Խորհրդարանը քննարկել է Կենտրոնական բանկի նախագահի տեղակալի ընտրության հարցը․ ՔՊ-ն առաջարկել է Արմեն Նուրբեկյանի թեկնածությունը

ՀՀ ԱԺ ֆինանսավարկային եւ բյուջետային հարցերի մշտական հանձնաժողովը Կենտրոնական բանկի նախագահի տեղակալի թափուր տեղի համար Ազգային ժողովին է առաջարկել «Քաղաքացիական պայմանագիր» խմբակցության կողմից ներկայացված Արմեն Ռոբերտի Նուրբեկյանի թեկնածությունը:

ԱԺ ֆինանսավարկային եւ բյուջետային հարցերի մշտական հանձնաժողովի նախագահ Գեւորգ Պապոյանը ներկայացրել է թեկնածուի կենսագրական տվյալներն ու մասնագիտական անցած ուղին:

Գեւորգ Պապոյանի հավաստմամբ  թեկնածուի մասնագիտական հատկանիշները բարձր մակարդակի վրա են: Ինչպես դրամավարկային քաղաքականության մշակման գործում, այնպես էլ Կենտրոնական բանկի գործունեության արդյունավետության բարձրացման գործում Արմեն Նուրբեկյանն ունի իր ուրույն դերը:

Կենտրոնական բանկի նախագահի տեղակալի թեկնածուն, շնորհակալություն հայտնելով ԱԺ «Քաղաքացիական պայմանագիր» խմբակցությանն իր թեկնածությունն առաջադրելու համար, ներկայացրել է իր տեսլականը, թե ինչպես է պատկերացնում իր դերը Կենտրոնական բանկի զարգացման գործում:

Արմեն Նուրբեկյանն իր աշխատանքային գործունեության մեծ մասն անցկացրել է Կենտրոնական բանկում. սկսելով ֆինանսական կայունությունից՝ անցել է գների կայունության ոլորտ: Նա նշել է, որ այդ տարիների ընթացքում իր քաղած հիմնական դասերից մեկն այն է եղել, որ ցնցումներն ու տարատեսական շոկերը մեր կյանքի անբաժանելի մասն են:

Անդրադառնալով միջազգային գնաճին, որից անմասն չի մնացել նաեւ Հայաստանը՝ թեկնածուն հավաստիացրել է, որ Կենտրոնական բանկն ամեն ինչ անելու է՝ գնաճը թիրախին վերադարձնելու համար:

Անդրադառնալով ֆինանսական կայունությանը՝ նա ընդգծել է, որ Կենտրոնական բանկը գործողություններ է ձեռնարկել, որպեսզի մեր ֆինանսական համակարգը պատրաստ լինի տարբեր սցենարների:

Ամփոփելով իր ելույթը՝ Արմեն Նուրբեկյանը նշել է, որ հաղորդակցումն այսօր ամենակարեւոր գործիքներից մեկն է, ուստի ԿԲ-ն պետք է կարողանա հանրության համար լինել ընկալելի, կարողանա ստեղծել հետադարձ կապի մեխանիզմներ, որպեսզի ունենա առողջ երկխոսություն:

Թեկնածուն պատասխանել է նաեւ պատգամավորների հարցերին:

Տնտեսական հարցերի մշտական հանձնաժողովի անդամ Ծովինար Վարդանյանին հետաքրքրել է, թե արդյո՞ք կան խթանիչ միջոցներ՝ միտված ապահովագրական դաշտը զարգացնելուն: Թեկնածուի խոսքով ապահովագրական ոլորտում որակյալ աճ ունենալու համար պետք է համոզված լինել, որ շուկայում գործում են ինստիտուցիոնալ ներդրողներ, եւ ԿԲ-ն աշխատում է հենց այդ ուղղությամբ եւս:

ՀՀ ԱԺ պատգամավոր Արսեն Թորոսյանի հարցը վերաբերել է արտարժույթի փոխանակման կանխիկացման եւ մուտքագրման միջնորդավճարներին: Թեկնածուն, բացատրելով ստեղված իրավիճակը, նշել է, որ էական աճել են ռիսկերը կանխիկի հետ կապված, եւ այն մասնավոր ընկերությունները, որտեղից գալիս են այդ կանխիկ միջոցները, շեշտակի բարձրացրել են գները? Նա ընդգծել է, որ Կենտրոնական բանկն ուշադիր հետեւել է, որ հակամրցակցային պայմաններ չստեղծվեն:

ՀՀ ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանն իր ելույթում նշել է, որ ուրախ է Արմեն Նուրբեկյանի թեկնածության համար, համոզմունք է հայտնել, որ իրենց խմբակցությունը բարձրակարգ թեկնածու է ներկայացրել: Հանձնաժողովի փոխնախագահն ընդգծել է, որ կարող են կոռեկտության եւ առողջ բանավեճի սահմաններում ընդհանուր եզրեր գտնել: