Ադրբեջանում բարձրացված աղմուկն ու աշխարհաքաղաքական անհավասարակշռությունը․ զրույց քաղաքագետի հետ

Ադրբեջանն օրերս Շուշիում հերթական խորհրդաժողովն էր կազմակերպել։ 44-օրյա պատերազմի հետևանքով ադրբեջանական վերահսկողության ներքո հայտնված քաղաք Բաքվի հրավերով 40 դիվանագետ էր այցելել։ Պաշտոնական Բաքվի հրավերն անտեսել էին ԱՄՆ-ն ու Ֆրանսիան։ Այդ երկրների դեսպանները չէին մասնակցել Շուշիում անցկացվող խորհրդաժողովին, ինչն էլ Բաքվում մեծ աղմուկ է բարձրացրել։ «Հորիզոնին» տված հարցազրույցում քաղաքագետ Ռոբերտ Ղևոնդյանը մեկնաբանել է ԱՄՆ-ի ու Ֆրանսիայի այդ քայլն ու անդրադարձել աշխարհաքաղաքական թատերաբեմում տեղի ունեցող մի շարք այլ երևույթների։

«Աշխարհն այս պահին գտնվում է անհավասարակշիռ վիճակում, խնդիրներ կան հավաքական Արևմուտքի, ռուս-թուրքական առանձին-առանձին հարթությունների հետ։ Աշխարհաքաղաքական առումով Արևմուտքին անհրաժեշտ է բոլոր տարածաշրջաններում բոլոր հարցերում ցույց տալ, որ սեփական շահերն անտեսել որևէ մեկին թույլ չի տրվի։ Բնական է, որ Ադրբեջանում աղմուկ է բարձրացել, որովհետև այդ ռուս-թուրքական համաձայնությունը եթե Ուկրաինայում, Սիրիայում կամ մեկ այլ հարթությունում կարող է խնդիրներ ունենալ, կարծես թե մեր տարածաշրջանում, գոնե Մերձավոր Արևելքի մեր հատվածում փոխլրացնում է, և Ադրբեջանն այստեղ օգտվում է մինչև իր վերջին կետը։ Այդ պատճառով էլ Ֆրանսիայի, ԱՄՆ-ի կամ ցանկացած այլ քաղաքակրթական կենտրոնի կողմից եթե լինի ինչ-որ կերպ հակազդեցություն, Ադրբեջանում աղմուկ կբարձրացվի։ Ադրբեջանը փորձելու է դիմագրավել, որովհետև դա մարտահրավեր է իրենց համար, հակառակ կողմից էլ մեզ համար դա հնարավորություն է, որի շուրջ պետք է աշխատել»,- նշեց քաղաքագետը։

Ըստ նրա՝ պետք է ո՛չ ոգևորվել, և ո՛չ էլ հիասթափվել, քանի որ էմոցիոնալ ֆոնը քաղաքականության մեջ միայն խնդիրներ է ստեղծում, լավ կլինի սառը գլխով նստել, մտածել և աշխատել այդ ուղղությամբ։

«Դա հնարավորություն է, որն այս պահին կա ու վաղը կարող է և չլինել, որովհետև, ինչպես նշեցի, աշխարհը գտնվում է անհավասարակշիռ փուլում, և կարող է ամեն պահի ամեն ինչ փոխվել։ Որպեսզի այս պահին կարողանանք դրանից օգտվել, պետք է փորձել տեսնել թե որտեղ տեղավորել մեր շահերը, և այդ շահերը փորձել իրացնել։ Առաջին հերթին փորձել աշխատել Արևմուտքի հետ, փորձել աշխատել այն քաղաքակրթական կենտրոնների հետ, որոնք ունեն հակասող շահեր կոնկրետ ռուս-թուքական համաձայնության և Ադրբեջանի այդ էքսպանսիոնիստական մղումների հետ կապված։ Այս տարածաշրջանում ռուս-թուրքական համաձայնության դեմ Հայաստանը միայնակ որևէ անելիք չունի, և անհրաժեշտ է ներգրավվել այլ դերակատարներ։ Այստեղ մենք տեսնում ենք, որ այդ դերակատարները նույնիսկ իրենց շահերի համար են ներգրավվում, և սա շատ լավ հնարավորություն է մեզ համար, որպեսզի կարողանանք այդ դերակատարների միջոցով ցրել այսպես կոչված «3+3»-ների կամ նմանատիպ այլ հարթակների կոնկրետ ուղիղ ճնշումը Հայաստանի վրա, և կարողանալ այլ հարթակների միջոցով մեզ համար քիչ թե շատ նպաստավոր պայմաններ ձեռք բերել»,- ասաց Ռոբերտ Ղևոնդյանը։

Մանրամասները՝ ամբողջական հարցազրույցում։