Մի կողմից աղքատությունն է խրախուսվում, մյուս կողմից՝ ղումարբազությունը. ՀՀ վարչապետ

Աժ պատգամավորներ Ալեն Սիմոնյանը և Նաիրա Զոհրաբյանը «Վիճակախաղերի մասին», «Շահումով խաղերի և ինտերնետ խաղերի մասին» ՀՀ օրենքներում լրացումներ կատարելու առաջարկ են ներկայացրել: Կառավարությունն այսօրվա նիստի ժամանակ անդրադարձել է հարցի քննարկմանը:

«Առաջարկվում է հնարավորություն տալ տոտալիզատոր կազմակերպողներին իրականացնել գործունեության այլ տեսակներ:  Առաջարկվում  է տարիքային ստուգման պահանջ դնել: Առաջարկվում է սահմանափակել սահմանափակ գործունակ ճանաչված  անձանց մասնակցությունը, նաև սահմանափակել տարածքներին ներկայացվող պահանջը. խաղատների գործունեությունը կազմակերպել քաղաքներում՝ Ծաղկաձորում, Մեղրիում, Սևանում և Ջերմուկում», – առաջարկը ներկայացրել է ՀՀ ֆինանսների նախարար Ատոմ Ջանջուղազյանը:

Ըստ ֆինանսների նախարարի՝ կառավարությունն իր հերթին մի շարք առաջարկներ է արել:

«Ամենամտահոգիչ փաստն այն է, որ մեր տեղական կայքերի համար սահմանափակում ենք դնում, օտարերկրա կայքերին չենք դնում: Ես, անկեղծ ասած, որոշակի մտահոգություններ եմ ստացել, որ ոլորտի  ներկայացուցիչների հետ բավարար չափով քննարկումներ տեղի չեն ունեցել: Այս փուլում մեր պայմանավորվածությունը պետք է լինի հետևյալը՝ էս առաջարկությունները ուղարկվեն, ու քննարկումները շարունակվեն», – նկատել է վարչապետ Նիկոլ Փաշինյանը՝ հավելելով, որ խնդիր կա գազալցակայաններում համատարած տեղադրված խաղային սարքերի հետ:

«Սա այդ հարցը լուծում է, պարո՛ն վարչապետ, այսինքն՝ դա այլևս չի կարող կազմակերպվել այլ տեղ, քան 4 քաղաքներում՝ Ջերմուկում, Սևանում, Մեղրիում ու Ծաղկաձորում», – պատասխանել է Ատոմ Ջանջոըղազյանը:

Պայմանավորվածություն է ձեռք բերվել, որ խնդիրը լուծվի հավասարակշռված տարբերակով: Ըստ վարչապետի՝ գազալցակայաններից խաղասարքերը պետք է հանվեն, բայց դա պետք է արվի առանց վնաս հասցնելու:

«Երբ որ նայում ենք մեր տնտեսական աճի ցուցանիշներին, պարզվում է՝ էդ խաղային ավտոմատները դառել են մեր տնտեսության առաջատար ճյուղը: Սա աբսուրդ է, մեր քաղաքականությունը պետք է լինի մեր տրամաբանությունը փոխելը՝ մի կողմից աղքատությունն է խրախուսվում, մյուս կողմից, կներեք արտահայտությանս համար, ղումարբազությունն է խրախուսվում: Մենք պետք է այնպիսի քաղաքականություն տանենք, որ խրախուսենք ո՛չ մեկը, ո՛չ էլ մյուսը: Եվ սա շատ լուրջ պրոբլեմ է՝ մարդիկ, ընտանիքներ,  ճակատագրեր, և այլն և այլն», – ասել է վարչապետը՝ հավելելով, որ պետք է քննարկեն, լուծեն խնդիրը՝ բացառելով որևէ կողմի շահերի ոտնահարումը:

ՀՀ ֆինանսների նախարարը նկատել է, որ եթե արգելքներ լինեն, հնարավոր է՝ ընդհատակ անցնողների թիվը շատանա, ուստի, այո՛, կարևոր է համակողմանի խնդրին նայել: Նիկոլ Փաշինյանն ընդգծել է, որ հարցը որքան շուտ լուծվի, այնքան լավ: Պետք է հրավիրել նաև ոլորտի մասնագետներին, քննարկել և այնպես անել, որ հանրությունը շահի:

ՀՀ աշխատանքի և սոցիալական հարցերի նախարար Մանե Թանդիլյանը հետաքրքրվել է, թե ի՞նչ տնտեսական ազդեցության մասին է խոսքը: Ֆինանսների նախարարն ասել է, որ ազդեցության գնահատականը դեռ չունեն:

Վարչապետի խոսքով՝ պետք է հնարավորինս տրամաբանական ձևով լուծել փողոցային թակարդների՝ բուքմեյքերական գրասենյակների հարցը:

«Տեսնում ենք, որ կա տնտեսական աճ, և տեսնում ենք, որ մեր երիտասարդները ֆուտբոլային առաջնությունների ժամանակ ներդրումներ են արել և պարտվել, էս խնդիրը պետք է լուծվի, էսպես չպետք է լինի», -ասել է վարչապետը:

Որոշումն ընդունվել է միաձայն: