«Աժ թասիբի հարցն է այստեղ, չի գործում որպես օրենսդիր մարմին». Շուշան Դոյդոյան

«Ցանկացած նախաձեռնություն,որ մտնում է Ազգային ժողով, կյանքի է կոչվում: Քաղաքացիական հասարակությունը ոչ մի լծակ չունի այդ լավ կամ վատ նախաձեռնությունների շուրջ հանրային քննարկում անցկացնելու համար: Ընդամենը 3 տողից բաղկացած մի նախագիծ էր առաջարկվել և ընդունվել առաջին ընթերցմամբ, որով ասվում էր, որ ուժը կորցրած է համարվում Երևան քաղաքի այսինչ թվի ինքնակառավարման մասին օրենքի հոդվածի այսինչ գլուխը: Առաջինից երկրորդ ընթերցման ընթացքում մշակվել է լրիվ նոր նախագիծ՝ երկու էջից բաղկացած, հանգամանորեն կարգավորելով լրագրողների գործառույթները, դերը, աշխատանքը քաղաքապետարանում, և այս նախագիծն ընդունվում է այն պարագայում, երբ դա բոլորովին այլ բովանդակությամբ, այլ տեքստ է, որևէ հանրային քննարկում օնլայն կամ օֆֆլայն որևէ հարթակում  չի անցել: Կառավարության բոլոր ռեսուրսները՝  edraft-ը, որը կառավարությունը գովազդում է որպես լավագույն գործիք իր կողմից  ստեղծված, չի օգտագործվում փաստացի: Այստեղ նսեմացվում և զրոյացվում է և’ քաղաքացիական հասարակության դերը և’ իշխանության կարևորագույն թեևերից  մեկի՝ օրենսդիր մարմնի դերը»,-խոսելով  ԱԺ-ում մարտի 23-ին արտահերթ ընթացակարգով ձայների մեծամասնությամբ երկրորդ ընթեցմամբ եւ ամբողջությամբ «Կառավարության կառուցվածքի և գործունեության մասին» և կից ներկայացված օրենքների փաթեթի ընդունման մասին, որով փաստորեն արգելվում է Երևանի ավագանու նիստերի դռնբաց լուսաբանումը, ասել է Ինֆորմացիայի ազատության կենտրոնի հիմնադիր Շուշան Դոյդոյանը: 

 «Այսինքն, ուզում եմ բարձրացնել նաև ԱԺ թասիբի հարցը: Այն` որպես օրենսդիր մարմին, չի աշխատում: Երկրորդ անհանգստացնող հարցը՝ մենք մի շարք  գործողություններ ունենք պլանավորած, որոնց մասին չենք խոսելու, որպեսզի հնարավորություն չտանք պաշտպանվելու, բայց մի բան ակնհայտ է՝ խնդիրը պետք է հասնի մինչև Եվրոդատարան, որովհետև հակասություն կա այս օրենքի եւ մարդու իրավունքների եվրոպական կոնվենցիայի 10-րդ  հոդվածի և եվրոպական դատարանի սահմանած սկզբունքների միջև»,-ասել է  Շուշան Դոյդոյանը:

  «Խոսքի, մամուլի ցանկացած սահմանափակում պետք է լինի օրենքի տեսքով, սա կառավարությունը պլյուս է ստացել, ունի: Երկրորդ պահանջն այն է, որ պետք է ունենա օրինական նպատակ՝ այստեղ կարող է քննարկում  ծավալվել Եվրոդատարանում՝ արդյո՞ք  եղել է քննարկում այդ հարցով: Բերում են օրինական նպատակ՝  ուզում են ապահովել քաղաքապետարանում անվտանգությունը: Ուզում են անկաշկանդ, հանգիստ աշխատել: Բայց ա’յ, երրորդ պահանջին չի կարող համապատասխանել այս սահմանափակումը՝ յուրաքանանչյուր սահմանափակում պետք է բխի ժողովրդավարական հասարակության շահերից, պետք է լինի սուր պահանջ այդ սահմանափակումը կիրառելու համար: Բնականաբար, չկա այդ սուր պահանջը՝ փակելու ավագանու նիստերը: Այլ ընդհակառակը՝ կա սուր հասարակական պահանջ՝ ավագանու նկստերը պետք է լինեն դռնբաց և ոչ թե  առցանց  հեռարձակմամբ, որին լրագրողները կարող են հետևել նաեւ իրենց աշխատավայրից: Ինչի՞ պիտի գնան- հասնեն քաղաքապետարան, առաջին հարկի խցում նստեն, եթե այդ նույն բանը իրենց խմբագրություններում կարող են անել»,- ասաց Ինֆորմացիայի  ազատության կենտրոնի հիմնադիր Շուշան Դոյդոյանը: