարկներ են ներկայացրել կառավարությունը և հեղինակը: Գործադիրն առաջարկում է օրենքի ուժի մեջ մտնելու ժամկետը տեղափոխել մինչև 2023 թ․ հունվարի 1-ը, ինչը հեղինակն ընդունել է:

Կառավարության ներկայացուցիչ, ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանն ընդգծել է, որ համապատասխան փոփոխություններ կկատարվեն թե՛ ավտոկայարանային գործունեության կազմակերպման, թե՛ մրցութային կարգերի վերաբերյալ կառավարության որոշումներում:

Նախաձեռնությունն արժանացել է հանձնաժողովի հավանությանը:

Երկրորդ ընթերցմամբ քննարկվել և դրական եզրակացություն է ստացել նաև պատգամավոր Զարուհի Բաթոյանի հեղինակած «ՀՀ աշխատանքային օրենսգրքում փոփոխություններ և լրացումներ կատարելու մասին» օրենքի նախագիծը:

Հեղինակը հիշեցրել է, որ նախաձեռնությունը վերաբերում է հաշմանդամություն ունեցող անձանց աշխատանքային իրավունքների իրացմանը: Առաջարկվում է հաշմանդամություն ունեցող աշխատողների համար նախատեսված երաշխիքներում սահմանել, որ հաշմանդամություն ունեցող անձ ճանաչվելուց հետո աշխատողն իր աշխատանքային պարտականությունների պատշաճ կատարման կամ նույն գործատուի մոտ այլ աշխատանքի անցնելու նպատակով կարող է դիմել գործատուին՝ խելամիտ հարմարեցումներ ստանալու համար:

Պատգամավորն առաջարկում է կազմակերպությունների պարտավորություններում ամրագրել աշխատողների տեղահանման պլանի առկայությունը, որը, ըստ Զարուհի Բաթոյանի, պետք է կազմված լինի հաշմանդամություն ունեցող անձանց կարիքների հիման վրա:

Կատարվել են նաև խմբագրական փոփոխություններ:

Հեղինակը հանդես է եկել առաջարկներով, մասնավորապես, 118-րդ հոդվածի 1-ին մասի երկրորդ նախադասությունը վերաշարադրել հետևյալ խմբագրմամբ. «Աշխատողի աշխատունակությունը չվերականգնելու և հաշմանդամություն ունեցող անձ ճանաչվելու դեպքում գործատուն սույն գլխով նախատեսված հիմքերով կարող է լուծել աշխատանքային պայմանագիրը, եթե առկա է հակացուցման մասին լիազոր մարմնի կողմից տրված համապատասխան եզրակացություն տվյալ աշխատանքով զբաղվելու վերաբերյալ»:

Առաջինից երկրորդ ընթերցում կառավարությունը ներկայացրել է տեխնիկական և խմբագրական առաջարկներ՝ դրանց մեծ մասն ընդունվել է հեղինակի կողմից:

Հարակից զեկուցող, ՀՀ աշխատանքի և սոցիալական հարցերի նախարարի տեղակալ Ռուբեն Սարգսյանը նշել է, որ նախագծի վերաբերյալ կառավարության դիրքորոշումը դրական է: