Սաղմոն ձկան համար ապրելու միջավայր հանդիսացող լիճը ճահճանում է. Սեյրան Մինասյանը՝ Սևանի ջրի կանաչելու մասին

Սևանա լճի ջրի կանաչելու մասին խոսակցությունները ծայր առան մոտ մեկ ամիս առաջ՝ համացանցում տեսանյութի հրապարակումից հետո: «Սևան» ազգային պարկի տնօրենը ջուրը խմեց, առողջապահության նախարարն էլ ջուրը մտավ՝ համոզելու համար, որ ջուրն ընդամենը ծաղկել է, կանցնի, բայց բնապահպաններն էլ ահազանգեցին, թե Սևանը ճահճանում է, ջուրը, հնարավոր է, թունավոր լինի:

Այդպիսի կարծիքներն անհիմն համարելով՝ ափամերձ հանգստյան գոտիների մի խումբ տնտեսվարողներ և վարձակալներ էլ երեկ բողոքի ակցիա իրականացրին՝ պնդելով, թե այդ տեսակետների պատճառով կտրուկ նվազել է հովեկների և զբոսաշրջիկների հոսքը:

Ի վերջո. ինչո՞ւ է կանաչել Սևանը, և արդյո՞ք այն վտանգավոր է: Այս հարցերն այսօր հնչեցվեցին մամուլի ակումբներից մեկում, քիմիական գիտությունների թեկնածու Սեյրան Մինասյանն էլ իր տեսակետն արտահայտեց: Նրա խոսքերով՝ Սևանա լճում շատ բարձր են սնուցիչ նյութերի կոնցենտրացիաները, ջրի մակարդակն էլ ցածր է, ինչը նպաստել է լճի կանաչելուն: Ջուրը խիստ հարստացած է ազոտով, ֆոսֆորով և կենսածին այլ նյութերով, և քանի որ այս տարի էլ ջերմաստիճանը բարձր է, դա հանգեցրել է կենսածին պրոցեսների, որոնք էլ նպաստում են արագ ճահճացմանը:

«Ի՞նչ է նշանակում ինչքանով են վտանգավոր կամ ոչ վտանգավոր: Ջրիմուռների առկայությունը ճահճացման պրոցեսի ցուցիչ է: Նշանակում է լիճը ճահճանում է: Մաքուր, քաղցրահամ, սաղմոն ձկի համար ապրելու միջավայր հանդիսացող լիճը ճահճանում է, էլ ի՞նչ պետք է լինի դրանից ավելի: Եթե դուք սեպտեմբերին գնաք, վստահաբար հոտից չեք կարող ափին մոտենալ»,- լրագրողների հետ հանդիպման ժամանակ նշեց Սեյրան Մինասյանը:

Սովորաբար կենսաբանական պրոցեսները կարող են միանգամից հանգեցնել ողբերգական հետևանքների: Բոլորին թվում է, թե երբ ասում են՝ լճի վատ, անհավասարակշիռ վիճակ կամ ճահճացում, դա դանդաղ ու երկարատև գործընթաց է, սակայն գիտական փաստերն այլ բան են փաստում՝ նշում է Քիմիական ֆիզիկայի ինստիտուտի ավագ գիտաշխատողը:

Որպեսզի էկոհամակարգը կայունանա, պետք է ջրի մակարդակը բարձրացվի, թե որքան՝ գիտաշխատողն այս պահին դժվարանում է նշել: Պետք է նոր մոդելավորում իրականացվի: Սակայն դեռ խորհրդային տարիներին այդպիսի ուսումնասիրություններ կատարել են և որոշել ջրի մակարդակը բարձրացնել մինչև 1903,5 մետր: Ըստ Մինասյանի՝ այն ժամանակվա համեմատ տեղի են ունեցել աղետալի պրոցեսներ, որոնց արդյունքում էլ ճահճացումից փրկելու համար ջրի մակարդակի 1903,5 մետր բարձրացումը բավական չէ, շատ է հարկավոր: Այսքանից հետո ավելորդ է պնդել, որ Սևանից հավելյալ ջրառ իրականացնելն անթույլատրելի է: