Պարեկային կարգախմբերը ուժեղացված ծառայություն են իրականացնում մարզերում․ Շիրակի մարզի պարեկների աշխատանքին հետևել է ծառայության պետը

ՀՀ ՆԳ նախարարության պարեկային ծառայության պետ, ոստիկանության գնդապետ Արթուր Խուդինյանը աշխատանքային այցով Գյումրիում  էր։ Նա հանդիպում է ունեցել  Գյումրիի և մարզի հինգ տարածաշրջանների պարեկային ծառայողների հետ, տվել ուժեղացված ծառայություն իրականացնելու հանձնարարականներ։

Պարեկային ծառայությունը Շիրակի մարզում ներդրվեց 2022 թվականի ապրիլից։ Գյումրիից բացի նոր ծառայությունը հասանելի դարձավ ոչ միայն մարզի մեծ բնակավայրերում, նաև հեռավոր գյուղական համայնքներում։ Պարեկների  աշխատանքային գործառույթների և պարտականությունների շարքում առաջնային կարևորության են երթևեկության կանոնակարգումը, հանցագործությունների  հայտնաբերումն ու կանխարգելումը։

Շիրակի և Լոռու մարզերից հետո այս տարվանից պարեկային ծառայություն ներդրվեց 4 մարզերում, մինչև տարեվերջ այն հասանելի կդառնա մյուս չորս մարզերում, և արդյունքում Հանրապետությունում ճանապարհային ոստիկանության համակարգ չի գործի։ Նախատեսվում  է  ունենալ այլ ստորաբաժանումներ ևս։

Գյումրիում պարեկների աշխատանքին հետևել է ոստիկանության պարեկային ծառայության պետը։ Արթուր Խուդինյանը Գյումրիի և մարզի տարածաշրջանների պարեկային ծառայողների հետ հանդիպումն անցկացրել է  «Հայուհու» հրապարակում, ուժեղացված ծառայության մեկնարկից առաջ ցուցումը մեկն էր, խիստ ու անզիջում լինել ալկոլոհոլ օգտագործած, ոչ սթափ վիճակում ղեկի մոտ նստած վարորդների նկատմամբ, փոխարենը՝  ներողամտություն ցուցաբերել  երթևեկության կանոններում որոշ, ոչ էական խախտումներ կատարած քաղաքացիների հանդեպ և սահմանափակվել միայն զգուշացումներով։

«Ոչ մի ներում խմած վարորդներին, բայց էն քաղաքացիները, որ տատիկ-պապիկներ կլինեն, որ գյուղից են եկել և մոռացել են ամրագոտի քցեն կամ պետհամարանիշները ցեխոտված են, գյուղից իջել են և չեն հասցրել մաքրել, զգուշացնում եք, ներողամիտ եք լինում և խախտումը տեղում  վերացնել եք տալիս, իսկ այն քաղաքացիները, ովքեր թույլ կտան իրավախախտումներ, խստագույնս պատժում եք, բայց ամեն ինչ անում  եք օրենքին համապատասխան»,- հրահանգեց պարեկային ծառայության պետ Արթուր Խուդինյանը։

Մի քանի հանձնարարականներ ստանալուց հետո պարեկային ծառայության կարգախմբերն անցել են ուժեղացված ծառայության՝ ամբողջ մարզի տարածքում։

Պարեկային ծառայության գործառույթը միայն ճանապարհային երթևեկության  անվտանգության ապահովումը չէ։ Լիազորված են հետևել հանցագործությունների բացահայտմանն ու կանխարգելմանը, խիստ ուշադրություն է դարձվում հատկապես  թմրաշրջանառության բացահայտմանը։

«Այս տարին հայտարարված է որպես թմրամիջոցների դեմ պայքարի տարի, և պարեկային ծառայությունը ոստիկանության  այլ ստորաբաժանումների հետ ակտիվ պայքար են տանում  թմրամիջոցների հայտնաբերման, կանխարգելման ուղղությամբ։ Թվային տվյալներ այս պահին ներկայացնել չեմ կարող, բայց բավականին շատ դեպքեր  ունենք  նաև Գյումրիում, Շիրակի մարզի տարածքում և բոլոր այն տարածաշրջաններում, որտեղ մեր ծառայությունը գործում է»,- նշում է պարեկային ծառայության պետի տեղակալ Արմեն Մաթևոսյանը։

Համակարգում կան նաև խնդիրներ, որոնք հասարակության քննադատությանն են արժանանում, հատկապես, երբ խոսքը վերաբերում է բարձրագույն կրթություն չունեցող կադրերով համալրմանը։ Ըստ ծառայության պատասխանատուի, դիմորդները ծառայությունում են ընդգրկվում հնգամսյա մասնագիտացված դասընթացներին մասնակցելուց հետո, որն, ըստ նրա,  ոլորտային կադրեր պատրաստելու համար բավարար է։

Հանրապետությունում գրանցվեցին նաև հանցագործության դեպքեր, որոնցում ներգրավված էին եղել պարեկային ծառայողներ։ Աղմկարհարույց դեպքերի բացահայտումից հետո նրանք հեռացվել են համակարգից։

«Էնպես չէ, որ թվային ցուցանիշներ շատ կան, կան մի քանի բացառիկ դեպքեր։ Ինչպես գիտեք, այո՛,  ունենք պարեկներ, որոնք տարբեր հանցագործությունների համար ձեռբակալված են և այս պահին գտնվում են կալանքի տակ»,- նշում է Արմեն Մաթևոսյանը։

Ոստիկանության իրականացրած  ուսումնասիրությունների արդյունքում, կազմվել է վիճակագրություն, որ այն մարզերում, որտեղ ներդրված է պարեկային ծառայությունը, արձանագրվել է ճանապարհային պատահարների թվի նվազում և հանցագործությունների բացահայտման ցուցանիշի աճ։