Ի՞նչ է սպորտ սնունդը և ինչպե՞ս գրագետ սնվել մարզումների ընթացքում

Հաճախ մարդիկ մարզվում են, սակայն սխալ սննդակարգի պատճառով չեն հասնում ցանկալի արդյունքի, ի՞նչ է սպորտ սնունդը, ինչպե՞ս սնվել մարզումների ընթացքում, այս ամենի մասին SHANTNEWS.AM-ը խոսել է «Վլադ» ֆիթնես մարզասրահի և FitFood դիետիկ սննդի ընկերությունների հիմնադիր Վլադ Խառատյանի հետ:

-Ի՞նչ է սպորտ սնունդը, ինչո՞վ է այն տարբերվում սովորական սննդից։

-Ֆիթնես սնունդը  առողջ ապրելակերպի հիմքն է, որովհետև առողջ ապրելակերպը սկսվում է սպորտային սննդից, այնուհետև մարզումներից: Սովորական սննդակարգից տարբերվում է նրանով, որ այն ամբողջությամբ հաշվարկված է սպիտակուցների և ածխաջրերի այնպիսի քանակի վրա, որ մարզումների ժամանակ մարդը կարողանա էներգիա ունենալ և մարզումներից հետո վերականգնվի օրգանիզմը:

-Հնարավո՞ր է միայն օգտագործել սպորտ սնունդ, բայց չմարզվել և քաշ կորցնել, կամ էլ չօգտագործել սպորտ սնունդ՝ միայն մարզվելով նիհարել։

-Եթե մարդը մարզվում է, ապա պարտադիր պետք է հետևի որոշակի կանոնների, որոշակի սննդամթերքներ պետք է ավելացվեն իր սննդակարգի մեջ, և դա կօգնի, որ կորցնի քաշը: Միայն սննդակարգով և միայն մարզումներով հնարավոր է հասնել արդյունքի, բայց այն կլինի ավելի քիչ: Երբ 2-ը միասին է լինում, մենք կարողնում ենք արագացնել օրգանիզմի նյութափոխանակությունը: Գոյություն ունի ընդհանուր սննդակարգի հիմք՝ դա ճիշտ սնվելու կարգն է, բայց յուրաքանչյուր օրգանիզմի համար մոտեցումը պետք է անհատական լինի, քանի որ յուրաքանչյուր օրգանիզմ իր առանձնահատկություններն ունի։

-Սպիտակուցներ, ածխաջրեր, ճարպեր, ինչպիսի՞ հարաբերակցություն պետք է լինի։

-Եթե ցանկանում եք նիհարել, ապա օրվա ընթացքում պետք է սննդի մեջ գերակշռեն սպիտակուցները՝ անհրաժեշտ մկանները զարգացնելու համար, այնուհետև պետք է բալանսավորվի ածխաջրերի քանակը՝ հատկապես առավոտյան ժամերին և հատկապես բարդ ածխաջրերի օգտագործումն է խրախուսվում: Պետք է նաև չմոռանանք ճարպերի մասին, քանի որ մեր օրգանիզմին չափավոր քանակությամբ ածխաջրերով հարուստ սնունդ է պետք: Հեղուկի օգտագործումը ևս պարտադիր է:

-Ճի՞շտ է վիտամինային հավելումների ընդունումը։

-Քանի որ մենք մարզումների ժամանակ և դիետաներ պահելուց վիտամիններ չենք կարողանում ստանալ և շատ ենք կորցնում, դրա համար որոշ ժամանակ անց, երբ մարզվում կամ հատուկ սննդակարգի ենք հետևում, խորհուրդ է տրվում օգտագործել վիտամինային կոմպլեքսներ, որպեսզի լրացնենք այն պակասը, որ օրգանիզմը չի ստացել սննդի միջոցով:

-Ովքե՞ր են ավելի արագ քաշ կորցնում տղամարդիկ, թե՞ կանայք

-Կարծիք կա, որ տղամարդիկ ավելի արագ են նիհարում, որովհետև այդտեղ հորմոնալ շեմի տարբերություններ կան, բայց ես դրան կողմ չեմ: Նիհարելը առաջին հերթին հոգեբանական գործընթաց է. նա, ով ավելի լավ կտրամադրվի, ավելի արագ կնիհարի: Դա կախված է մարդու կամքի ուժից, և սեռը այդքան էլ կապ չունի:

-Ինչպե՞ս է ազդում տարվա եղանակը օրգանիզմի նյութափոխանակության վրա։

-Իհարկե, փորձը  ցույց է տվել, որ աշնանը նյութափոխանակությունը դեպի ձմեռ գնալով ավելի դանդաղում է, մենք չենք կարողանում  վիտամիններով հարուստ սնունդ օգտագործել, և մարդիկ ավելի քիչ են քաշ կորցնում: Ես կարող եմ ասել նաև մյուս տեսակետը, որ դրա պատճառը նաև այն է, որ մարդիկ ավելի քիչ են սպորտով զբաղվում: Վատ եղանակին մենք չենք տրամադրվում ոչ մի բանի վրա: Հոգեբանորեն մենք մեզ տրամադրում ենք, որ եթե եղանակները վատ են, ուրեմն այս եղանակին եկենք չմարզվենք. սա ավելի շատ ներշնչանք է:

-Ի՞նչ հաճախականությամբ է պետք մարզվել և կշռվել։

-Ես կողմ եմ շաբաթական 3-4 մարզմանը, իսկ կշեռքից օգտվել հարկավոր է օրգանիզմը վերահսկելու համար: Կարելի է կշռվել շաբաթական 3-4 անգամ, հաճախակի կշռվելուն ես կողմ չեմ, որովհետև հոգեբանորեն մարդը կարող է սթրեսի մեջ ընկնել: Կշռվել պետք է վաղ առավոտյան, քաղցած վիճակում, քանի որ այդ ժամանակ է երևում մարդու իրական քաշը: