Մեր երկրին վայել չէ, որ նախագահական ինստիտուտն այդպես խայտառակեն. Հրանտ Մարգարյան

ՀՅԴ Բյուրոյի ներկայացուցիչ Հրանտ Մարգարյանի կարծիքով՝ մեր երկրին վայել չէ, որ նախագահական ինստիտուտն այդպես խայտառակեն: Այս մասին «Ազատության» հետ զրույցում նշեց Մարգարյանը՝ անդրադառնալով ՀՀ երկրորդ նախագահ Ռոբերտ Քոչարյանի կալանավորմանը: Նա ընդգծեց՝ կատարվածը մեր երկրին վայել չէ ոչ թե անցյալի, այլ ապագայի առումով. դա ճիշտ մեթոդ չէ:

«Ռոբերտ Քոչարյանը կարող է ինքն իրեն պաշտպանել, ես շահ չունեմ նրան պաշտպանելու, ես պաշտպանում եմ սկզբունքը՝ նախագահական ինստիտուտը պետք է մեր երկրում հարգվի, դրա համար եթե նույնիսկ պարտավոր ենք գին վճարել, պետք է կարողանանք այդ գինը վճարել: 1996թ. Լևոն Տեր-Պետրոսյանը տանկեր դուրս բերեց փողոց, եթե անաչառ ենք, բա ինչո՞ւ դա չենք քննում: Ես չեմ ասում՝ քննենք, ասում եմ՝ պետք չէ անցյալը այնպես խառնել իրար, որ այսօրվա և վաղվա մեր կյանքը վտանգվի»,- ասաց նա:

Մարգարյանը նշեց, որ չի կարող ասել՝ Ռոբերտ Քոչարյանը քաղհալածյալ է, թե ոչ, այդ մասին կխոսի ինքը՝ երկրորդ նախագահը, սակայն ինքն ունի այդ մտահոգությունը, որ կատարվածը քաղաքական հալածանքի տպավորություն կթողնի:

Անդրադառնալով ՀՀ վարչապետ Նիկոլ Փաշինյանի «Ով իրեն ազգային համաձայնության կառավարությունից դուրս է զգում, ոչ մեկին չենք պահում» արտահայտությանը՝ ՀՅԴ Բյուրոյի ներկայացուցիչը շեշտեց՝ Փաշինյանը ճիշտ է ասում, նա չի կարող իրենց բռնել և պահել:

«Բայց մի բան էլ կա. ինքն է մեզ հրավիրել, մենք չենք խցկվել, ընդառաջել ենք իր հրավերին, նա ուզենա էլ՝ չի կարող մեզ պահել, մենք երբ ուզենք, դուրս կգանք: Հարցն այն է՝ մենք մի երկրում ենք, որտեղ ամեն ինչ հստակ չէ»,- ասաց նա՝ մասնավորեցնելով. երբ իրենք ասում են՝ Ռոբերտ Քոչարյանը կարող է քաղհալածյալ թվալ, և դա իրենց մտահոգում է, Փաշինյանն իրենց չի պատասխանում:

«Ֆեյսբուքում մեզ վրա հարձակվում են, հայհոյում, նա չի խառնվում, դա տեռորի մթնոլորտ է, խոսքը սրա մասին է. ինձ թվում է՝ Նիկոլ Փաշինյանը մի բան է անում, շրջապատը՝ այլ»,- ասաց նա:

Մարգարյանն ասաց, որ նույնը Ռուսաստանի Դաշնության հարցում էլ Փաշինյանը փորձում է հայ-ռուսական հարաբերությունները կարգավորել, իսկ նրա շրջապատը հակառուսական հիստերիա է առաջացնում, վարչապետի արածը փչանում է:

«Ես Նիկոլ Փաշինյանի հետ խնդիր չունեմ, խնդիր ունեմ այն մթնոլորտի հետ, որ ստեղծվում է իր անունով, իր շրջապատում, և ինքը չի միջամտում: Մենք սրա՞ համար ենք հեղափոխություն արել, «Նոր Հայաստան» սա՞ է նշանակում, այսինքն՝ ոչ ոք կարծիք հայտնել չի՞ կարող: Կարող է՝ մեր տեսակետը սխալ է, թող բանավիճեն, թող ապացուցեն, որ մեր տեսակետը սխալ է, ոչ թե հայհոյեն. երբ հայհոյում են, ինքնաբերաբար ստեղծում են հակազդեցություն»,- նշեց Մարգարյանը:

ՀՅԴ Բյուրոյի ներկայացուցիչն ընդգծեց՝ ի վերջո, ժողովուրդը 6 ամիս, 8 ամիս կարող է սպասել, բայց վերջում կցանկանա տեսնել շոշափելի արդյունք: Իբրև կառավարության մաս կազմող ուժի ներկայացուցիչ՝ Մարգարյանը հիշեցրեց, որ իրենք նախկինում ևս կառավարության մաս են եղել, սակայն մի շոշափելի տարբերությամբ.

«Ոնց որ այսօր ենք մաս կազմում, այնպես էլ այն ժամանակ՝ մի տարբերությամբ, այն ժամանակ հարգվում էինք, լսվում էինք»: