Ինչպե՞ս են Բրիտանիայում պայքարում ճարպակալման դեմ

Սահմանված է կոնկրետ չափ՝ հարկ պետք է վճարեն այն արտադրողները, որոնց խմիչքներում շաքարի պարունակությունը 100 միլիլիտրում 5-գրամից ավելի է: Եթե խմիչքը պարունակում է ավելի քան 8 գրամ շաքար 100 միլիլիտրում, հարկն ավելի բարձր կլինի:

 Այս միջոցառումները նպատակ ունեն պայքարելու առաջին հերթին երեխաների  ճարպակալման դեմ: Բրիտանիայի ֆինանսների նախախարությունը հարկերի ավելացման մասին հայտարարել էր դեռևս 2016 թվականին: Այդ ժամանակ արտադրողները նվազեցրել էին շաքարի պարունակությունը: 

Մասնագետները փաստում են, որ աշխարհի բնակչության 50 տոկոսից ավելին տառապում է ավելորդ քաշով: 1-5 տոկոսի դեպքում ավելորդ քաշի պատճառը հորմոնային խանգարումներն են, մյուս դեպքերում` սխալ սննդակարգն ու ֆիզիկական ցածր ակտիվությունը:

Բժիշկների դիտարկումներով՝ ամբողջ աշխարհում նկատվում է ճարպակալման «համաճարակ»: Ճարպակալումով տառապում են և՛ մեծահասակները, և՛ երեխաները: Անհանգստացնում է նաև այն, որ ճարպակալումը երիտասարդանում է, երեխաների մոտ առավել հաճախ է հանդիպում: Ապացուցված է, որ աշխարհում յուրաքանչյուր տասներորդ երեխան ճարպակալում ունի: 

Վերջին տարիներին Հայաստանում ևս նկատվում է ճարպակալած մարդկանց թվի աճ:

Գիտնականները բացահայտել են, որ յուղոտ ուտելիքի պատկերներն ազդում են ուղեղի այն հատվածի վրա, որը պատասխանատու է մարդու ախորժակի համար, և մեծացնում են ուտելու ցանկությունը: Քաղցրահամ ըմպելիքները նույնպես համարվում են ճարպակալման գլխավոր պատճառներից մեկը:

Իսկ շուկան ողողած բուրահաղորդիչներով գազավորված ըմպելիքների հիմնական սպառողը երեխաներն են, քաղցր համը գրավում է հենց նրանց: Գիտնականների ուսումանսիրությունները պարզել են, որ երեխաներին դուր են գալիս նաև երշիկներն ու նրբերշիկները, որոնք մեծ քանակությամբ թաքնված ճարպեր են պարունակում: Այն արդարացմանը՝ թե առանց քաղցրի ուղեղը չի աշխատում, բժիշկները խորհուրդ  են տալիս քաղցրի անհրաժեշտ քանակը ստանալ  մրգերից, հնդկաձավարից, բրնձից ու ցորենից:

Ինչպես  ամբողջ աշխարհում, Հայաստանում ևս պայքարում են ճարպակալման դեմ, քանի որ  ՀՀ առողջապահության նախարարության  ուսումնասիրությունների  արդյունքները ևս մեկ անգամ վկայում են, որ առողջության հիմնական գրավականն առողջ ապրելակերպն է։ Հիվանդությունների առավել տարածված ռիսկի գործոնների՝ ավելորդ քաշի և ճարպակալման, ցածր ֆիզիկական ակտիվության կանխարգելումը կարող է փրկել  վտանգավոր հիվանդություններից։

Գիրության հետևանքով  կարելի  է ձեռք բերել արյան բարձր ճնշում, շաքարային դիաբետ, քաղցկեղ, արթրիտ, ծնկների, ազդրերի օստեոարթրիտ, լեղապարկի քարեր, լեղապարկի հիվանդություններ, ի վերջո`կաթված և սրտամկանի ինֆարկտ: Այս հիվանդությունների մեծ մասը հաճախ կարելի է հանդիպել գիրությամբ տառապող մարդկանց շրջանում:

Բժիշկները հիշեցնում են, որ ոչ վարակիչ հիվանդությունների կանխարգելման և դրանց դեմ պայքարի ամենաարդյունավետ միջոցը առողջ ապրելակերպն է, որը ներառում է առողջ սնունդ, ֆիզիկական ակտիվություն և վնասակար սովորություններից հրաժարում: