600 մլն դրամ և ընդամենը 17 տոննա իշխան Սևանա լճում

2005 թվականից  Հայաստանում մեկնակրել է մի ծրագիր, որով  ամեն տարի Սևանա լիճ է բաց թողնվում որոշակի քանակությամբ մանրաձուկ: 2005-ից մինչ 2016 թվականի սկիզբը Սեվանա լիճ բաց է թողնվել 2 մլն 934 հազար մանրաձուկ: Սա դեռ միայն պետական բյուջեի հատակացումներով: Խոսքն այս դեպքում մոտ 600 մլն դրամի մասին է: SHANTNEWS-ն այսօր հետաքրքվել է ԳԱԱ հիդրոէկոլոգիայի և ձկնաբանության ինստիտուտի տնօրեն Էվելինա Ղուկասյանից, թե ի վերջո ինչ արդյունք է տվել այդ գործնթացը, եթե ասում են, որ Սևանում հիմա ամենաշատը 17 տոննա իշխան կա:

«Երկու հանգամանք պետք է հաշվի առնենք՝ լճում իշխանի պաշարների գյությունը և ձկան բնական վերարտադրման հնարավորությունը: Այն, որ լճում բաց թողնվեցին իշխանի մեծ քանակությամբ առանձնյակներ, որոնք արդեն հասուն են և կարող են սերունդ թողնել, մեծ առաջընթաց էր, սակայն երբ գետերում ձվադրավայրերի վիճակը լավ չէ, խոսել բնական վերարտադրության մասին հնարավոր չէ»,- ասել է Էվելինա Ղուկասյան:

 Ըստ Ղուկասյանի՝ իրենք փորձում են այլ ելք գտնել՝ եթե կա այդքան սեռահասուն առանձնյակ, պետք է հասնել դրանց օգտագործմանը:

«Հավանաբար, այդ վերարատադրությունը կիրականացվի կիսաբնական, կիսաարհեստական ճանապարհով: Այսինքն՝ կարող են որսվել սեռահասուն առանձնյակները, ստանալ ձկնկիթ, աճեցնել արհեստական պայմաններիում և նորից բաց թողնել գետ: Բայց հարցի վերջնական լուծումը գետերի, հուների վիճակի բարելավումն է ու պայքարը որսագողության դեմ»,- հավելել է ԳԱԱ հիդրոէկոլոգիայի և ձկնաբանության ինստիտուտի տնօրենը:

Հարցին՝ ստացվում է, որ դա մոտ ապագայի խնդիր չէ՞, Ղուկասյանը պատասխանել է, որ դա այդքան էլ բարդ հարց չէ, պետք է ցանկություն ունենալ և այդ ցանկությունը պետք է ունենա հատկապես Սևանի ավազանի տարածքի բնակչությունը՝ հասկանալով, որ դա իրենց սերունդների բարեկեցության հարցն է: 

«Այսօր ամբողջովին սպառելով այդ ռեսուրսները, վաղն իրենք իրենց երեխաներին զրկում են դրանցից օգնվելու հնարավորությունից»,- ավելացրել է Էվելինա Ղուկասյանը: 

Հիշեցնենք նաև, որ Սևանա լճում՝ Լճափ համայնքի տարածքում, ափից 350-ից 400 մետր հեռավորության վրա, ցանցավանդակներ են տեղադրվել լճում իշխանի պաշարները վերականգնելու, Սևանի հիմնախնդիրների լուծմանն աջակցելու համար: Ցանցավանդակներն առայժմ 4-ն են: Գարնանը դրանց թիվը կհասնի 10-12-ի, իսկ հետո ամեն տարի կավելանա: Ընդհանուր առմամբ՝ «Սևանա լճում իշխանի պաշարների վերականգնման և ձկնաբուծության զարգացման համալիր ծրագիրը» իրականացվում է 2014 թվականից: Տարեկան շուրջ 133 միլիոն դրամի միջոցներ են ձևավորվելու և ուղղվելու Սևանի իշխանի պաշարների վերականգնման և ձկնաբուծության զարգացման հիմնադրամ: 2016 թվականից պետությունն այլևս գումարներ չի տրամադրում Սևանա լիճ մանրաձուկ բաց թողնելու համար՝ այդ գործառույթը վերապահելով Սևանա լճում իշխանի պաշարների վերականգնման և ձկնաբուծության զարգացման համալիր ծրագրին: