Ի՞նչ հարցեր են քննարկել Եվլախում Արցախի ու Ադրբեջանի ներկայացուցիչները

Եվլախ քաղաքում այսօր կայացել է Ադրբեջանի ու Արցախի ներկայացուցիչների հերթական հանդիպումը:  Ովքե՞ր էին ներկայացնում Արցախն այս անգամ և ի՞նչ հարցեր են քննարկվել:

Թեմային «Հորիզոնի» տաղավարում անդրադարձել է Արտյոմ Երկանյանը։

«Ադրբեջանական պատվիրակության ղեկավարը նույն այն Ռամին Մամեդովն է, ով ղեկավարել է մինչ այդ եղած շփումները՝ դեռևս անցած տարվա մարտի 1-ից, պատվիրակության կազմում է նաև Արցախում Ադրբեջանի նախագահի ներկայացուցչի տեղակալ Բաշար Հաջիևը և մի պաշտոնյա, որն առաջին անգամ է երևում այդ բանակցություններում՝ Իլքին Սուլթանովը:

Հայկական կողմը նույն պաշտոնյաներն են ներկայացնում՝  Արցախի ռուս խաղաղապահների հետ համագործակցության կենտրոնի տնօրեն Սերգեյ Մՙարտիրոսյանը և Արցախի խորհրդարանի արտաքին հարաբերությունների հանձնաժողովի նախագահ Դավիթ Մելքումյանը:

3-րդ հանդիպումն էր սա այս ձևաչափով՝  այս վերջին ռազմական օպերացիայից հետո:
1-ինը եղավ Եվլախում,  2-րդը՝ Իվանյան-Ավանում՝ ռուս խաղաղապահների շտաբի տարածքում, բայց նաև չհաստատված տեղեկություն կա այն մասին, որ Արցախի հանրապետության նախագահ Շահրամանյանը Շուշիում հանդիպում է ունեցել Ադրբեջանի անվտանգության ծառայության պետի հետ: Սա արդեն այլ ձևաչափ է, որը նույնպես հավանական է շարունակություն ունենա:

Դատելով ադրբեջանական լրատվամիջոցների հրապարակումներից՝ կարող ենք միայն ասել, որ նրանք գրում են, որ շարունակվում է նախորդ հանդիպումների օրակարգը: Նախորդ հանդիպումից հետո նախագահ Շահրամանյանը, հետևելով Ադրբեջանի կողմից ներկայացված վերջնագրին, ստիպված էր հրամանագիր ստորագրել Արցախը լուծարելու մասին: Նաև այդ հանդիպմանը հետևեց այն, որ սկսվեցին Արցախի պետական այրերի ձերբակալություններն ու գերեվարումները, և նաև Արցախի մայրաքաղաք մտավ ադրբեջանական ոստիկանությունը:

Եվ եթե նույն այս տեմպերով Արցախի իշխանությունները շարունակեն զիջել և կատարել Ադրբեջանի վերջնագրի պահանջները, ես վախենում եմ անգամ մտածել, թե ինչ կարող է տեղի ունենալ այս հանդիպումից հետո:

Ադրբեջանական մամուլը գրում է, որ քննարկում են ռեինտեգրացիայի և մարդասիրական բնույթի հարցերը»,-ասել է Արտյոմ Երկանյանը:

Եթե հայ գրեթե չի մնացել, այդ դեպքում ի՞նչ նկատի ունեն «վերաինտեգրում» ասելով։ Մանրամասները՝ ամբողջական հարցազրույցում: