Հանրային իրազեկվածության բարձրացմանը և հմտությունների կատարելագործմանն ուղղված միջոցառումներ Արմավիրի և Վայոց ձորի մարզերում

ՀՀ ՆԳՆ փրկարար ծառայության Արմավիրի և Վայոց ձորի մարզային փրկարարական վարչություների և ենթակա ստորաբաժանումների ծառայողների կողմից մայիս ամսին կազմակերպվել և անց են կացվել մի շարք միջոցառումներ:
Հնարավոր արտակարգ իրավիճակների կանխարգելման և պատրաստվածության բարձրացման նպատակով Արմավիրի ՄՓՎ ստորաբաժանումները փրկարարական և ոստիկանության ծառայողների հետ համատեղ Արմավիրի մարզի միջնակարգ և հիմնական դպրոցներում անց են կացրել «Երկրաշարժի ժամանակ բնակչության վարվելակերպի կանոնները», «Հրդեհային անվտանգության կանոնները» և «Բնակչության տարահանման կազմակերպումը» թեմաներով դասընթացներ:

Արմավիրի մարզի Խոյ համայնքի Ծիածան, Ծաղկունք, Ամբերդ, Դողս և Լեռնամերձ բնակավայրերում անցկացվել են նաև «Ազդարարում, պատսպարում և տարհանում» թեմայով վարժանքներ: Բնակավայրերում շչակների միջոցով իրականացվել է ազդարարում, որի արդյունքում կազմակերպվել է գյուղապետարանների անձնակազմի, դպրոցների աշակերտների և ուսուցիչների պատսպարում: Վարժանքի ընթացքում ուսուցանվողներին ներկայացվել է «Օդային տագնապ» ազդանշանի դեպքում և երկրաշարժի ժամանակ բնակչության պաշտպանության վարվելակերպի կանոնները։ Մասնակիցների կողմից առաջադրված հարցադրումներին տրվել են սպառիչ պատասխաններ, ինչպես նաև բաժանվել են «Օդային տագնապ» ազդանշանի դեպքում վարվելակերպի կանոնների վերաբերյալ ծանուցման թերթիկներ:

Մարզերում իրականացվել են նաև տարբեր թեմաներով շտաբային և հատուկ տակտիկական ուսումնավարժանքեր։
Արմավիրում և Մեծամորում անց են կացվել «Ախուրյանի ջրամբարի պատվարի փլուզման վտանգի դեպքում ՄՓՎ անձնակազմի գործառույթները» և «Ախուրյանի ջրամբարի պատվարի փլուզման վտանգի դեպքում Մեծամոր համայնքի բնակչության պաշտպանության կազմակերպումը» թեմաներով շտաբային ուսումնավարժություններ:

Մեծամորում ուսումնավարժությանը մասնակցություն ցուցաբերեցին նաև համայնքապետարանի աշխատակազմը, համայնքի արտակարգ իրավիճակների, տարհանման հանձնաժողովները, Երասխահուն, Արգավանդ Հայկավան և Բամբակաշատ բնակավայրերի վարչական ղեկավարները:

Ուսումնավարժությունները նպատակ էին հետապնդում կատարելագործելու մասնակիցների տեսական գիտելիքները, ներգրավված ուժերի գործնական հմտությունները, ստուգել «Արմավիրի մարզի արտակարգ իրավիճակներում բնակչության պաշտպանության պլանի» իրատեսությունը, ինչպես նաև համագործակցության շնորհիվ կատարելագործել համայնքի ղեկավար կազմի ունակությունները՝ բնակչության պաշտպանության միջոցառումների իրականացման, որոշումների ընդունման գործում։

Վայոց ձորի մարզի Արենի համայնքում անցկացված շտաբային ուսումնավարժությունը «Բնակչության պաշտպանության միջոցառումների իրականացումը սողանքի առաջացման դեպքում» թեմայով էր: Ուսումնավարժության նպատակն էր ստուգել համայնքի ղեկավար կազմի պատրաստականությունն արտակարգ իրավիճակների սպառնալիքի և ծագման դեպքում, ինչպես նաև կատարելագործել ուսումնավարժությունում ընդգրկված մարմինների ղեկավար կազմերի ունակություններն ու փոխհամագործակցության իրականացումը սողանքների սպառնալիքի և առաջացման դեպքում:
Շտաբային ուսումնավարժության մասնակիցներն առաջարկություններ ներկայացրեցին հետախուզության անցկացման մասին, ճշտեցին անհրաժեշտ աշխատանքների ծավալները, ուժերն ու միջոցները։ Ամփոփման ժամանակ քննարկեցին ուսումնավարժության հետ կապված հարցեր, ուսումնավարժության ղեկավարը համապատասխան ցուցումներ տվեց դրանց վերացման ուղղությամբ և ուսումնավարժությունը գնահատեց «բավարար»:

Անցկացվեցին նաև հատուկ տակտիկական ուսումնավարժություններ Արենի համայնքի «Աղավնաձոր գյուղի մանկապարտեզ» ՀՈԱԿ-ում՝ «Հրդեհաշիջման և տարհանման աշխատանքների կազմակերպումը մանկապարտեզում» թեմայով, իսկ «Գազպրոմ Արմենիա» ՓԲԸ-ի «Վայոց ձոր» ԳԳՄ Վայքի տարածքային տեղամասում՝ «Գազի հոտ բազմաբնակարան շենքի աստիճանավանդակում հրդեհի բռնկմամբ» թեմայով։

«Աղավնաձոր գյուղի մանկապարտեզ» ՀՈԱԿ-ում անցկացված ՀՏՈւ-ի ժամանակ հրշեջ-փրկարարական ջոկատի օղակների հրամանատարների գործնական ունակությունները կատարելագործելու և պատրաստվածության վիճակը ստուգելու նպատակով իրականացվեց հետախուզություն, որին զուգահեռ կատարվեց նաև մարտական բացազատում: Միաժամանակ իրականացվեցին փրկարարական, որոնողական, հրդեհաշիջման աշխատանքներ։

«Գազպրոմ Արմենիա» ՓԲԸ-ի «Վայոց ձոր» ԳԳՄ Վայքի տարածքային տեղամասում անցկացված ՀՏՈւ-ի ժամանակ փոխհամագործակցություն տեղի ունեցավ «Վայոց ձոր» ԳԳՄ-ի Վայքի տարածքային տեղամասի վթարավերականգնողական խմբի և Վայքի հրշեջ-փրկարարական ջոկատի միջև։ Արձագանքող ուժերի միահամուռ ջանքերով աշխատանքներ իրականացվեց վթարի հետևանքների վերացման ուղղությամբ հատուկ հետախուզություն, վթարավերականգնողական և հրդեհաշիջման աշխատանքներ:

Ուսումնավարժության ընթացքում վթարավերականգնողական խմբի կողմից դադարեցվեց գազատարում գազի մատակարարումը, կատարվեցին հրդեհաշիջման և գազատարի վնասված հատվածի վերանորոգման աշխատանքներ:

Ուսումնավարժությունների ավարտից հետո ամփոփվեցին կատարված աշխատանքները, գնահատվեցին ուսուցանվողների գործողությունները, վերլուծվեցին իրականացված միջոցառումները, վերհանվեցին նկատված թերությունները և տրվեցին համապատասխան հանձնարարականներ։