Շիրակի մարզի ՏԸՀ-ները պատրաստվում են արտահերթ ընտրությունների

Տարածքային ընտրական հանձնաժողովների արձակուրդն այս անգամ քիչ տևեց: Նախորդ ընտրություններից ընդամենը 1 ու կես տարի անց նորից տարածքային ընտրական հանձնաժողովներն իրենց տեղերում են:  Նրանց կազմերում փոփոխություններ չկան: Շիրակի մարզn ընդգրկում է թիվ 11 ընտրական տարածքը, որի կազմում տարածքային 4 հանձնաժողովներ են՝ թիվ 30, 31, 32 և 33: Հանձնաժողովները կաշխատեն նույն կազմով ու նույն տեղերում:

Տարածքային ընտրական հանձնաժողովներից միայն թիվ 31-ն է, որ ընդգրկում է Գյումրին: Հանձնաժողովին հատկացված տարածքների ցուցափեղկերին արդեն տեղամասային հանձնաժողովականների ցուցակներն են,  որոնք մասնակցելու են դասընթացների: Ընտրություններին պատրաստվելու համար մեկ ամիս ունեն, իսկ հանձնաժողովների կազմերում փոփոխություններ են տեղի ունեցել՝ տեղամասային հանձնաժողովի նախկին 8 անդամների փոխարեն հիմա 10-ն է լինելու: Հանձնաժողովների կազմը փոխվել է, բայց նախագահ ու քարտուղար ունենալու կուսակցությունների համամասնությունը նույնն է: Այս պաշտոնները բաշխվում են՝  ըստ խորհրդարանում կուսակցությունների ունեցած մեծամասնության:  Ըստ այդմ՝ ամենաշատ թվով  նախագահներ ու տեղակալներ հանձնաժողովներում Հանրապետական կուսակցությունն է ունենալու: Ընտրական օրենսգիրքը չփոխվեց, ուրեմն ընտրությունների կազմակերպման գործընթացն էլ անփոփոխ է:

«Սա առաջին դեպքն է արտահերթ խորհրդարանական համապետական ընտրությունների: Ճիշտ է՝ ձևի ու բովանդակության մեջ չի տարբերվում, բացի անվանումից, որ արտահերթ է : Միակ տեսանելի փոփոխությունը դա քարոզարշավի ժամկետներն են: Ներկայումս սահմանվել է 12 օր, նախկին ավելի մեծ ժամանակահատվածի համեմատ»,- Shantnews.am-ի հետ զրույցում նշել է թիվ 31 Տարածքային ընտրական հանձնաժողովի նախագահ Արտակ Ավետիսյանը:

Քարոզարշավի ժամկետներ են սահմանվել՝  նոյեմբերի 26-ից դեկտեմբերի 7-ը: Ժամանակը քիչ է, բայց Տարածքային ընտրական հանձնաժողովների նախագահները չհասցնելու խնդիր չեն տեսնում՝  թեկնածուներն ու հանձնաժողովականները, ըստ նրանց, հաստատ փորձառու են լինելու:

«Եթե կուսակցությունների ձևավորումները չլինեն, ընտրատարածքները միշտ պատրաստ են, մանավանդ, որ Ընտրական օրենսգիրքը չփոխվեց: Աշխատելու ենք հին կանոններով, հին օրենսգրքով»,- Shantnews.am-ի թղթակցին ասել է թիվ 30 Տարածքային ընտրական հանձնաժողովի նախագահ Գրիգոր Հովհաննիսյանը:

Յուրաքանչյուր ընտրական տարածքում կուսակցություններն իրավունք ունեն ռեյտինգային 15 թեկնածու առաջադրել:  Իսկ ովքեր են նրանք՝ առաջինն իմանում են Կենտրոնական ընտրական հանձնաժողովում, տարածքայիններից այդ գործառույթը նախորդ ընտրություններին է վերցվել: Թեկնածուների գրանցումները կատարվելու են նոյեմբերի 14-ից 19-ը։