Քննարկվել են հարկային օրենսդրությունը կարգավորող համաձայնագրեր

«Ներմուծման մաքսատուրքերի (համարժեք այլ տուրքերի, հարկերի և վճարների) գումարները հաշվեգրելու և բաշխելու, դրանք որպես եկամուտ Եվրասիական տնտեսական միության անդամ պետությունների բյուջեներ փոխանցելու կարգի պահպանման հարցերին ուղղված համատեղ վերահսկիչ միջոցառումների անցկացման մասին» համաձայնագրով կկանոնակարգվի ԵԱՏՄ անդամ պետությունների բարձրագույն վերահսկիչ մարմինների կողմից մաքսատուրքերի հավաքագրման և բաշխման գործընթացի նկատմամբ հսկողությունը: Առաջարկվում է կարգավորել համատեղ վերահսկիչ միջոցառումների իրականացման նպատակները, սկզբունքներն ու ընթացակարգերը: Համատեղ վերահսկիչ միջոցառումներ անցկացնելու համար կազմվելու է համատեղ միջոցառումների իրականացման ծրագիր, որը մշակելու է ԵԱՏՄ անդամ այն պետության ֆինանսական վերահսկող բարձրագույն մարմինը, որը համատեղ վերահսկիչ միջոցառում իրականացնելու տարում նախագահում է ԵԱՏՄ մարմիններում, տեղեկացնում է ԱԺ կայքը։

ԵԱՏՄ անդամ պետության պատկան մարմինները պարտավոր են վերացնել հայտնաբերված խախտումները և այդ մասին տեղեկացնել իրենց կառավարություններին ու ֆինանսական վերահսկողություն իրականացնող բարձրագույն մարմիններին:

Համաձայնագրով առաջարկվող կարգավորումներն ԱԺ սեպտեմբերի 12-ի հերթական նիստում ներկայացրել է ՀՀ ֆինանսների նախարարի տեղակալ Արման Պողոսյանը:

ԱԺ տարածաշրջանային և եվրասիական ինտեգրման հարցերի մշտական հանձնաժողովը քննարկվող հարցի վերաբերյալ տվել է դրական եզրակացություն: Այս մասին հայտնել է հանձնաժողովի անդամ Ալեքսեյ Սանդիկովը:

ՀՀ ֆինանսների փոխնախարարը քննարկման է ներկայացրել նաև ««Ներմուծման մաքսատուրքերի (համարժեք այլ տուրքերի, հարկերի և վճարների) գումարները հաշվեգրելու և բաշխելու, դրանք որպես եկամուտ Եվրասիական տնտեսական միության անդամ պետությունների բյուջեներ փոխանցելու կարգի պահպանման հարցերին ուղղված համատեղ վերահսկիչ միջոցառումների անցկացման մասին» համաձայնագիրը վավերացնելու մասին» օրինագիծը:

Նախատեսվում է պայքար ագրեսիվ միջազգային հարկային պլանավորման միջոցով հարկումից խուսափելու երևույթների դեմ: Օրենսդրությունը հնարավորություն կտա շահույթները հարկել այն երկրում, որտեղ կազմակերպվում է իրական տնտեսական գործունեություն և ստեղծվում է իրական նոր արժեք: Երկրները երկկողմ հարկային հարաբերություններ կառուցելիս ամեն անգամ ստիպված չեն լինի փոփոխություններ կատարել փոխադարձաբար միմյանց միջև կնքված երկկողմ համաձայնագրերում: Ըստ Արման Պողոսյանի՝ սա հնարավորություն է՝ խուսափելու յուրաքանչյուր անգամ վերաբանակցելու համաձայնագրերի այս կամ այն դրույթների շուրջ: «Միանալով այս բազմակողմ կոնվենցիային՝ մենք իրավունք կստանանք այդ կարգավորումները կիրառել մեր հարկային վարչարարության շրջանակում»,- ասել է փոխնախարարը:

Տնտեսական հարցերի մշտական հանձնաժողովի անդամ Հովիկ Աղազարյանը ներկայացրել է հանձնաժողովի դրական եզրակացությունը:

Արման Պողոսյանը, ներկայացնելով «Հայաստանի Հանրապետության և Շվեյցարիայի Համադաշնության միջև՝ 2006 թվականի հունիսի 12-ի` ««Հայաստանի Հանրապետության և Շվեյցարիայի Համադաշնության միջև եկամուտների և գույքի հարկերի առնչությամբ կրկնակի հարկումը բացառելու մասին» կոնվենցիայում փոփոխություններ կատարելու վերաբերյալ արձանագրությունը վավերացնելու մասին» օրենքի նախագիծը, նշել է, որ 2021 թ. նոյեմբերի 12-ին ստորագրված արձանագրությունը նպատակ ունի թարմացնել դեռևս 2006 թ. Հայաստանի և Շվեյցարիայի միջև գործող համաձայնագիրը: Ըստ հիմնավորման՝ արձանագրության ընդունումը լրացուցիչ ֆինանսական միջոցների անհրաժեշտություն չի պահանջում, իսկ դրա ընդունմամբ պայմանավորված՝ պետական բյուջեի եկամուտների էական նվազեցում կամ ծախսերի ավելացում տեղի չի ունենա:

Նախագծին ԱԺ տնտեսական հարցերի մշտական հանձնաժողովը դրական եզրակացություն է տվել: