Վարչապետը խնդիր է դրել ամբողջությամբ վերցնել Երևանը. քննարկում

Երևանի ավագանու ընտրություններին ներկայացված դաշինքների և կուսակցությունների հնարավորությունների վերաբերյալ քննարկման ժամանակ քաղտեխնոլոգ, վերլուծաբան Վիգեն Հակոբյանն ու քաղաքական և ընտրական տեխնոլոգիաների փորձագետ Արմեն Բադալյանը խոսել են նաև այն մասին, թե ինչ ակտիվություն կցուցաբերի վարչապետ Նիկոլ Փաշինյանը քաղաքապետի թեկնածու Հայկ Մարությանի քարոզարշավի ժամանակ:

«Ես մտածում եմ, որ վարչապետի մասնակցությունը էականորեն կարող է նպաստել իշխող քաղաքական ուժի հաղթականին, կարող է այդ հաղթանակը լինել համոզիչ, ջախջախիչ և այլն և այլն: Այստեղ կարևոր նշանակություն ունի՝ վարչապետն այս կամ այն ֆորմատում մասնակցո՞ւմ է, թե՞ ոչ: Երբ ես ասում եմ՝ մասնակցում է, անպայման չէ, որ ինքը, ինչպես նախկինում, բակերով գնա, գարաժների կտուրներով և այլն: Թեպետ դա էլ չեմ բացառում, այսօրվա իշխանությունների գործիքակազմում ինչ ուզեք՝ կա: Թեկուզ երկու-երեք անգամ լայվերով, հանրահավաքներով, մեկ ու մեջ մասնակցելով… դա կարող է ազդել, որովհետև իր անձնական ռեյտինգը շատ բարձր է: Ես կարծում եմ, որ եթե ինքն անձամբ մասնակցում է, դա մի ռեյտինգ է լինելու, մի արդյունք, իսկ եթե  անձամբ չի մասնակցում՝ այլ արդյունք է լինելու: Ընդ որում՝ բավական կարող է տարբերվել տոկոսային առումով»,- ասել է քաղտեխնոլոգ Վիգեն Հակոբյանը:

Shantnews-ի հարցին՝ տարբերության պատճառով հնարավո՞ր է, որ «Իմ քայլը» դաշինքը զիջի առաջին հորիզոնականը, քաղտեխնոլոգն այսպիսի պատասխան է տվել.

«Այս պահի դրությամբ, համենայնդեպս, նման կանխատեսումներ ես չունեմ, որ եթե նույնիսկ վարչապետն առհասարակ չմասնակցի… թեպետ դա էլ եմ բացառում, մենք խոսում ենք ուղղակի ակտիվ մասնակցության մասին: Ես կարծում եմ՝ անկախ նրանից՝ մասնակցում է, թե չի մասնակցում, իր հետ է ասոցացվում էս ամեն ինչը, այդ թվում՝ քաղաքապետի թեկնածուն: Ես կարծում եմ՝ արդյունքը կլինի դրական: Այլ հարց է, թե որքանով դա իրենց կբավարարի»:

Քաղաքական և ընտրական տեխնոլոգիաների փորձագետ Արմեն  Բադալյանի խոսքերով՝ վարչապետ Նիկոլ Փաշինյանն արդեն մասնակցում է քարոզչությանը.

«Օգոստոսի 17-ի իր հանրահավաքին նա ցույց տվեց իր թեկնածուին: Սա արդեն մասնակցություն է, և վարչապետը խնդիր է դրել ամբողջովին վերցնել Երևանը:  Եթե հրավիրում ես հարյուր հազարանոց հանրահավաք և ասում ես՝ սա իմ թեկնածուն է, հավատացեք՝ դա շատ ավելի մեծ դեր ունի, քան մյուսների դեպքում, եթե մի քանի անգամ կրկնեն: Ինքը մի անգամ ասաց, վստահ եղեք, որ մի քանի անգամ էլ ասելու է ֆեյսբուքյան լայվերի միջոցով, նա անընդհատ քարոզելու է: Վարչապետը խնդիր է դրել ՔՊ-ի միջոցով վերցնել իշխանությունը Երևանում՝ թաղապետերով, վարչության պետերով: Երևանի ռեսուրսը շատ կարևոր է խորհրդարանական ընտրությունների համար, իսկ ընտրություններին պատրաստվող իշխանությունը չի կարող դա հաշվի չառնել», – ասել է Բադալյանը։