«Թուրքական տնտեսության անկումը կարող է ազդել Եվրոպայի վրա». Հիլդա Չոբոյան

Վերլուծաբանները դեռևս քննարկում են Ֆրանսիայի նախագահ Էմանուել Մակրոնի՝ Թուրքիայի հասցեին հնչեցրած վերջին հայտարարությունները: Ինչպես հայտնի է՝ անցյալ ամսվա վերջին տարբեր երկրներում հավատարմագրված ֆրանսիացի դիվանագետների հետ հանդիպման ժամանակ Մակրոնը կասկած էր հայտնել, թե Թուրքիան կարող է Եվրամիության լիիրավ անդամ դառնալ: Պատճառը, ըստ Ֆրանսիայի նախագահի, Էրդողանի վարած քաղաքականությունն է, որի արդյունքում թուրքական պետությունը զգալիորեն կորցրել է իր աշխարհիկ բնույթը, իսկ Էրդողանի իշխանության որդեգրած սկզբունքները շատ քիչ ընդհանրություն ունեն եվրոպական արժեքների հետ:

Ըստ ֆրանսաբնակ վերլուծաբան, Կենտրոնական Ֆրանսիայի տարածաշրջանային խորհրդարանի պատգամավոր Հիլդա Չոբոյանի, այս հայտարարությունը ռազմավարական բնույթ չունի և չի կարող լարվածություն առաջացնել Ֆրանսիայի և Թուրքիայի միջև:

Shantnews.am-ի հետ զրույցում նա ասաց, որ այսօր երկու երկրների հարաբերություններում ոչ թե լարվածություն, այլ փոխլրացում է նկատվում: «Ինչպես հայտնի է՝ թե՛ Թուրքիան, թե՛ Ֆրանսիան, ԱՄՆ-ի հետ անհամաձայնության մեջ են: Թուրքիան ավելի բիրտ, Ֆրանսիան՝ ավելի մեղմ ընդդիմություն են ԱՄՆ-ին: Երկուսի շահերն այս առումով համընկնում են: Իսկ անդրադառնալով Մակրոնի այն արտահայտությանը, թե Թուրքիան այսօր դեպի իսլամականության է գնում, նա ասել է, որ Ֆրանսիայի նախագահն ուղղակի առիթն օգտագործել է իր ասելիքների համար՝ Թուրքիայի այսօրվա տկարացման ֆոնին, քանի որ Թուրքիան Եվրոպայի կարիքն ունի: Պարզապես ցանկացել է ասել, որ չափը պետք չէ անցնել:

Արված հայտարարությունը կոնկրետ Էրդողանի կողմից արձագանք չգտավ, արձագանքեցին նրա կառավարության անդամներից, որոնք էլ, մեղմ արտահայտվելով, ասացին, թե սխալ հասկացվածություն կա, ասաց Հիլդա Չոբոյանը՝ Եվրոպայի հարաբերությունները Թուրքիայի հետ գնահատելով իբրև մեղրամսի սկիզբ: «Թե՛ Ֆրանսիան, թե՛ Եվրամիության մյուս երկրները ամերիկյան նոր քաղաքականության, հետևաբար իրանական պատժամիջոցների վերահաստատման դեմ շատ զայրացած են և ուզում են այլընտրանքներ գտնել: Թուրքիան միաժամանակ քաղաքական և տնտեսական մեծ տագնապի մեջ է, և նա նույնպես այլընտրանքի կարիք ունի, իսկ այդ այլընտրանքը չի կարող  վերջնականապես Ռուսաստանը լինել (ժամանակավորապես այդպիսի մի հակում կա):  Շատ հավանական է, որ Թուրքիան հիմա փորձելու է Եվրամիության հետ հարաբերությունների որակի բարձրացմանը զարկ տալ: Արդեն երբ Մակրոնն այդ հայտարարությունն անում էր, միաժամանակ Ֆրանսիայի ֆինանսների և  տնտեսության նախարարը նույն օրն ընդունում էր իր թուրք գործընկերոջը՝ Էրդողանի փեսային, և ասում էր, որ Ֆրանսիան զարկ պիտի տա Թուրքիայի հետ տնտեսական հարաբերությանը: Իմ կարծիքով՝ այնքան էլ ճիշտ չէ Մակրոնի հայտարարությունն արագ մեկնաբանելն ու այն որպես լարվածություն որակելը»,- Shantnews-ին ասաց Կենտրոնական Ֆրանսիայի տարածաշրջանային խորհրդարանի պատգամավորը:

Ըստ ֆրանսաբնակ վերլուծաբանի՝ Ֆրանսիան էլ այսօր իր հերթին Թուրքիայի կարիքն ունի, քանի որ թուրքական տնտեսական տագնապը կարող է մինչև Ֆրանսիա հասնել: «Թուրքիան էլ Եվրոպայի խիստ կարիքն ունի, քանի որ  թուրք գործարարների պարտատերերը եվրոպական բանկերն են: Շատ մեծ մտավախություններ կան, որ թուրքական տնտեսության այս անկումը կազդի Եվրոպայի վրա, քանի որ Թուրքիայի ամենամեծ գործընկերը Եվրոպան է: Միաժամանակ՝ պետք չէ անտեսել, որ Թուրքիայի ձեռքին մեծ  ու կարևոր խաղաքարտեր կան, մասնավորապես՝ Միջին Արևելքի հարցերով: Թուրքիայում այսօր միլիոնավոր սիրիացի փախստականներ կան, և ցանկացած պահի նա կարող է նրանց առջև բացել Եվրոպայի դռները, և նրանք մուտք կգործեն Եվրոպա»,- Թուրքիայի այսօրվա դրությունն այսպես մեկնաբանեց մեր զրուցակիցը:

Հիլդա Չոբոյանը հիշեցնում է նաև, որ  Ռուսաստանն այսօր ուզում է Սիրիայի վերակառուցումը հանձնել թուրքական ընկերություններին, (եվրոպական և չինական ֆինանսավորումներով): «Ուստի, պետք է նկատի ունենալ, որ այս պայմաններում այսօր Թուրքիայի և Եվրոպայի, հատկապես՝ Ֆրանսիայի միջև, բախում չի կարող լինել»,- Թուրքիայի և Եվրոպայի հարաբերությունների մասին զրույցը եզրափակեց մեր զրուցակիցը: