Հանրապետականները սխալ ճանապարհով են գնում. Փաշինյան

ՀՀ վարչապետի պաշտոնակատար Նիկոլ Փաշինյանը SHANTNEWS.am-ի թղթակցի հարցին՝ դեկտեմբերին կայանալիք ընտրություններին կհաջողվի՞ նոր Ընտրական օրենսգրքով գնալ, ասաց.

«Մեզ համար չկա տարբերություն՝ որ Ընտրական օրենսգրքով գնալ, բայց ես կարծում եմ՝ քաղաքական դաշտի առողջացման, ընտրություններն ավելի քաղաքական դարձնելու համար ճիշտը նոր Ընտրական օրենսգիրքն է»:

Վարչապետի պաշտոնակատարին հիշեցրին` մի առիթով ասել է, որ թեպետ ամեն ինչում մեղքը գցում են Ընտրական օրենսգրքի վրա, սակայն քաղաքական կամք դրսևորելու դեպքում հնարավոր է նաև այս Ընտրական օրենսգրքով ընտրություններ իրականացնել, հետևաբար, ո՞րն է մոտիվացիան:

«Մեզ համար տարբերություն չկա: Կարծում եմ, որ ՏԻՄ և Երևանի ավագանու ընտրություններում համոզվեցիք, որ պրոբլեմներն Ընտրական օրենսգրքի մեջ չեն: Եթե նկատել եք, այս փոփոխություններով մենք քաղաքական ուժերի համար պայմաններն ավելի նպաստավոր ենք դարձնում, այդ թվում՝ ընդդիմության համար, որ նրանք առավել քաղաքական ընտրական պրոցեսով հնարավորություն ունենան իրենց ուժերը չափել»,- ասաց նա:

Փաշինյանն ընդգծեց` եթե իրենց հանրապետական գործընկերներն ասում էին, որ Վենետիկի հանձնաժողովը դեմ կլինի, համոզվեցին, որ հանձնաժողովը դեմ չէ, ուստի թող ասեն, որ իրենք են դեմ: Վարչապետի պաշտոնակատարը կարծիք հայտնեց, որ հանրապետականները սխալ ճանապարհով են գնում, և եթե իրենց այս կեցվածքը շարունակեն պահպանել, ընտրական գործընթացն անխուսափելիորեն գնալու է հեղափոխություն-հակահեղափոխություն տրամաբանության մեջ, որովհետև այդ մեսիջներով ցույց են տալիս, որ իրենց մեջ դեռ կենդանի է միտքը, որ հիմա կվերադառնան իշխանություն: Դա, ըստ Փաշինյանի, նույնիսկ ֆանտաստիկայի ոլորտից չէ, շատ ավելի ֆանտաստիկ ոլորտից է:

«Այդ մթնոլորտը տեսել ենք, չէ՞, շատ ավելի իրենց դեմ է աշխատում, այնպես որ իրենց օգտից է բխում, որ Ընտրական օրենսգիրքը լրիվ համամասնական ընտրակարգով գնա»,- ասաց Փաշինյանը:

Ամեն դեպքում, վարչապետի պաշտոնակատարը վստահեցրեց` կունենանք արձակված խորհրդարան, իսկ թե ինչ սցենարով, նշեց.

«Մի քանի օր է մնացել, կտեսնենք»:

Նրան հիշեցրին` Դաշնակցությունը դժգոհել է, թե ԸՕ վերաբերյալ իր սկզբունքային առաջարկները չեն ընդունվել, ինչին Փաշինյանն արձագանքեց.

«Կարծում եմ` աշխատանքային խումբը այդ հարցերին լիարժեք պատասխանել է. այն առաջարկները, որոնք իրագործելի են, ընդունվել են, որոնք իրագործելի չեն, չեն ընդունվել, իսկ բաց համամասնական ցուցակի դեպքում մենք մի քանի տասնյակ կիլոմետրանոց կամ մետրանոց քվեաթերթիկներ կունենանք, որտեղ ամեն մի քվեարկությունը կարող է տևել 15-20 րոպե, իսկ դա նշանակում է ընտրական պրոցեսը ձախողել»:

Փաշինյանը նշեց` եթե այլ տեխնիկական հնարավորություններ կան դա իրագործելու, իրենք կքննարկեն այդ տարբերակը: