ԵԿՄ նախագահի թեկնածուների միջև ընտրությունը՝ կառույցի պառակտման պատճառ

Երկրապահ կամավորականների միությունը վարչության նոր նախագահ է ընտրելու: Մի քանի թեկնածուի անուն է շրջանառվում, որոնց միջև ընտրությունը պառակտել է երկրապահների շարքերը: Այս մասին այսօր հրավիրված մամուլի ասուլիսի ընթացքում խոսել են Շիրակի մարզի երկրապահ կամավորականները:

Նրանք նշել են, որ միությունն այսօր ավելի լուրջ խնդիրներ ունի, քան նախագահի ընտրությունն է: Մասնավորապես, խոսքը վերաբերում է այն արտոնություններին, որոնք նախատեսված են երկրապահների համար: Առողջապահական, սոցիալական ու բնակարանային արտոնությունները պարզապես չեն գործում: Դրանց համար պետական ֆինանսավորումը չի բավականացնում:

Երկրապահ կամավորականի վկայականը ոչ միայն փաստաթուղթ է, որը հաստատում է միությանը տվյալ ազատամարտիկի անդամակցությունը, այլև մի շարք արտոնություններ է սահմանում: Մասնավորապես, հաշմանդամության խումբ ունեցող բոլոր երկրապահների բժշկական սպասարկումը պետպատվերով է: Սա արտոնություններից առաջինն է, որը, ըստ ազատամարտիկների, գործում է, բայց ոչ լիարժեք:

Հաշմանդամ և զոհված ազատամարտիկների բնակարանային փոխհատուցման ծրագրով առաջնահերթությունը առաջին կարգի հաշմանդամներինն է: Այդ առաջնահերթությունը 10 տարի առաջ է սահմանվել:  Զոհվածների և առաջին խմբի հաշմանդամների վերջին ընտանիքներն անցած տարվա վերջին փոխհատուցում ստացան: Դրանից հետո բնակարանային ծրագրում դադար է:  Հաշմանդամության մյուս խմբերի ազատամարտիկները պետք է սպասեն անորոշ ժամկետով:

«Բնակարանային փոխհատուցում ստացողներ եղել են: Առաջին կարգի հաշմանդամները, զոհվածների ընտանիքները փոխհատուցում ստացան: Քառօրյայի զոհերի դեպքում էլ արտահերթ էր բնակարանային փոխհատուցումը, ինչը հասկանալի էր, իսկ երկրորդ և երրորդ կարգի հաշմանդամները դեռ հերթի մեջ են»,- SHANTNEWS.am-ի հետ զրույցում ասել է ազատամարտիկ, ԵԿՄ անդամ Աշոտ Թադևոսյանը:

Երկրապահ կամավորականների միությունը ընտրությունների է պատրաստվում, բայց ոչ թե արտահերթ խորհրդարանական, այլ միության նախագահի: Այս պաշտոնի մի քանի հավակնորդների անուններ են շրջանառվում՝ «Ելք» խմբակցության պատգամավորներ Արամ Սարգսյանի և Սասուն Միքայելյանի, ինչպես նաև ազատամարտիկ Կոռնիձորցի Արայի:

Տեղի է ունենալու ԵԿՄ համագումար, որն ընտրելու է վարչություն, իսկ վարչությունը՝ նախագահ, բայց նախ՝ Երկրապահ կամավորականների միության տարածքային կառույցներն են կողմնորոշվելու թեկնածուների հարցում:

«Համագումարի ժամանակ թեկնածուները կառաջադրվեն, և մենք կքննարկենք: ԵԿՄ-ն այժմ նախագահի տեղակալներն են ղեկավարում: Կառույցը դեռ անտերության մատնված չէ: Մենք ուզում ենք, որ մեր մարտական ընկերները, որոնք, ցավոք, հիմա այստեղ մեզ հետ չեն, հասկանան, որ մենք մեկ ընդհանուր ուժ ենք»,- ասել է ԵԿՄ անդամ  Հարություն Կիրակոսյանը:

Թեկնածուների հարցում կողմնորոշումը պառակտում է երկրապահի շարքերը, իսկ այդ պառակտման հետևանքով անգամ Շիրակի մարզային կառույցի ղեկավարի փոփոխության պահանջ է հնչել: Միության մարզային կառույցների ղեկավարներին փոխելու հարցը տեղի ազատամարտիկների որոշելիք հարցն է: