Լրացումներ և փոփոխություններ «Կինեմատոգրաֆիայի մասին» օրենքում

«Կինեմատոգրաֆիայի մասին» օրենքում առաջարկվող լրացումների եւ փոփոխությունների անհրաժեշտությունը պայմանավորված է Հայաստանում կինոարտադրության ոլորտի զարգացմանը եւ ներդրումների խթանմանը միտված պետական քաղաքականության երաշխիքները բարելավելու եւ առավել գրավիչ մեխանիզմներ սահմանելու հանգամանքով: Այս մասին ասել է Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահ Սիսակ Գաբրիելյանը:

Պատգամավորներ Սիսակ Գաբրիելյանի եւ Թագուհի Ղազարյանի հեղինակած ««Կինեմատոգրաֆիայի մասին» օրենքում լրացումներ եւ փոփոխություններ կատարելու մասին» օրենքի նախագիծն առաջին ընթերցմամբ քննարկվել է Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի` ապրիլի 25-ի նիստում:

Հիմնական զեկուցողը տեղեկացրել է, որ հանձնաժողովը կազմակերպել է երկու քննարկում ֆիլմարտադրության ոլորտի ներկայացուցիչների հետ:

Առաջարկվող կարգավորմամբ ֆիլմարտադրողի (ներդրողի) ֆիլմարտադրության հետ անմիջականորեն կապված ապրանքների եւ ծառայությունների համար կատարված դրամական ծախսերը կարող են մասնակի հետ վերադարձվել` ծախսային մինչեւ 20 տոկոսի հաշվարկով:

Ըստ նախագծի` ներդրումների մասնակի վերադարձը տրամադրելու չափը, հատկացման համամասնությունը եւ ժամկետները, վերադարձի ենթակա ծախսումները հիմնավորող փաստաթղթերի ցանկն ու ձեւաչափը, ինչպես նաեւ վերադարձը մերժելու, դադարեցնելու եւ պետական բյուջե հետգանձում կատարելու (վերադարձնելու) եւ բողոքարկելու ընթացակարգերը կսահմանվեն Կառավարության որոշումով:

Սիսակ Գաբրիելյանը, պատասխանելով պատգամավորների հարցերին, հանգամանորեն ներկայացրել է պետական աջակցության հնարավորությունից օգտվող կինոարտադրողի` Ազգային մարմնին դիմելու հաջորդական քայլերը:

Պատգամավոր Հասմիկ Հակոբյանի, կինոռեժիսոր Դավիթ Բանուչյանի դիտարկումներով քննարկելի է մասնավորապես մասնակի հետվերադարձի` մինչեւ 20 տոկոսի չափը: Սիսակ Գաբրիելյանը նշել է, որ հարցը քննարկելի է եւ առաջիկայում եւս մեկ հանդիպում կկազմակերպվի հանձնաժողովի կողմից կինոարտադրողների եւ Ֆինանսների նախարարության գործընկերների հետ:

Հարակից զեկուցող Հասմիկ Հակոբյանը համոզմունք է հայտնել, որ նախագծով առաջարկվող փոփոխությունները կնպաստեն կինոարտադրության զարգացմանը:

ՀՀ կրթության, գիտության, մշակույթի եւ սպորտի նախարար Ժաննա Անդրեասյանը կարեւորել է, որ այս տարի, երբ նշվում է Հայ կինոյի հիմնադրման 100-ամյակը, կկարողանանք օրենսդրական այնպիսի մեխանիզմներ ունենալ, որոնք կինոարտադրության ոլորտի զարգացման նոր փուլ կբացեն: Նա տեղեկացրել է, որ առաջիկայում շրջանառության մեջ կդրվի օրենքից բխող ենթաօրենսդրական փաթեթ` հույս հայտնելով, որ դրանց միասնաբար իրականացումը կստեղծի ինստիտուցիոնալ հնարավորություններ:

Լրամշակված նախագիծը ստացել է դրական եզրակացություն:

Պատգամավորներ Լիլիթ Գալստյանի եւ Էլինար Վարդանյանի հեղինակած ««Տեսալսողական մեդիայի մասին» օրենքում փոփոխություններ եւ լրացումներ կատարելու մասին» եւ պատգամավոր Լիլիթ Գալստյանի հեղինակած «Վարչական իրավախախտումների վերաբերյալ ՀՀ օրենսգրքում լրացումներ եւ փոփոխություններ կատարելու մասին» օրենքների նախագծերի քննարկումը հետաձգվել է մինչեւ երկու ամիս ժամկետով: