Գյումրիի կամուրջների վերանորոգման նախագծերում թերություններ են հայտնաբերվել

Գյումրիի փողոցաշինական մեծ ծրագրով երկու փողոցներում հիմնանորոգվում են կամուրջները: Խոսքը Վազգեն Սարգսյան և Գերցենի փողոցների կամուրջների մասին է: Վերջինի հիմնանորոգումն ավարտված է, իսկ Վազգեն Սարգսյան փողոցում դեռ աշխատանքները շարունակվում են, բայց ինչպես գետնանցումների դեպքում է, կամուրջները հիմնանորոգվում են առանց դրանց վիճակի ուսումնասիրության: Այսինքն՝ համապատասխան մասնագիտական ուսումնասիրություններ չեն կատարվել, թե ինչ վիճակում են դրանք, և վերանորոգման նախագիծ է կազմվել:

Կամուրջների վերանորոգման նախագծային բացթողումների մասին բարձրաձայնում է փողոցաշինական ծրագրի վերահսկող աշխատանքային խումբը, որի կազմն առայժմ անփոփոխ է: Մոտ 1 ամիս առաջ էր, երբ Շիրակի փոխմարզպետը, որը ղեկավարում է փողոցաշինական ծրագրի վերահսկող աշխատանքային խումբը, հայտարարեց, թե այլևս չի ուզում այս պաշտոնում մնալ և խմբի ղեկավարի պաշտոնից հրաժարվելու դիմում է ներկայացրել քաղաքապետարանին, բայց Արա Մելիքջանյանը դեռ շարունակում է աշխատել խմբում: Հրաժարվել է, բայց ծրագրի պատվիրատուն՝ քաղաքապետարանը, դեռ հրաժարականը չի ընդունել: Եթե հրաժարականը չի ընդունվել, նշանակում է՝ վերահսկող խումբը դեռ կշարունակի աշխատել հին կազմով ու նոր նախագծային թերություններ հայտնաբերել: Հերթականը կամուրջների վերանորոգմանն է վերաբերում: Նախագծում կամուրջների վիճակի ուսումնասիրության մասին փաստաթղթերը բացակայում են:

«Սեյսմիկ վիճակի ուսումնասիրության փաստաթուղթ չկա, ուսումնասիրություն չի կատարվել: Նախագծողը ուղղակի նախագծի ընթացքում իրականացրել է հանձնարարված գործառույթը՝  կոսմետիկ վերանորոգում և շահագործման պայմանների ապահովումը»,- SHANTNEWS.am-ի հետ զրույցում ասել է Շիրակի մարզպետի տեղակալ Արա Մելիքջանյանը:

Այդ ուսումնասիրությունների բացակայությունից նաև շինարարներն են տուժել՝ ընդունել են կոսմետիկ վերանորոգման նախագծով, պարզվել է՝ անելիքն ավելի շատ է:

«Չգիտեմ՝ նախկինում նորմերը ինչպես են հաստատված եղել, բայց կամուրջն անմխիթար վիճակում էր, երբ ընդունեցինք: Կարելի է ասել՝ կամուրջը տրված է վերանորոգման, բայց մենք կատարում ենք հիմնանորոգում»,- SHANTNEWS.am-ի թղթակցի հետ զրույցում ասել է «ԱԱԲ պրոյեկտ» ՍՊԸ աշխղեկ Դերենիկ Թորոսյանը:

Գերցեն  փողոցում էլ կամուրջը վերանորոգել են, բայց փողոցի ասֆալտապատումը չեն կարող սկսել ենթակառուցվածքների պատճառով՝ ջրամատակարար ընկերությունը դիտահորերի կառուցման աշխատանքներն է կիսատ թողել: Ըստ այդմ՝ Գերցենի միայն մի հատվածը շինարարը կարող է ասֆալտապատել: Երկու փողոցների դեպքում էլ ժամկետները խախտվում են՝ սպասելով նախագծային փոփոխությունների, իսկ փոփոխություններն ընթացքի մեջ են:

Այս մասին օրեր առաջ տեղի ունեցած հանրային քննարկման ժամանակ նախագծողները նշեցին` հավելելով, թե այս փողոցներում ասֆալտապատում մինչև տարեվերջ հնարավոր չէ: