Հայաստանի և Վրաստանի միջև ստորագրվել են երկկողմ փաստաթղթեր

Հայաստանի և Վրաստանի վարչապետներ Նիկոլ Փաշինյանի և Իրակլի Ղարիբաշվիլիի գլխավորությամբ Թբիլիսիում տեղի ունեցած Հայաստանի և Վրաստանի միջև տնտեսական համագործակցության միջկառավարական հանձնաժողովի նիստի շրջանակում ստորագրվել են երկկողմ փաստաթղթեր:

Նիկոլ Փաշինյանը և Իրակլի Ղարիբաշվիլին ստորագրել են «Հայաստանի Հանրապետության և Վրաստանի միջև տնտեսական համագործակցության միջկառավարական հանձնաժողովի 13-րդ նիստի» արձանագրությունը և «Հայաստանի Հանրապետության և Վրաստանի միջև ռազմավարական գործընկերության հաստատման մասին» հռչակագիրը:

Հայաստանի Հանրապետության արտաքին գործերի նախարար Արարատ Միրզոյանը և Վրաստանի արտաքին գործերի նախարար Իլյա Դարչիաշվիլին ստորագրել են «Հայաստանի Հանրապետության կառավարության և Վրաստանի կառավարության միջև դիվանագիտական ներկայացուցչությունների և հյուպատոսական հիմնարկների անձնակազմի ընտանիքի անդամների կողմից վարձատրվող գործունեություն իրականացնելու մասին» համաձայնագիր:

Հայաստանի Հանրապետության էկոնոմիկայի նախարարի տեղակալ Արման Խոջոյանը և Վրաստանի շրջակա միջավայրի պաշտպանության և գյուղատնտեսության նախարարի տեղակալ Թենգիզ Նասարիձեն ստորագրել են «Հայաստանի Հանրապետության էկոնոմիկայի նախարարության և Վրաստանի շրջակա միջավայրի պահպանության և գյուղատնտեսության նախարարության միջև գյուղատնտեսության ոլորտում համագործակցության մասին» փոխըմբռնման հուշագիր:

Վրաստանում Հայաստանի Հանրապետության արտակարգ և լիազոր դեսպան Աշոտ Սմբատյանը և Վրաստանի բռնազավթված տարածքներից ներքին տեղահանված անձանց, աշխատանքի, առողջապահության և սոցիալական հարցերի նախարարի տեղակալ Տամիլա Բարկալաիան ստորագրել են «Հայաստանի Հանրապետության աշխատանքի և սոցիալական հարցերի նախարարության և Վրաստանի բռնազավթված տարածքներից ներքին տեղահանված անձանց, աշխատանքի, առողջապահության և սոցիալական հարցերի նախարարության միջև աշխատանքի և սոցիալական պաշտպանության ոլորտում համագործակցության մասին» փոխըմբռնման հուշագիր:

Ստորև ներկայացվում է Հայաստանի Հանրապետության և Վրաստանի միջև ռազմավարական գործընկերություն հաստատելու մասին համատեղ հայտարարությունը.

«Հիմք ընդունելով Հայաստանի Հանրապետության վարչապետ Նիկոլ Փաշինյանի և Վրաստանի վարչապետ Իրակլի Ղարիբաշվիլիի միջև 2023 թվականի հուլիսի 7-ին կայացած՝ Ռազմավարական հարցերի շուրջ բարձրաստիճան երկխոսություն հաստատելու վերաբերյալ որոշումը,

վերահաստատելով հայ և վրաց ժողովուրդների բազմադարյա բարիդրացիական հարաբերությունները,

հաշվի առնելով գործուն երկկողմ հարաբերությունները, որոնք ամրապնդվել են երկու երկրների կառավարությունների միջև սերտ համագործակցությամբ՝ զուգորդվելով ակտիվ առևտրային, տնտեսական, սոցիալական և մշակութային փոխանակումներով և աճող ոլորտային համագործակցությամբ,

վերահաստատելով միմյանց ինքնիշխանության, անկախության, տարածքային ամբողջականության և միջազգայնորեն ճանաչված սահմանների անձեռնմխելիության նկատմամբ անմնացորդ աջակցությունը,

հաստատելով Միավորված ազգերի կազմակերպության կանոնադրության և Հելսինկյան եզրափակիչ ակտի սկզբունքներին խստորեն հետևելու և միջազգային իրավունքի հիմնարար սկզբունքներն ու նորմերն իրենց կողմից պահպանվելու հանգամանքը,

կարևորելով ժողովրդավարության, օրենքի գերակայության, մարդու իրավունքների նկատմամբ հարգանքի և միջազգային կանոնահեն կարգի ընդհանուր արժեքները պաշտպանելու աներեր հանձնառությունը,

ընդգծելով եվրոպական արժեքների ամրապնդման և խթանման հանձնառությունը,

աջակցելով մարդկային շփումների զարգացմանը և այդ նպատակով վկայակոչելով երկու երկրների քաղաքացիների՝ առանց մուտքի արտոնագրի, նույնականացման քարտերով ճամփորդելու ռեժիմը,

հաստատակամորեն որոշելով նպաստել տարածաշրջանում և ամբողջ աշխարհում հաղորդակցության բարելավմանը,

ամուր համագործակցությունը Ռազմավարական գործընկերության վերածելու նպատակով Վրաստանը և Հայաստանը պարտավորվում են՝

● խորացնել ընդհանուր հետաքրքրություն ներկայացնող հարցերի, ինչպես նաև երկկողմ և միջազգային օրակարգում ընդգրկված թեմաների շուրջ քաղաքական երկխոսությունը՝ բոլոր մակարդակներում, տարբեր նախարարությունների և տարբեր գերատեսչությունների միջև երկկողմ այցեր կատարելու միջոցով.

● խորացնել համագործակցությունը տարբեր ոլորտներում՝ հատուկ ուշադրություն դարձնելով առևտրային, տնտեսական, էներգետիկ, տրանսպորտային, հեռահաղորդակցական և լոգիստիկ ոլորտներում համագործակցության նոր ուղղությունների բացահայտմանը.

● համագործակցել միջազգային կազմակերպությունների, այդ թվում՝ Միավորված ազգերի կազմակերպության, Եվրոպայում անվտանգության և համագործակցության կազմակերպության և Եվրոպայի խորհրդի հետ.

● ամրապնդել մարդասիրական ոլորտում փոխգործակցությունը և խթանել կրթության, գիտության և մշակույթի ոլորտներում համագործակցությունը.

● առաջնահերթության կարգով ավարտել Կողմերի միջև պետական սահմանի սահմանազատման/սահմանագծման գործընթացը.

● ընդլայնել իրենց միջև խորհրդակցությունները՝ տարածաշրջանում և դրա սահմաններից դուրս խաղաղության և անվտանգության հաստատմանը լավագույնս նպաստելու համար տարածաշրջանային համագործակցության նոր ուղղություններ բացահայտելու նպատակով։

Հայաստանը և Վրաստանը լիահույս են, որ ապագայում կհամագործակցեն Ռազմավարական գործընկերության շրջանակներում՝ ի բարօրություն Հայաստանի և Վրաստանի ժողովուրդների»։