Ազատամուտցիները փակել են միջպետական ճանապարհը, պահանջում են գյուղապետի հրաժարականը

Տավուշի մարզի Ազատամուտ գյուղում բնակիչները օրեր շարունակ բողոքի ակցիաներ են իրականացնում՝ մի քանի անգամ փակել են միջպետական ճանապարհը և պահանջում են գյուղապետ Ժորա Մարտիրոսյանի հրաժարականը:

Ժորա Մարտիրոսյանը արդեն 10 տարի է ինչ ղեկավարում է գյուղը և երկու տարի առաջ տեղի ունեցած ՏԻՄ ընտրություններում վերջինս կրկին ընտրվել է:

Սեպտեմբերի 27-ից դարձյալ բողոքի ակցիաներ են անցկացվում, ստորագրահավաք են սկսել և գյուղի 1400 ընտրողից մոտ 930-ն արդեն ստորագրել և պահանջում է Ժորա Մարտիրոսյանի հրաժարականը:

https://www.facebook.com/flora.khachatryan.1/videos/2468702273373494/

SHANTNEWS.am-ի հետ զրույցում Տավուշի մարզի լրագրողներից Ֆլորա Խաչատրյանը տեղեկացրեց, որ գյուղապետից դժգոհ են եղել, իսկ գյուղում լարված իրավիճակը սկսվել է սեպտեմբերի 24-ին դպրոցում Ժորա Մարտիրոսյանի թոռան և մեկ այլ աշակերտի միջև ծագած միջադեպից:

«Բողոքի ակցիաները սկսվելուց ի վեր դպրոցը չի աշխատում: Ծնողներն ու աշակերտները որոշել են, որ դպրոցը չի աշխատելու այնքան ժամանակ, մինչև գյուղապետը հրաժարական չներկայացնի: Ասում են՝ գյուղում և դպրոցում վախի մթնոլորտ է: Գյուղապետը մտել է դպրոց, ուսուցիչներին, տնօրենին ու աշակերտներին հայհոյել ու սպառնացել է մորթել»,- ասաց մեր զրուցակիցը և հավելեց, որ մարզպետ Վահե Ղալումյանը նույնպես եկել է ազատամուտցիների հետ բանակցելու:

https://www.facebook.com/flora.khachatryan.1/videos/2468658780044510/

Օրերս դատախազի որոշմամբ գյուղապետի լիազորությունները կասեցվել է առերևույթ ինքնիրավչություն կատարելու համար, և դեպքի առթիվ հարուցվել է քրեական գործ:

Հիշեցնենք, որ 2018թ. հուլիսի 31-ին ՀՀ ոստիկանության Տավուշի մարզային վարչության Իջևանի բաժնում ՀՀ Քրեական օրենսգրքի 322-րդ հոդվածի 1-ին մասով հարուցվել է քրեական գործ` Ժ. Մարտիրոսյանի կողմից նույն համայնքի բնակչուհու առանձնատանը սահմանված կարգի խախտմամբ տիրանալու դեպքի առթիվ: Համայնքի ղեկավարը, չունենալով ՀՀ Քաղաքացիական օրենսգրքի 170-րդ հոդվածով նախատեսված իրավունքներից որևէ մեկը, խախտելով ՀՀ Քաղաքացիական օրենսգրքի 172-րդ հոդվածով սահմանված սեփականության ձեռքբերման կարգը, 2000թ. փետրվարից տիրացել է նույն համայնքի բնակչուհուն պատկանող առանձնատանը:

Լիազորությունները կասեցված լինելով հանդերձ՝ այժմ Ժորա Մարտիրոսյանը շարունակում է գնալ գյուղապետարան՝ աշխատանքի և իր այդ քայլերը գյուղացիների զայրույթն է առաջացրել:

Վերջին տվյալներով՝ միջպետական ճանապարհը շարունակում է փակ մնալ, գյուղացիները պահանջում են Դավիթ Սանասարյանի և վարչապետ Նիկոլ Փաշինյանի հետ հանդիպում:

https://www.facebook.com/flora.khachatryan.1/videos/2468472020063186/

https://www.facebook.com/flora.khachatryan.1/videos/2468517966725258/

Տեսանյութերը՝ Ֆլորա Խաչատրյանի ֆեյսբուքյան էջից: