Ցրտահարության ու կարկտահարության հասցրած վնասը մոտ 6 միլիարդ դրամ է. Արթուր Խաչատրյան

ՀՀ գյուղատնտեսության նախարար Արթուր Խաչատրյանը պաշտոնավարման 100 օրվա ամփոփմանն անդրադարձավ հարցին՝ արդյո՞ք Հայաստանը չի կարող ինքնաբավ դառնալ հացահատիկով:

«Ինչո՞ւ պետք է Հայաստանը հացահատիկով ինքնաբավ լինի: Եթե այդ հողատարածքի վրա կարելի է աճեցնել ցորեն կամ ավելի բարձրարժեք մշակաբույս, և այդ հողը պատկանում է մասնավորին, ինչո՞ւ պետք է նա ավելի նվազ եկամուտ ապահովող ցորեն աճեցնի: Նա կցանկանա ունենալ առավել եկամտաբերություն, մեր խնդիրն է՝ օգնել մարդկանց ավելի ցածրարժեքից անցնել բարձրարժեք մշակաբույսերի»,- ասաց նա:

Նախարարը նշեց՝ այն տարածքներում, որոնք այսօր անմշակ ու անջրդի են, պետք է ցորեն ցանել, բայց խնդիր չի դրվել՝ Հայաստանը դարձնել 100 տոկոսով հացահատիկով ապահովված: Նա ասաց՝ մարդկանց սեփականությունը, հիմնական միջոցները պետք է աշխատեն, որ եկամտաբերությունը ավելանա, եթե մարդը սագախոտով կամ քինոայով ավելի բարձր եկամտաբերություն կարող է ստանալ, դա ավելի լավ կլինի բոլորի համար:

Խաչատրյանը խոսեց Վրաստանում սեպտեմբերի 15-ից հացահատիկի տեղափոխման վրա ներդրվող սահմանափակմանը, նշեց, որ այն գործելու է բոլոր երկրների, այդ թվում՝ իրենց համար, հիմնավորումն այն է, որ մեծ մեքենաները վնասում են Լարսի անցակետը, ուստի իրենք առաջարկում են լաստանավով Փոթի, հետո երկաթգծով Հայաստան ուղին:

Նախարարը խոսեց կատակլիզմների հասցրած վնասների մասին, նշեց, որ մինչև օգոստոս անհամեմատ ավելի լավ վիճակ էր, քան նախորդ տարիներին:

«Մեր հաշվարկներով՝ ցրտահարության, կարկտահարության հասցրած վնասը 6 միլիարդի կարգի էր, նախորդ տարի այդ ցուցանիշը եղել է 12 միլիարդ դրամ, 2016-ին՝ 33 միլիարդ դրամ էր: Այս պահին, այսինքն՝ մինչև օգոստոսյան հայտնի կարկուտը, վնասի չափն այդքան էր: Մենք երկու-երեք օր առաջ Արմավիրի մարզպետարանից ստացանք իրենց վնասների հաշվարկը, խնդիրներ կային պարզաբանելու, կոնկրետ թիվը չեմ կարող ասել՝ սելավը եղավ, Շիրակի մարզում կարկտահարություն եղավ, Արարատում փոքր կարկտահարություն: Մոտ 15 օրում վնասների չափը կկարողանանք ամփոփել, բայց սա ճակատագրի հեգնանք էր, ես հինգշաբթի վարչապետին զեկուցեցի, որ վնասն այսքան է, սպասում ենք, որ ռիսկը կանցնի, երկրորդ օրը այդ կարկուտը տեղաց: Եթե էլի կարկուտ չունենանք, կկարողանանք սեպտեմբերի վերջերին հաշվարկել՝ ինչքան է վնասը, դրամական աջակցություն ցուցաբերել համայնքի բնակիչներին»,- նշեց նախարարը:

Խոսելով ապահովագրության աշխատանքների մասին՝ նա նշեց, որ այդ աշխատանքները սկսվել են նախորդ տարվանից, հիմա էլ շարունակվում են ինտենսիվ կերպով: Նախարարի խոսքերով՝ բյուջեում այդ նպատակով գումար կա հատկացված, ընդհանուր բյուջեն 10 մլն եվրոյի չափ է, որը 50/50 կիսվում է ՀՀ և դոնորների կողմից: Դա, ըստ Խաչատրյանի, մի քանի տարվա ծրագիր է, որի համար երեք փորձնական մարզ է ընտրվել՝ Արարատի, Արմավիրի և Շիրակի մարզերը: Այս երեք մարզերում փորձնական կկիրառվի այդ մոտեցումը, վերցվել են երկու ռիսկեր՝ կարկտահարություն և ցրտահարություն: Արմավիրի և Արարատի մարզում ընտրված փորձնական մշակաբույսերն են խաղողը և պտուղը, Շիրակում կարտոֆիլն ու հացահատիկը:

«Ի վերջո դա պետք է տարածվի հանրապետությունում, բայց մոտեցումների խնդիր է: Մինչև տարեվերջ կստեղծվի ռիսկերի գնահատման կառույց, և կարողանանք ճիշտ գնահատել կորուստները»,- ասաց նա: