«Բացառել թերի նախագծերի մշակումը. բարեկարգվող տարածքներում պետք է համալիր մոտեցում ցուցաբերվի». Երևանի քաղաքապետ

Մայրաքաղաքում ընթացքի մեջ է հեղեղատար համակարգերի մաքրման գործընթացը: Աշխատանքային հերթական խորհրդակցության ժամանակ Երևանի քաղաքապետ Հրաչյա Սարգսյանը «Վեոլիա Ջուր» ընկերությանն առաջարկել է ըստ հասցեականության հեղեղատարների վերաբերյալ տեղեկատվությունը տրամադրել նաև քաղաքապետարանին: Վարչական շրջանների ղեկավարներին հանձնարարվել է շրջայցերի միջոցով, ըստ հասցեների գրանցել խնդիրները, որպեսզի տեղումների ժամանակ հեղեղումներ չլինեն:

Ամփոփելով աշխատանքային շրջայցերի արդյունքները՝ Երևանի քաղաքապետը բարեկարգվող տարածքները ծրագրում ոչ լիարժեք ընդգրկելու վերաբերյալ իր դժգոհությունն է հայտնել: Հրաչյա Սարգսյանը հանձնարարել է բացառել թերի նախագծերի մշակումը և հետևել, որպեսզի բարեկարգման ծրագրերը կրեն համալիր բնույթ:

«Շտապբուժօգնություն» ընկերության զանգերի կենտրոնում ներդրված համակարգն առավել արդյունավետ է դարձրել կանչերի արձագանքման գործընթացը: Օրական՝ 1-03 հեռախոսահամարի մուտքային 20-30 հեռախոսազանգ հետադարձ կապի հնարավորություն է ստանում:

Անվտանգության ապահովման նպատակով էտվում և հեռացվում են ճանապարհային երթևեկության նշաններին խանգարող ճյուղերը: Խնդրահարույց հասցեները տրամադրվում են «Կանաչապատում և շրջակա միջավայրի պահպանություն» ՀՈԱԿ-ին, աշխատանքները կրում են պարբերական բնույթ:

Երևանի քաղաքապետարանը ոստիկանության հետ համատեղ քաղաքի տարբեր հատվածներում շարունակում է ուժեղացված ստուգայցերը՝ բացօթյա ապօրինի առևտուրն արգելելու ուղղությամբ: Զեկուցվել է, որ վերջին շաբաթում ապօրինի փողոցային առևտրի 36 արձանագրություն է կազմվել վարչական իրավախախտման վերաբերյալ։ Ընթացքում է գտնվում 112 վարչական վարույթ։

Երևանի քաղաքապետարանը շարունակում է տնտեսվարողների ծանուցման գործընթացը՝ անշարժ գույքի և դրան հարակից ընդհանուր օգտագործման տարածքի պարտադիր բարեկարգման վերաբերյալ: Բազայում առկա 14167 տնտեսվարողից շուրջ 70%-ն արդեն ծանուցվել է: Քաղաքապետը հանձնարարել է մշտական հսկողության տակ պահել գործընթացը՝ հաշվի առնելով, որ ձմռան ամիսներին ևս, սահմանված կարգի համաձայն, տնտեսվարողները պարտավոր են ձյան ու սառույցի կուտակումներից մաքրել մայթերը:

Աղբահանությունն առավել արդյունավետ կազմակերպելու նպատակով մայթերի փոքր աղբամանների մեջ տեղադրվել են պոլիէթիլենային տոպրակներ: