23 տոկոս համահարթ մոդելը խրախուսում է բարձր աշխատավարձը, իսկ այսօրվա համակարգը խրախուսում է ցածր աշխատավարձը. ՀՀ վարչապետ

ՀՀ վարչապետ Նիկոլ Փաշինյանն իր ֆեյսբուքյան ուղիղ եթերի ընթացքում խոսել է եկամտահարկի փոփոխությունների մասին: Վարչապետն առաջարկել է եկամտահարկի դրույքաչափերի փոփոխման 2 մոդել: Առաջին մոդելի համաձայն՝ մինչև 250 հազար դրամ աշխատավարձ ստացող քաղաքացիները վճարեն 20 տոկոս եկամտահարկ, իսկ 250 հազար դրամից ավելի աշխատավարձ ստացողները՝ 25 տոկոս: Մյուս մոդելի համաձայն՝ ձևավորվում է 23 տոկոս համահարթ եկամտահարկ:

«Մոտավորապես 160 հազար քաղաքացիների համար եկամտային հարկի դրույքաչափը մեր կողմից առաջարկած համահարթ մոդելի դեպքում չի փոխվում »,- նշել է նա:

Վարչապետի խոսքով՝ այսօր մինչև 150 հազար դրամ աշխատավարձ ստացող քաղաքացիները վստահորեն ավելի շատ դե ֆակտո գումար են ստանում, և այդ հանգամանքը խրախուսում է ստվերային տնտեսությունը, ինչը վատ է:

«Նվազագույն աշխատավարձի բարձրացման դեպքում խնդրի մի մասը կլուծենք: Մեր կառավարության առաջարկած 2 մոդելներից ես ինքս ինձ համար ճիշտ եմ համարում համաձայնության գալ համահարթ տարբերակին: 23 կամ գուցե 22 տոկոս եկամտային հարկը ավելի հեռանկարային է մեր երկրի տնտեսության համար»,- նշել է նա:

Նիկոլ Փաշինյանը նաև ասել է, որ կառավարությունը տարեկան կտրվածքով 0,5 տոկոսով եկամտահարկը կիջեցնի ՝ հասնելով 20 տոկոսի:

«Հիմա սկսենք 23 տոկոսով և կառավարությունը պարտադրվի 0,5- ով իջնել և հասնել 20 տոկոսի»,- ասել է Փաշինյանը:

Փաշինյանը նաև ասել է, որ ռեզիդենտների և ոչ ռեզիդենտների միջև պետք է տարբերություն չդնենք:

«Լավ մեսիջ չէ օտարերկրյա և տեղացի ներդրողների միջև տարբերակում դնելը, ուստի մենք աշխատում ենք այս ուղղությամբ, որ ռեզիդենտների և ոչ ռեզիդենտների միջև տարբերություն չդնենք»,- նշել է Նիկոլ Փաշինյանը:

Ամփոփելով իր ֆեյսբուքյան ուղիղ եթերը՝ վարչապետը ասել է, որ Հայաստանի Հանրապետության քաղաքացիները իշխանության լիարժեք կրողն են:

«Այն պահին, երբ հեռանամ վարչապետի պաշտոնից, պիտի լինեն երաշխիքներ, որ որևէ մեկը չի կարող իշխանությունը վերցնել ժողովրդի ձեռքից»,- ասել է Նիկոլ Փաշինյանը:

Նա նաև խնդրել է, որ պետք չէ արագ և բուռն ռեակցիաներ տալ եկամտահարկի փոփոխությունները, այլ դրանք քննարկման միջոցով անցկանցնել:

«Մեր նպատակը չէ խրախուսել ցածր աշխատավարձը. 80 հազար դրամ աշխատավարձը քիչ է, ինչ ուզում եք ասեք, քիչ է: Համահարթ մոդելը խրախուսում է բարձր աշխատավարձը, իսկ այսօրվա համակարգը խրախուսում է ցածր աշխատավարձը: Նախկինում տարվել է աղքատության խրախուսման քաղաքականություն: Մենք ասում ենք՝ գործատո՛ւ ջան, դու այս համակարգով հնարավորություն կունենաս աշխատավարձը բարձրացնել առանց հարկային բեռի: Մեր նպատակն է, որ խրախուսենք բարձր որակավորում ունեցող աշխատանքը և բարձր աշխատավարձը՝ 400, 500, 700 հազար դրամ»,- ասել է Փաշինյանը:

Վարչապետը նշել է, որ կառավարության կողմից առաջարկված 2 տարբերակները ընտրվել են 10 և ավելի հնարավոր սցենարներից: