Գյումրի ԲԿ-ում անցկացվել է հայ-ֆրանսիական կոնֆերանս՝ ուղղված բուժքույրերի հմտությունների զարգացմանը

«Գյումրի» բժշկական կենտրոնում անցկացվել է հայ-ֆրանսիական կոնֆերանս՝ ուղղված բուժքույրերի հմտությունների զարգացմանը։ Նախաձեռնությամբ հանդես է գալիս «Santé Arménie» կազմակերպությունը, որը 44-օրյա պատերազմի ժամանակ սկիզբ առած իր առաքելությունը շարունակում է Հայաստանում և Արցախում։ ֆրանսահայ բժիշկներ, վիրաբույժներ և այլ մասնագետներ հետպատերազմյան շրջանում մասնագիտական օգնություն են ցուցաբերել Հայաստանին ու Արցախին։ Կազմակերպությունն առողջապահության նախարարության հետ համատեղ համագործակցված աշխատանք է իրականացնում նաև մասնագետների վերապատրաստման ուղղությամբ։ Գյումրիում կազմակեպված կոնֆերանսին մասնակցել է Շիրակի և Արագածոտնի մարզերի բուժհաստատությունների 235 բուժքույր։

Փարիզի հայտնի Բոժոնի հիվանդանոցի բուժքույր-անեսթեզիստ Գայանե Հովհաննիսյան-Խաչատուրյանն առաջին անգամ չէ, որ մասնակցում է հայ բուժքույրերի վերապատրաստման դասընթացներին, ծանոթ է նաև Հայաստանի առողջապահության համակարգի խնդիրներին, ծանոթ է բուժքույրերի աշխատանքային ծանրաբեռնվածությանը։ Հայաստանից է գնացել Ֆրանսիա, Փարիզի հայտնի կլինիկայում արդեն 12 տարի է, որ աշխատում է։

«Ֆրանսիայում մեկ բուժքույրը հսկում է 3-4 հիվանդ՝ ըստ  հիվանդի ծանրության աստիճանի։ Սա  ծանրաբեռնվածության տեսակետից կթվա քիչ, բայց ծանրաբեռնվածությունը որոշում է հիվանդի ծանրության աստիճանը։ Հայաստանում, իհարկե, մեր բուժքույրերի ծանրաբեռնվածությունը շատ է, իրենք աշխատում են  24 ժամ, որը Ֆրանսիայում արգելված է, 12 ժամից ավելի բուժաշխատողը իրավունք չունի աշխատելու։ Դա գերհոգնածության պատճառ է դառնում բուժքրոջ համար»,-Shantnews-ի հետ զրույցում ասում է բուժքույր-անեսթեզիստ Գայանե Հովհաննիսյան-Խաչատուրյանը։

Անկախ աշխատաժամանակից, գաղտնիք չէ, որ հիվանդի առողջության, բուժման հարցում մեծ պատասխանատվություն կրում են նաև բուժքույրերը, քանի օր ամբողջ օրը նրանց հսկողության տակ են գտնվում հիվանդները։ Այդպես է ոչ միայն Հայաստանում, նաև Ֆրանսիայում։

«Բուժքույրը թեորիկ գիտելիքներ ունենալուց բացի, պետք է ունենա նաև գործնական գիտելիքներ և կարողանա զարգացնել ինքնուրույնության մտածելակերպի հմտությունը, որը կարծում եմ շատ  պակասում է մեր հայ  բուժքույրերի մոտ։ Այդ իսկ պատճառով մեր այս փորձի փոխանակման  մեջ մենք շեշտը դնում ենք բուժքրոջ դերի և նրա  ինքնուրույնության մտածելակերպի զարգացման վրա»,- շարունակում է Գայանե Հովհաննիսյան-Խաչատուրյանը։

Ֆրանսիայի հայտնի կլինիկաներից ժամանած բուժքույրերը, ինչպես նաև Երևանի պետական բժշկական համալսարանի դասախոսները տեսական քննարկումներից հետո անցկացրին գործնական աշխատանք։

«Այսօրվա թեման կոտրվածքներն են, մենք պատերազմի ժամանակ տեսանք, որ հանդիպում ենք բեկորային կոտրվածքների և արյունահոսությունների։ Դրա համար էլ շեշտը դրել ենք դրա վրա»,- ասում է ՀՀ բուժքույրերի միավորման նախագահ Գեղանուշ Ստեփանյանը։

Ֆրանսահայ և Ֆրանսիացի բժիշկները, վիրաբույժները և այլ պրոֆիլի մասնագետները պատերազմի ժամանակ և հետպատերազմյան օրերին Հայաստանում և Արցախում օգնում էին հայ մասնագետներին, փրկում ծանր վիրավորում ստացած զինվորների կյանքը։ Ֆրանսիայից եկած մասնագիտական խմբերն այդ օրերին նաև Գյումրիի բուժհաստատություններում էին։

«Santé Arménie» կազմակերպության առաքելությունը շարունակական է։ Ծրագիրը բացի մասնագիտական զարգացումից, ենթադրում է նաև ֆրանսիացի և ֆրանսահայ բուժաշխատողների փորձի փոխանակում, Ֆրանսիայում աշխատելու մեթոդաբանության ներկայացում հայ բուժքույրերի համար։ Շարունակվող համագործակցությունը Հայաստանի առողջապահության համակարգի հեռանկարային զարգացմանն է միտված։ Առաջիկայում մասնագիտական քննարկումներ են անցկացվելու Հայաստանի այլ մարզերում ևս։