Կառավարությունն ազդարարման համակարգը բարելավելուն ուղղված քայլեր է նախաձեռնել

«Ազդարարման համակարգի մասին» և մի շարք այլ օրենքներում առաջարկվող փոփոխությունները պայմանավորված են ազդարարման համակարգի զարգացման և կատարելագործման, ստանձնած միջազգային պարտավորությունների կատարման անհրաժեշտությամբ: ԱԺ կայքի փոխանցմամբ՝ այս մասին սեպտեմբերի 12-ի ԱԺ նիստում հայտնել է ՀՀ արդարադատության նախարարի տեղակալ Երանուհի Թումանյանցը՝ ներկայացնելով հիմնական կարգավորումները:

Օրենսդրական փոփոխությամբ առաջարկվում է ազդարարման հետ կապված հարաբերությունները տարածել նաև մասնավոր ոլորտի կազմակերպությունների և համայնքային կազմակերպությունների վրա, նախատեսել կոռուպցիոն բնույթի հանցագործություն չհանդիսացող իրավիճակներում ազդարարում տալու, այդ թվում՝ անանուն ազդարարելու հնարավորությունը՝ միաժամանակ սահմանելով ազդարարման նման դեպքերը քննող իրավասու մարմին: Առաջարկվող կարգավորումների մանրամասները՝ այստեղ:

Պատգամավոր Վլադիմիր Վարդանյանը հարցուպատասխանի ձևաչափում կարծիք է հայտնել, որ գործող օրենքին չհամապատասխանող իրավիճակ է ստեղծվել և հետաքրքրվել ոլորտի վիճակագրությամբ:

Ներկայացնելով վիճակագրական տվյալները՝ Երանուհի Թումանյանցը նշել է, որ 2019 թ. Գլխավոր դատախազություն ստացվել է 188 ազդարարում, որոնք վերաբերել են առերևույթ կոռուպցիոն բնույթի դեպքերին: Դրանցից 153-ը եղել է անանուն: 2020 թ. ազդարարման համակարգի միջոցով ստացվել է 140 ազդարարում, որից 119-ը եղել է անանուն: 2021 թ. ստացված 75 ազդարարումից 68-ը վերաբերել են առերևույթ կոռուպցիոն բնույթի դեպքերին, 70-ը եղել է անանուն: 2022 թ. տվյալները դեռևս չեն ստացվել:

Հերիքնազ Տիգրանյանն էլ կարևորել է այն հանգամանքը, որ ազդարարումը պետք է լինի ոչ միայն կոռուպցիոն հանցագործությունների, այլ նաև՝ շահերի բախման, անհամատեղելիության, նաև կոռուպցիոն ռիսկերի մասով: Ըստ պատգամավորի՝ օրենքի չգործելը պայմանավորված է ոչ միայն կարգավորումների թերացմամբ, այլ նաև՝ հանրային մտածելակերպով, քանի որ ազդարարումը մեր հասարակության մեջ չի ընկալվում աջակցություն իրավապահ համակարգին կամ անհանդուրժողականություն կոռուպցիայի նկատմամբ:

Երանուհի Թումանյանցը հստակեցրել է, որ կառավարությունն ազդարարման համակարգի զարգացման ուղղությամբ միջոցներ է ձեռնարկել, այդ թվում ընդունել է հաղորդակցության ծրագիրը, որով հստակ ազդարարվելու է այս համակարգի մասին: Նա նշել է, որ օրենքի փոփոխությունները քննարկվել են շահագրգիռ ուժերի, նաև՝ միջազգային գործընկերների հետ: Փոխնախարարի խոսքերով՝ հանրությանն օրենքի մասին ազդարարումն ավելի ընդգրկուն կլինի՝ շեշտը դնելով անանունության վրա, որպեսզի մարդիկ իրենց պաշտպանված զգան: «Հարցումները ցույց են տալիս, որ հաճախ ազդարարողները զերծ են մնում ազդարարումից, քանի որ վախենում են վենդետայից ու հետևանքներից»,- ասել է Երանուհի Թումանյանցը:

ՀՀ ԱԺ նախագահ Ալեն Սիմոնյանը, դիմելով փոխնախարարին, նշել է, որ պետք է հետամուտ լինել քաղաքում տեղադրված ազդարարող պաստառները վերացնելու կամ դրանք նորով փոխարինելու հարցում: Երանուհի Թումանյանցը վստահեցրել է՝ միջոցներ են ձեռնարկվում, որ ազդարարումը չլինի միայն պաստառներով և թռուցիկներով:

«Առաջինից երկրորդ ընթերցում վիճահարույց հարցերը հանգամանալի քննարկելու պայմանավորվածություն է ձեռք բերվել»,- հարակից զեկույցում ասել է ԱԺ պետական-իրավական հարցերի մշտական հանձնաժողովի նախագահի տեղակալ Վահագն Հովակիմյանը:

Պատգամավոր Վիգեն Խաչատրյանի գնահատմամբ՝ ոլորտում հաջողության չենք հասնի, եթե մեր հասարակության առանձնահատկությունները հաշվի չառնենք: Նրա խոսքերով՝ կարելի է միջազգային չափանիշներին համապատասխանող օրենք գրել, որը չաշխատի: Պատգամավորը համոզված է, որ անանունությանը վերաբերող դրույթը պետք է հանվի. դա ծնելու է կոռուպցիա, չարաշահում:

Վլադիմիր Վարդանյանը ևս կարծիք է հայտնել, որ պետք է հաշվի առնվեն այս ոլորտում մեր երկրի առանձնահատկությունները: «Մենք չափազանց կարևորում ենք կոռուպցիայի դեմ պայքարը, կարևոր է նման նախագիծը, բայց մենք պետք է ունենանք նախագիծ, որը պետք է գործի, ոչ թե վերածվի նախագծի, որն ուղղված է պարզապես ազդարարների պաշտպանությանը: Այն պետք է ուղղված լինի ազդարարների պաշտպանության միջոցով երկրում կոռուպցիան արմատախիլ անելուն»,- ասել է պատգամավորը: